ರಿಂಗ್ ಆಫ್ ಫೈರ್ನಲ್ಲಿ ಮಿಂಚಿದ ಆಸೀಸ್- ಕಿವೀಸ್ ಸೋಲಿಸಿದ ಕಾಂಗರೂಗಳು ಟಿ20 ವಿಶ್ವಕಪ್ ಚಾಂಪಿಯನ್ಸ್
ದುಬೈನಲ್ಲಿ ಆಸ್ಟ್ರೇಲಿಯಾ ಅಂದುಕೊಂಡಿದ್ದು ಎಲ್ಲವೂ ನಡೆಯಿತು. ಬ್ಯಾಟ್ಸ್ಮನ್ಗಳು ಅಬ್ಬರಿಸಿದರು. ಬೌಲರ್ಗಳು ಮಿಂಚಿದರು. ನ್ಯೂಜಿಲೆಂಡ್ ವಿಲಿಯಮ್ಸನ್ ಅಬ್ಬರದ ಆಟದಿಂದ ಚೇತರಿಸಿಕೊಂಡರು ವಿಶ್ವಕಪ್ ಎತ್ತುವ ಕನಸು ಮಾತ್ರ ನನಸಾಗಲಿಲ್ಲ.
ರಿಂಗ್ ಆಫ್ ಫೈರ್ನಲ್ಲಿ ಟಾಸ್ ಗೆದ್ ಆಸ್ಟ್ರೇಲಿಯಾ ಫೀಲ್ಡಿಂಗ್ ಆರಿಸಿಕೊಂಡಿತು. ಆ್ಯರೋನ್ ಫಿಂಚ್ ಈ ನಿರ್ಧಾರವನ್ನು ಜೋಶ್ ಹ್ಯಾಜಲ್ವುಡ್ ಡೆರಿಲ್ ಮಿಚೆಲ್ (11 ರನ್) ವಿಕೆಟ್ ಕಬಳಿಸುವ ಮೂಲಕ ಸಮರ್ಥಿಸಿಕೊಂಡರು. ಕೇನ್ ವಿಲಿಯಮ್ಸನ್ ಮತ್ತು ಮಾರ್ಟಿನ್ ಗಪ್ಟಿಲ್ ಆಟಕ್ಕೆ ಕುದುರಿಕೊಂಡರೂ ಇದರಲ್ಲಿ ವೇಗ ಇರಲಿಲ್ಲ. 35 ಎಸೆತಗಳಲ್ಲಿ ಗಪ್ಟಿಲ್ 28 ರನ್ಗಳಿಸಿ ಔಟಾದರು. ಮೊದಲ 10 ಓವರುಗಳಲ್ಲಿ ಕಿವೀಸ್ ಕೇವಲ 57 ರನ್ ಅಷ್ಟೇ ಗಳಿಸಿತ್ತು.
ನ್ಯೂಜಿಲೆಂಡ್ ಇನ್ನಿಂಗ್ಸ್ನ 2ನೇ ಅವಧಿಯಲ್ಲಿ ಕೇನ್ ವಿಲಿಯಮ್ಸನ್ ಅಬ್ಬರಿಸಿ ಬೊಬ್ಬಿರಿದರು. ವಿಲಿಯಮ್ಸನ್ ಕೇವಲ 48 ಎಸೆತಗಳಲ್ಲಿ 85 ರನ್ಗಳಿಸಿದರು. ಗ್ಲೆನ್ ಫಿಲಿಪ್ಸ್ 18 ಹಾಗೂ ಜೇಮ್ಸ್ ನಿಶಾಮ್ 13 ರನ್ಗಳಿಸಿದರು. 20 ಓವರುಗಳಲ್ಲಿ ನ್ಯೂಜಿಲೆಂಡ್ 4 ವಿಕೆಟ್ ಕಳೆದುಕೊಂಡು 172 ರನ್ಗಳಿಸಿತ್ತು.
ಆಸ್ಟ್ರೇಲಿಯಾ ತಂಡಕ್ಕೆ ಇದು ಮೇಲ್ನೋಟಕ್ಕೆ ದೊಡ್ಡ ಗುರಿಯಾಗಿತ್ತು. ಇದರ ಜೊತೆಗೆ 3ನೇ ಓವರ್ನಲ್ಲಿ ಆ್ಯರೋನ್ ಫಿಂಚ್ ಕೂಡ ಔಟಾಗಿದ್ದರು. ಆದರೆ ಡೇವಿಡ್ ವಾರ್ನರ್ ಮತ್ತು ಮಿಚೆಲ್ ಮಾರ್ಷ್ ಐದನೇ ಗೇರ್ನಲ್ಲೇ ಆಟ ಆರಂಭಿಸಿ ಅದನ್ನು ಮುಂದುವರೆಸಿದರು. ಬೌಂಡರಿ, ಸಿಕ್ಸರ್ಗಳ ಅಬ್ಬರವಿತ್ತು. ವಾರ್ನರ್ 38 ಎಸೆತಗಳಲ್ಲಿ 53ರನ್ಗಳಿಸಿ ಔಟಾದರು. ಇನ್ನೊಂದೆಡೆ ಅಬ್ಬರಿಸುತ್ತಾ ಸಾಗಿದ ಮಿಚೆಲ್ ಮಾರ್ಷ್ ಅಜೇಯ 77 ರನ್ಗಳಿಸಿದರು. ಇದಕ್ಕಾಗಿ ಬಳಸಿದ್ದು ಕೇವಲ 50 ಎಸೆತ. ಇನ್ನೊಂದೆಡೆ ಗ್ಲೆನ್ ಮ್ಯಾಕ್ಸ್ವೆಲ್ 18 ಎಸೆತಗಳಲ್ಲಿ ಅಜೇಯ 28 ರನ್ ಸಿಡಿಸಿದರು. 19ನೇ ಓವರ್ನ 5ನೇ ಎಸೆತವನ್ನು ರಿವರ್ಸ್ ಸ್ವೀಪ್ ಮೂಲಕ ಬೌಂಡರಿಗಟ್ಟಿದ ಮ್ಯಾಕ್ಸ್ವೆಲ್ ಆಸ್ಟ್ರೇಲಿಯಾ ತಂಡವನ್ನು ವಿಶ್ವಕಪ್ ಚಾಂಪಿಯನ್ ಪಟ್ಟದಲ್ಲಿ ಕೂರಿಸಿದರು. ಮೈದಾನದಲ್ಲೆಲ್ಲಾ ಹಳದಿ ತಂಡದ ಸಂಭ್ರಮ ಮುಗಿಲು ಮುಟ್ಟಿತು. 8 ವಿಕೆಟ್ಗಳಿಂದ ಫೈನಲ್ ಪಂದ್ಯ ಸೋತ ನ್ಯೂಜಿಲೆಂಡ್ ಮತ್ತೊಮ್ಮೆ ನಿರಾಸೆಯಲ್ಲಿ ಮುಳುಗಿತು.