ಬೆಂಗಳೂರು: ಮಾಜಿ ಮುಖ್ಯಮಂತ್ರಿ ಎಚ್.ಡಿ. ಕುಮಾರಸ್ವಾಮಿ ಅವರ ಆರೋಪಗಳಿಗೆ ತೀಕ್ಷ್ಣವಾಗಿ ಗುಡುಗಿರುವ ಉಪಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್, ‘ದಾಖಲೆಗಳಿದ್ದರೆ ಬಹಿರಂಗ ಚರ್ಚೆಗೆ ಬನ್ನಿ, ನಿಮ್ಮ ಬ್ಲ್ಯಾಕ್ಮೇಲ್ ರಾಜಕಾರಣ ಇಲ್ಲಿ ನಡೆಯುವುದಿಲ್ಲ’ ಎಂದು ನೇರ ಸವಾಲು ಹಾಕಿದ್ದಾರೆ.
“ಪ್ರಜಾಪ್ರಭುತ್ವ ವ್ಯವಸ್ಥೆಯಲ್ಲಿ ಚರ್ಚೆ ಮತ್ತು ವಾದ ವಿವಾದಗಳಿಗೆ ಅವಕಾಶವಿದೆ. ಆದರೆ ಹಿಟ್ ಅಂಡ್ ರನ್ ಹಾಗೂ ಬ್ಲ್ಯಾಕ್ಮೇಲ್ ರಾಜಕೀಯಕ್ಕೆ ಜಾಗವಿಲ್ಲ. ನನ್ನ ಹುಳುಕು ಏನಿದೆಯೋ ಅದನ್ನು ನೀವು ಬಿಚ್ಚಿಡಿ, ನಿಮ್ಮ ಹುಳುಕನ್ನು ನಾನು ಬಿಚ್ಚಿಡುತ್ತೇನೆ. ಅಂತಿಮವಾಗಿ ತೀರ್ಪು ನೀಡಲು ಈ ರಾಜ್ಯದ ಜನರಿದ್ದಾರೆ,” ಎಂದು ಕುಮಾರಸ್ವಾಮಿಗೆ ತಿರುಗೇಟು ನೀಡಿದ್ದಾರೆ.
ದಾಖಲೆಗಳಿದ್ದರೆ ಚರ್ಚೆಗೆ ಬನ್ನಿ
ಶಿವಕುಮಾರ್ ಜೊತೆ ಮಾತನಾಡಲು ಅವರಿಗೆ ಆ ಯೋಗ್ಯತೆ ಉಳಿದಿದೆಯೇ ಎಂಬ ಕುಮಾರಸ್ವಾಮಿ ಅವರ ಹೇಳಿಕೆಗೆ ಪ್ರತಿಕ್ರಿಯಿಸಿದ ಡಿಕೆಶಿ, “ಕುಮಾರಸ್ವಾಮಿ ಅವರ ಬಳಿ ಸಾಕ್ಷಿಗಳ ಗುಡ್ಡೆಯೇ ಇದ್ದರೆ, ಅದರಿಂದ ರಾಜ್ಯಕ್ಕೆ ಒಳ್ಳೆಯದಾಗುವುದಾದರೆ, ದಯವಿಟ್ಟು ದಾಖಲೆ ಸಮೇತ ಬಹಿರಂಗ ಚರ್ಚೆಗೆ ಬರಲಿ. ರಾಜ್ಯದ ಜನತೆ ಅವರಿಗೆ ಮತ ನೀಡಿ ದೊಡ್ಡ ಹುದ್ದೆ ನೀಡಿದ್ದಾರೆ. ಅದಕ್ಕೆ ಗೌರವ ಕೊಟ್ಟು ಜವಾಬ್ದಾರಿಯುತವಾಗಿ ನಡೆದುಕೊಳ್ಳಲಿ. ಕೇವಲ ಸುಳ್ಳು ಆರೋಪ ಮಾಡುತ್ತಾ, ಬೇರೆಯವರನ್ನು ಹೆದರಿಸುತ್ತಾ ಕಾಲ ಕಳೆಯುವುದು ಸರಿಯಲ್ಲ,” ಎಂದು ಹೇಳಿದರು.
ಪೆನ್ ಡ್ರೈವ್ ರಾಜಕೀಯ ಬೇಡ
ಸದನದಲ್ಲಿ ಜೇಬು ತೋರಿಸಿ ಪೆನ್ ಡ್ರೈವ್ ಇದೆ, ತೆಗೆಯುತ್ತೇನೆ ಎಂದು ಹೇಳಿದಂತೆ ಬೀದಿ ನಾಟಕಗಳು ಇಲ್ಲಿ ನಡೆಯುವುದಿಲ್ಲ. ನಾನು ಬಹಿರಂಗ ಚರ್ಚೆಗೆ ಸಿದ್ಧ. ಇದರಲ್ಲಿ ಅವಮಾನ ಪಡುವಂತಹದ್ದು ಏನೂ ಇಲ್ಲ. ಈ ಹಿಂದೆ ಅವರು ಮುಖ್ಯಮಂತ್ರಿಯಾಗಿದ್ದಾಗ ನಾನು ಸವಾಲು ಸ್ವೀಕರಿಸಿ ಸಾತನೂರಿಗೆ ಚರ್ಚೆಗೆ ಹೋಗಿರಲಿಲ್ಲವೇ? ಅದೇ ರೀತಿ ಈಗಲೂ ಬರಲಿ ಎಂದು ಆಹ್ವಾನಿಸಿದರು.
“ನಾನು ಏನು ತಪ್ಪು ಮಾಡಿದ್ದೇನೆ, ನನ್ನ ಹುಳುಕು ಎಲ್ಲಿದೆ ಎಂಬುದನ್ನು ನೀವು ಹೇಳಿ. ನಿಮ್ಮದು ಏನಿದೆ ಎಂದು ನಾನು ಹೇಳುತ್ತೇನೆ. ಎಲ್ಲವನ್ನೂ ಜನರ ಮುಂದೆಯೇ ಇಡೋಣ. ಅವರೇ ತೀರ್ಮಾನ ಮಾಡುತ್ತಾರೆ,” ಎಂದು ಡಿಕೆಶಿ ತಮ್ಮ ಸವಾಲನ್ನು ಪುನರುಚ್ಚರಿಸಿದರು.
ಒಟ್ಟಿನಲ್ಲಿ, ಡಿ.ಕೆ. ಶಿವಕುಮಾರ್ ಅವರ ಈ ನೇರ ಸವಾಲು ರಾಜ್ಯ ರಾಜಕೀಯದಲ್ಲಿನ ವಾಕ್ಸಮರವನ್ನು ಮತ್ತಷ್ಟು ತಾರಕಕ್ಕೇರಿಸಿದ್ದು, ಕುಮಾರಸ್ವಾಮಿ ಅವರು ಈ ಸವಾಲನ್ನು ಹೇಗೆ ಸ್ವೀಕರಿಸುತ್ತಾರೆ ಎಂಬುದನ್ನು ಕಾದು ನೋಡಬೇಕಿದೆ.
