ಅಮೆರಿಕದ ರಾಜಕೀಯ ವಲಯದಲ್ಲಿ ಸಂಚಲನ ಮೂಡಿಸಿರುವ ಉಪಾಧ್ಯಕ್ಷ ಅಭ್ಯರ್ಥಿ ಜೆಡಿ ವ್ಯಾನ್ಸ್, ತಮ್ಮ ವೈಯಕ್ತಿಕ ಬದುಕಿನ ಕುರಿತು ನೀಡಿದ ಹೇಳಿಕೆಯೊಂದರಿಂದ ಇದೀಗ ತೀವ್ರ ಚರ್ಚೆಗೆ ಗ್ರಾಸವಾಗಿದ್ದಾರೆ. ಭಾರತೀಯ ಮೂಲದ ಹಿಂದೂ ಮಹಿಳೆ ಉಷಾ ಅವರನ್ನು ವಿವಾಹವಾಗಿರುವ ವ್ಯಾನ್ಸ್, ತಮ್ಮ ಪತ್ನಿ ಕ್ರಿಶ್ಚಿಯನ್ ಧರ್ಮಕ್ಕೆ ಮತಾಂತರಗೊಳ್ಳಬೇಕು ಎಂಬ ಆಶಯವನ್ನು ಸಾರ್ವಜನಿಕವಾಗಿ ವ್ಯಕ್ತಪಡಿಸಿದ್ದು, ಇದು ಸಾಮಾಜಿಕ ಜಾಲತಾಣಗಳಲ್ಲಿ ವ್ಯಾಪಕ ಆಕ್ರೋಶಕ್ಕೆ ಕಾರಣವಾಗಿದೆ. ಟೀಕೆಗಳ ಸುರಿಮಳೆಯ ಬಳಿಕ ಇದೀಗ ಜೆಡಿ ವ್ಯಾನ್ಸ್ ಟ್ವೀಟ್ ಮೂಲಕ ಸ್ಪಷ್ಟನೆ ನೀಡಿದ್ದಾರೆ.
ವಿವಾದಕ್ಕೆ ಕಾರಣವಾದ ಹೇಳಿಕೆ ಏನು?
ಮಿಸ್ಸಿಸ್ಸಿಪ್ಪಿಯಲ್ಲಿ ನಡೆದ ‘ಟರ್ನಿಂಗ್ ಪಾಯಿಂಟ್ ಯುಎಸ್ಎ’ ಎಂಬ ಕಾರ್ಯಕ್ರಮದಲ್ಲಿ ಮಾತನಾಡಿದ ಜೆಡಿ ವ್ಯಾನ್ಸ್, ತಮ್ಮ ಅಂತರ್ಧರ್ಮೀಯ ವಿವಾಹದ ಬಗ್ಗೆ ಮಾತನಾಡುತ್ತಾ, “ನನ್ನ ಪತ್ನಿ ಉಷಾ ಹಿಂದೂ ಧರ್ಮದ ಹಿನ್ನೆಲೆಯವರು. ಆದರೆ, ಮುಂದೊಂದು ದಿನ ಆಕೆ ಕ್ರಿಶ್ಚಿಯನ್ ಸಂಪ್ರದಾಯಗಳನ್ನು ಮತ್ತು ನಂಬಿಕೆಗಳನ್ನು ಒಪ್ಪಿಕೊಳ್ಳುತ್ತಾಳೆ ಎಂಬ ಭರವಸೆ ನನಗಿದೆ,” ಎಂದು ಹೇಳಿದ್ದರು.
ಮಾತು ಮುಂದುವರಿಸಿದ ಅವರು, “ಇತ್ತೀಚಿನ ದಿನಗಳಲ್ಲಿ ಹೆಚ್ಚಿನ ಭಾನುವಾರಗಳಂದು ಉಷಾ ನನ್ನೊಂದಿಗೆ ಚರ್ಚ್ಗೆ ಬರುತ್ತಿದ್ದಾಳೆ. ಚರ್ಚ್ನಲ್ಲಿ ನಾನು ಪಡೆಯುವ ಅನುಭವ, ಅಲ್ಲಿನ ಬೋಧನೆಗಳಿಂದ ನಾನು ಹೇಗೆ ಪ್ರಭಾವಿತನಾಗಿದ್ದೇನೋ, ಅದೇ ರೀತಿ ನನ್ನ ಪತ್ನಿಯೂ ಪ್ರಭಾವಿತಳಾಗಬೇಕು ಎಂದು ನಾನು ಬಯಸುತ್ತೇನೆ. ಏಕೆಂದರೆ, ಕ್ರಿಶ್ಚಿಯನ್ ಧರ್ಮದ ತತ್ವಗಳಲ್ಲಿ ನನಗೆ ಅಚಲ ನಂಬಿಕೆಯಿದೆ ಮತ್ತು ನನ್ನ ಪತ್ನಿಯೂ ಅದನ್ನು ಅರಿಯಬೇಕು ಎಂಬುದು ನನ್ನ ಆಸೆ,” ಎಂದಿದ್ದರು.
ಇದೇ ವೇಳೆ, “ನಮ್ಮ ಅಂತರ್ಧರ್ಮೀಯ ವಿವಾಹವು ಪರಸ್ಪರ ಗೌರವ ಮತ್ತು ತಿಳುವಳಿಕೆಯ ಮೇಲೆ ನಿಂತಿದೆ. ನನ್ನ ಪತ್ನಿ ಬೇರೆ ನಂಬಿಕೆಯನ್ನು ಹೊಂದಿರುವುದು ನನಗೆ ಸಮಸ್ಯೆಯಲ್ಲ,” ಎಂದು ಹೇಳಿದ್ದರೂ, ಅವರ ಮತಾಂತರದ ಕುರಿತಾದ ನಿರೀಕ್ಷೆಯ ಮಾತುಗಳು ಅನೇಕರ ಕೆಂಗಣ್ಣಿಗೆ ಗುರಿಯಾಗಿತ್ತು.
ಸಾಮಾಜಿಕ ಜಾಲತಾಣಗಳಲ್ಲಿ ಟೀಕೆಗಳ ಸುರಿಮಳೆ
ಒಬ್ಬ ಜವಾಬ್ದಾರಿಯುತ ರಾಜಕೀಯ ನಾಯಕನಾಗಿ, ಅದರಲ್ಲೂ ಉಪಾಧ್ಯಕ್ಷ ಸ್ಥಾನದ ಅಭ್ಯರ್ಥಿಯಾಗಿ ತಮ್ಮ ಪತ್ನಿಯ ಧಾರ್ಮಿಕ ನಂಬಿಕೆಯ ಬಗ್ಗೆ ಸಾರ್ವಜನಿಕವಾಗಿ ಮಾತನಾಡಿ, ಮತಾಂತರದ ಆಶಯ ವ್ಯಕ್ತಪಡಿಸಿದ್ದು ತೀವ್ರ ವಿವಾದಕ್ಕೆ ಕಾರಣವಾಯಿತು. “ಇದು ವೈಯಕ್ತಿಕ ವಿಚಾರ, ಅದನ್ನು ಸಾರ್ವಜನಿಕವಾಗಿ ಮಾತನಾಡುವುದು ಸರಿಯಲ್ಲ”, “ಪತ್ನಿಯ ನಂಬಿಕೆಗೆ ಗೌರವ ಕೊಡುವುದನ್ನು ಕಲಿಯಿರಿ” ಎಂಬಂತಹ ಕಮೆಂಟ್ಗಳು ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡಿದವು.
ಟ್ವೀಟ್ ಮೂಲಕ ಸ್ಪಷ್ಟನೆ ನೀಡಿದ ವ್ಯಾನ್ಸ್
ತಮ್ಮ ಹೇಳಿಕೆ ದೊಡ್ಡ ವಿವಾದವಾಗುತ್ತಿದ್ದಂತೆ ಎಚ್ಚೆತ್ತ ಜೆಡಿ ವ್ಯಾನ್ಸ್, ತಮ್ಮ ಟ್ವಿಟರ್ ಖಾತೆಯಲ್ಲಿ ಸುದೀರ್ಘ ಪೋಸ್ಟ್ ಹಾಕಿ ಸಮರ್ಥನೆ ನೀಡಿದ್ದಾರೆ.
“ಮೊದಲನೆಯದಾಗಿ, ಕಾರ್ಯಕ್ರಮದಲ್ಲಿ ಕೇಳಲಾದ ಪ್ರಶ್ನೆಗೆ ನಾನು ಉತ್ತರಿಸಿದೆ. ನಾನು ಸಾರ್ವಜನಿಕ ವ್ಯಕ್ತಿಯಾಗಿರುವುದರಿಂದ ನನ್ನ ವೈಯಕ್ತಿಕ ಬದುಕಿನ ಬಗ್ಗೆ ಜನರಿಗೆ ಕುತೂಹಲವಿರುವುದು ಸಹಜ,” ಎಂದು ಅವರು ಆರಂಭಿಸಿದ್ದಾರೆ.
“ಎರಡನೆಯದಾಗಿ, ಕ್ರಿಶ್ಚಿಯನ್ ಧರ್ಮದ ಬೋಧನೆಗಳು ಸತ್ಯ ಮತ್ತು ಮನುಕುಲಕ್ಕೆ ಒಳ್ಳೆಯದು ಎಂದು ನಾನು ನಂಬುತ್ತೇನೆ. ನನ್ನ ಪತ್ನಿ ದೇವರು ನನಗೆ ಕೊಟ್ಟ ಅದ್ಭುತ ವರ. ಹಲವು ವರ್ಷಗಳ ಹಿಂದೆ ನನ್ನ ನಂಬಿಕೆಯನ್ನು ನಾನು ಮರಳಿ ಕಂಡುಕೊಳ್ಳಲು ಅವಳೇ ನನಗೆ ಪ್ರೇರಣೆ. ಆದರೆ, ಅವಳು ಕ್ರಿಶ್ಚಿಯನ್ ಅಲ್ಲ ಮತ್ತು ಮತಾಂತರಗೊಳ್ಳುವ ಯಾವುದೇ ಯೋಜನೆಯನ್ನೂ ಹೊಂದಿಲ್ಲ. ಯಾವುದೇ ಅಂತರ್ಧರ್ಮೀಯ ಸಂಬಂಧದಲ್ಲಿರುವಂತೆ, ಒಂದು ದಿನ ಅವಳು ನನ್ನ ದೃಷ್ಟಿಕೋನದಿಂದ ವಿಷಯಗಳನ್ನು ನೋಡಬಹುದು ಎಂದು ನಾನು ಭಾವಿಸುತ್ತೇನೆ. ಏನೇ ಆಗಲಿ, ನಾನು ಅವಳನ್ನು ಪ್ರೀತಿಸುವುದನ್ನು ಮತ್ತು ಬೆಂಬಲಿಸುವುದನ್ನು ಮುಂದುವರಿಸುತ್ತೇನೆ,” ಎಂದು ಸ್ಪಷ್ಟಪಡಿಸಿದ್ದಾರೆ.
“ಮೂರನೆಯದಾಗಿ, ಈ ರೀತಿಯ ಟೀಕೆಗಳು ಕ್ರಿಶ್ಚಿಯನ್ ವಿರೋಧಿ ಮತಾಂಧತೆಯನ್ನು ತೋರಿಸುತ್ತವೆ. ಹೌದು, ಕ್ರಿಶ್ಚಿಯನ್ನರಿಗೆ ನಂಬಿಕೆಗಳಿವೆ ಮತ್ತು ಅದನ್ನು ಇತರರೊಂದಿಗೆ ಹಂಚಿಕೊಳ್ಳಲು ನಾವು ಬಯಸುತ್ತೇವೆ. ಇದು ಅತ್ಯಂತ ಸಹಜವಾದ ವಿಷಯ,” ಎಂದು ತಮ್ಮ ನಿಲುವನ್ನು ಸಮರ್ಥಿಸಿಕೊಂಡಿದ್ದಾರೆ.
ಅಂದ ಹಾಗೆ, ಜೆಡಿ ವ್ಯಾನ್ಸ್ ಮತ್ತು ಉಷಾ ದಂಪತಿಗೆ ಮೂವರು ಮಕ್ಕಳಿದ್ದು, ಆ ಮಕ್ಕಳನ್ನು ಕ್ರಿಶ್ಚಿಯನ್ ಸಂಪ್ರದಾಯದಂತೆಯೇ ಬೆಳೆಸಲಾಗುತ್ತಿದೆ. ಈ ಘಟನೆಯು ಅಮೆರಿಕದಂತಹ ಬಹುಸಂಸ್ಕೃತಿಯ ದೇಶದಲ್ಲಿ ರಾಜಕೀಯ ನಾಯಕರ ವೈಯಕ್ತಿಕ ನಂಬಿಕೆಗಳು ಮತ್ತು ಸಾರ್ವಜನಿಕ ನಿರೀಕ್ಷೆಗಳ ನಡುವಿನ ಸೂಕ್ಷ್ಮ ಗೆರೆಯನ್ನು ಮತ್ತೊಮ್ಮೆ ಮುನ್ನೆಲೆಗೆ ತಂದಿದೆ.
