ಬಿಹಾರ ಚುನಾವಣಾ ಪ್ರಚಾರದ ಸಂದರ್ಭದಲ್ಲಿ ಉತ್ತರಪ್ರದೇಶದ ಮುಖ್ಯಮಂತ್ರಿ ಯೋಗಿ ಆದಿತ್ಯನಾಥ್ ಅವರು ಮಾಡಿದ ವ್ಯಂಗ್ಯಾತ್ಮಕ ಹೇಳಿಕೆ ಇದೀಗ ರಾಜಕೀಯ ವಲಯದಲ್ಲಿ ಭಾರೀ ಚರ್ಚೆಗೆ ಗ್ರಾಸವಾಗಿದೆ. ಇಂಡಿಯಾ ಮೈತ್ರಿಕೂಟದ ನಾಯಕರನ್ನು ಉದ್ದೇಶಿಸಿ ಅವರು ಬಿಹಾರ ರ್ಯಾಲಿಗೆ ಮೂರು ಮಂಗಗಳನ್ನು ಕರೆತಂದಿದ್ದಾರೆ ಎಂದು ಟೀಕಿಸಿದ್ದಾರೆ.
ಯೋಗಿ ಆದಿತ್ಯನಾಥ್ ಈ ಮೂರು ಮಂಗಗಳು ಪಪ್ಪು, ಟಪ್ಪು, ಅಪ್ಪು ಎಂದು ಹೇಳಿದ್ದಾರೆ.
ಪಪ್ಪು (ರಾಹುಲ್ ಗಾಂಧಿ) ಸತ್ಯವನ್ನು ಮಾತನಾಡುವುದೇ ಇಲ್ಲ.
ಟಪ್ಪು (ತೇಜಸ್ವಿ ಯಾದವ್) ಸತ್ಯವನ್ನು ನೋಡುವುದೇ ಇಲ್ಲ.
ಅಪ್ಪು (ಅಖಿಲೇಶ್ ಯಾದವ್) ಸತ್ಯವನ್ನು ಕೇಳಿಸಿಕೊಳ್ಳುವುದೇ ಇಲ್ಲ ಎಂಬ ಹೇಳಿಕೆ ಮೂಲಕ ಯೋಗಿ ಅವರು ವಿಪಕ್ಷ ನಾಯಕರ ವಿರುದ್ಧ ತೀವ್ರ ವ್ಯಂಗ್ಯ ಮಾಡಿದ್ದಾರೆ. ಅವರ ಪ್ರಕಾರ, ಈ ಮೂವರು ನಾಯಕರೂ ದೇಶದ ಜನತೆಗೆ ಸತ್ಯವನ್ನು ತೋರಿಸುತ್ತಿಲ್ಲ. ಅವರು ಪ್ರಚಾರ, ಪ್ರಚೋದನೆ ಮತ್ತು ಸುಳ್ಳಿನ ರಾಜಕೀಯದಲ್ಲಿ ತೊಡಗಿದ್ದಾರೆ.
ಯೋಗಿ ಮತ್ತಷ್ಟು ಕಟುವಾಗಿ ಟೀಕಿಸಿ, ವಿಪಕ್ಷ ನಾಯಕರು ರಾಜ್ಯದ ವ್ಯವಸ್ಥೆಯನ್ನು ಬಂದೂಕುಗಳಿಂದ ಕಲುಷಿತಗೊಳಿಸಿದ್ದಾರೆ. ಅವರ ಆಡಳಿತಕಾಲದಲ್ಲಿ ಅಪರಾಧ, ಭ್ರಷ್ಟಾಚಾರ ಮತ್ತು ಅಶಾಂತಿ ಹೆಚ್ಚಿತ್ತು, ಎಂದಿದ್ದಾರೆ.
ಈ ವಿರೋಧ ಪಕ್ಷದ ನಾಯಕರು ಎಲ್ಲರೂ ಹಿಂದೂ ವಿರೋಧಿಗಳು. ಇವರು ಧರ್ಮ ಮತ್ತು ಸಂಸ್ಕೃತಿಯನ್ನು ಹಾಸ್ಯವನ್ನಾಗಿ ಮಾಡಿದ್ದಾರೆ. ಆದರೆ ನಾವು ಹಿಂದೂ ಧರ್ಮದ ಗೌರವವನ್ನು ಕಾಪಾಡುವವರು, ಎಂದು ಅವರು ಹೇಳಿದ್ದಾರೆ.
ರಾಜಕೀಯ ವಲಯದಲ್ಲಿ ಚರ್ಚೆ:
ಯೋಗಿ ಆದಿತ್ಯನಾಥ್ ಅವರ ಈ ಹೇಳಿಕೆ ಬಿಹಾರ ಚುನಾವಣಾ ರ್ಯಾಲಿಗಳಲ್ಲಿ ಹೊಸ ಚರ್ಚೆ ಹುಟ್ಟಿಸಿದೆ. ಬಿಜೆಪಿ ಬೆಂಬಲಿಗರು ಇದನ್ನು ಸಾಮಾಜಿಕ ಜಾಲತಾಣಗಳಲ್ಲಿ ವ್ಯಾಪಕವಾಗಿ ಹಂಚಿಕೊಂಡಿದ್ದಾರೆ, ಆದರೆ ವಿರೋಧ ಪಕ್ಷದ ನಾಯಕರು ಯೋಗಿಯ ಹೇಳಿಕೆ ಅಸಭ್ಯ ಮತ್ತು ಅವಮಾನಕರ ಎಂದು ಪ್ರತಿಕ್ರಿಯಿಸಿದ್ದಾರೆ.
