IPL 2022 | ಜೋಸ್ ಬಟ್ಲರ್ ಅಬ್ಬರ.. ಥ್ರಿಲ್ಲಿಂಗ್ ಫೈಟ್ ನಲ್ಲಿ ಗೆದ್ದ ರಾಯಲ್ಸ್
ಭಾರಿ ಜಿದ್ದಾಜಿದ್ದಿನಿಂದ ಕೂಡಿದ್ದ ಪಂದ್ಯದಲ್ಲಿ ಡೆಲ್ಲಿ ಕ್ಯಾಪಿಟಲ್ಸ್ ವಿರುದ್ಧ ರಾಜಸ್ಥಾನ್ ರಾಯಲ್ಸ್ ತಂಡ ಗೆಲುವು ಸಾಧಿಸಿದೆ. ಇದರೊಂದಿಗೆ 10 ಅಂಕಗಳೊಂದಿಗೆ ರಾಜಸ್ಥಾನ್ ರಾಯಲ್ಸ್ ತಂಡ ಅಂಕಪಟ್ಟಿಯಲ್ಲಿ ಮೊದಲ ಸ್ಥಾನಕ್ಕೇರಿದೆ.
ಮುಂಬೈನ ವಾಂಖೆಡೆ ಸ್ಟೇಡಿಯಂನಲ್ಲಿ ನಡೆದ ಪಂದ್ಯದಲ್ಲಿ ಎರಡು ತಂಡಗಳು ಸಮಬಲದ ಕಾದಾಟ ನಡೆಸಿದವು. ಟಾಸ್‌ ಸೋತು ಮೊದಲು ಬ್ಯಾಟ್‌ ಮಾಡಿದ ರಾಜಸ್ಥಾನ್ ರಾಯಲ್ಸ್ 20 ಓವರ್‌ಗಳಲ್ಲಿ 2 ವಿಕೆಟ್ ನಷ್ಟಕ್ಕೆ 222 ರನ್ ಗಳಿಸಿತು.ಈ ಸವಾಲಿನ ಮೊತ್ತವನ್ನ ಎದುರಿಸಿದ ಡೆಲ್ಲಿ ಕ್ಯಾಪಿಟಲ್ಸ್, ಕೊನೆ ಹಂತದವರೆಗೂ ಗೆಲುವಿಗಾಗಿ ಹೋರಾಟ ನಡೆಸಿದರು. ಆದ್ರೆ 20 ಓವರ್‌ಗಳಲ್ಲಿ 8 ವಿಕೆಟ್ ಕಳೆದುಕೊಂಡು 207 ರನ್‌ಗಳಿಸುವ ಮೂಲಕ 15 ರನ್‌ಗಳ ಸೋಲೊಪ್ಪಿಕೊಂಡಿತು.
223 ರನ್‌ಗಳ ಕಠಿಣ ಟಾರ್ಗೆಟ್‌ ಬೆನ್ನತ್ತಿದ ಡೆಲ್ಲಿ ಕ್ಯಾಪಿಟಲ್ಸ್ ತಂಡಕ್ಕೆ ಉತ್ತಮ ಆರಂಭಿ ಸಿಕ್ತು. ವಾರ್ನರ್ 28 ರನ್, ಪೃಥ್ವಿ ಶಾ 37 ರನ್ ಗಳಿಸಿದರು. ಆದರೆ ನಂತರ ಬಂದ ಸರ್ಫರಾಜ್‌ ಖಾನ್‌ 1 ರನ್ ಗೆ ಪೆವಿಲಿಯನ್ ಸೇರಿಕೊಂಡರು. ಈ ಹಂತದಲ್ಲಿ ಜೊತೆಯಾದ ರಿಷಬ್ ಪಂತ್ ಮತ್ತು ಲಲಿತ್ ಯಾದವ್ ಜವಾಬ್ದಾರಿಯುತ ಆಟವಾಡಿದರು. ಆದ್ರೆ ಪಂತ್ ಹೋರಾಟ 44 ರನ್ ಗಳಿಗೆ ಮುಕ್ತಾಯವಾಯ್ತು. ಲಲಿತ್ ಯಾದವ್ ಆಟ 37 ರನ್ ಗಳಿಗೆ ಕೊನೆಗೊಂಡಿತು. ಅಕ್ಷರ್ ಪಟೇಲ್, ಶರ್ದೂಲ್ ಠಾಕೂರ್ ಬೇಗ ಪೆವಿಲಿಯನ್ ಸೇರಿಕೊಂಡರು.
ಆದ್ರೆ ಕೊನೆಯ ಓವರ್ ನಲ್ಲಿ ಡೆಲ್ಲಿಗೆ ಗೆಲ್ಲಲು 36 ರನ್ ಗಳ ಅವಶ್ಯಕತೆ ಇತ್ತು. ಒಬೆಡ್ ಮೆಕಾಯ್ ಮಾಡಿದ 20ನೇ ಓವರ್ ನಲ್ಲಿ ಮೊದಲ ಮೂರು ಎಸೆತಗಳಿಗೆ ಪೋವಲ್ ಮೂರು ಸಿಕ್ಸರ್ ಸಿಡಿಸಿದರು. ಈ ಹಂತದಲ್ಲಿ ನೋ ಬಾಲ್ ಕುರಿತಂತೆ ಕೆಲ ಸಮಯ ಗೊಂದಲ ಉಂಟಾಯ್ತು. ಅಂತಿಮವಾಗಿ ಡೆಲ್ಲಿ ಕ್ಯಾಪಿಟಲ್ಸ್ ತಂಡ 207 ರನ್ ಗಳಿಗೆ ಹೋರಾಟ ಅಂತ್ಯಗೊಳಿಸಿತು.
ರಾಜಸ್ಥಾನ್ ರಾಯಲ್ಸ್ ಪರ ಪ್ರಸಿದ್ಧ್‌ ಕೃಷ್ಣ ಮೂರು ವಿಕೆಟ್ ಪಡೆದರು. ರವಿಚಂದ್ರನ್‌ ಅಶ್ವಿನ್‌ 2 ವಿಕೆಟ್ ಪಡೆದರು.
ಇದಕ್ಕೂ ಮೊದಲು ಟಾಸ್‌ ಸೋತು ಬ್ಯಾಟಿಂಗ್‌ ಅವಕಾಶ ಪಡೆದ ರಾಜಸ್ಥಾನ್ ಪರ ಆರಂಭಿಕರಾಗಿ ಕಣಕ್ಕಿಳಿದ ಜಾಸ್ ಬಟ್ಲರ್ ಈ ಆವೃತ್ತಿಯ ಮೂರನೇ ಶತಕ ಸಿಡಿಸಿದರು. 65 ಎಸೆತಗಳಲ್ಲಿ ಬಟ್ಲರ್ 116 ರನ್ ಗಳಿಸಿದರು. ಇವರಿಗೆ ಉತ್ತಮ ಸಾಥ್‌ ನೀಡಿದ ದೇವದತ್‌ ಪಡಿಕ್ಕಲ್‌ 54 ರನ್ ಮೂಲಕ ಅರ್ಧಶತಕ ಬಾರಿಸಿ ಮಿಂಚಿದರು. ಇವರಿಬ್ಬರು ಮೊದಲ ವಿಕೆಟ್ ಗೆ 155 ರನ್ ಭರ್ಜರಿ ಆರಂಭ ಒದಗಿಸಿದರು. ನಂತರ ಬಂದ ನಾಯಕ ಸಂಜೂ ಸ್ಯಾಮ್ಸನ್‌ 46* ರನ್ ಮೂಲಕ ತಂಡದ ಮೊತ್ತವನ್ನ 222ಕ್ಕೆ ಏರಿಸಿದರು.
