ಪಾಕಿಸ್ತಾನ ವಿರುದ್ಧ ಹೋರಾಡಿ ಸೋತ ನಮಿಬಿಯಾ, ಕ್ರಿಕೆಟ್ ಶಿಶುವ ಆಟಕ್ಕೆ ಶಹಬ್ಬಾಸ್ ಎನ್ನುತ್ತಿದೆ ಕ್ರಿಕೆಟ್ ವಲಯ
ಅಬುಧಾಭಿಯಲ್ಲಿ ನಮಿಬಿಯಾ ವಿರುದ್ಧ ಪಾಕಿಸ್ತಾನ 45 ರನ್ಗಳಿಂದ ಗೆದ್ದಿರಬಹುದು. ಆದರೆ ಮನ ಗೆದ್ದಿದ್ದು ಕ್ರಿಕೆಟ್ ಶಿಶು ನಮಬಿಯಾ ತಂಡದ ಸಾಂಘೀಕ ಆಟ. ಅನುಭವವನ್ನು ಬಳಸಿಕೊಂಡು ಬಲಿಷ್ಠ ಪಾಕಿಸ್ತಾನ ಪಂದ್ಯ ಗೆದ್ದರೂ ನಮಿಬಿಯಾ ನೀಡಿದ ಹೋರಾಟ ಮಾತ್ರ ಅದ್ಭುತ.
ಟಾಸ್ ಗೆದ್ದ ಪಾಕಿಸ್ತಾನ ಬ್ಯಾಟಿಂಗ್ ಆರಿಸಿಕೊಂಡಿತ್ತು. ಮೊದಲ 10 ಓವರುಗಳಲ್ಲಿ ನಮಿಬಿಯಾ ವಿಕೆಟ್ ಪಡೆಯದೇ ಇದ್ದರೂ ಪಾಕಿಸ್ತಾನವನ್ನು ಕಟ್ಟಿಹಾಕಿತ್ತು. ನಾಯಕ ಬಾಬರ್ ಅಜಂ 49 ಎಸೆತಗಳಲ್ಲಿ 70 ರನ್ ಸಿಡಿಸಿ ಮೊದಲಿಗರಾಗಿ ಔಟಾದರು. ಫಖರ್ ಜಮಾನ್ 5 ರನ್ಗಳಿಸಿ ನಿರಾಸೆ ಅನುಭವಿಸಿದರು. ಆದರೆ ಇನ್ನಿಂಗ್ಸ್ ಆರಂಭಿಸಿದ ರಿಜ್ವಾನ್ ಕೊನೆ ಕೊನೆಯಲ್ಲಿ ಲಯ ಕಂಡುಕೊಂಡರು. ಇವರಿಗೆ ಹಫೀಜ್ ಕೂಡ ಸಾಥ್ ನೀಡಿದರು. ರಿಜ್ವಾನ್ 50 ಎಸೆತಗಳಲ್ಲಿ ಅಜೇಯ 79 ರನ್ ಸಿಡಿಸಿದರೆ ಹಫೀಝ್ 16 ಎಸೆತಗಳಲ್ಲಿ 32 ರನ್ಗಳಿಸಿ ಅಜೇಯರಾಗುಳಿದರು. 20 ಓವರುಗಳಲ್ಲಿ ಪಾಕಿಸ್ತಾನ 2 ವಿಕೆಟ್ ಕಳೆದುಕೊಂಡು 189 ರನ್ಗಳಿಸಿತು.
ದೊಡ್ಡ ಗುರಿ ನಮಬಿಯಾ ಪಾಲಿಗೆ ಕಷ್ಟವೇ ಆಗಿತ್ತು. ಹಸನ್ ಅಲಿ ವಾನ್ ಲಿಂಜನ್ ವಿಕೆಟ್ ಪಡೆದು ಬ್ರೇಕ್ ನೀಡಿದರು. ನಾಯಕ ಗೆರಾಲ್ಡ್ ಎರಾಸ್ಮಸ್ 15 ರನ್ಗಳಿಸಿ ನಿರ್ಗಮಿಸಿದರು. ಈ ಹಂತದಲ್ಲಿ ಜೊತೆಯಾದ ಕ್ರೆಗ್ ವಿಲಿಯಮ್ಸ್ ಮತ್ತು ಡೇವಿಡ್ ವೀಸ್ ತಂಡವನ್ನು ಗೆಲ್ಲಿಸಬೇಕು ಅನ್ನುವುದಕ್ಕಿಂತಲೂ ಪಾಕ್ ಬೌಲರ್ಗಳಿಗೆ ವಿಕೆಟ್ ಕೊಡಬಾರದು ಅನ್ನುವ ಹಾಗೆ ಆಡಿದರು. ವಿಲಿಯಮ್ಸ್ 40 ರನ್ಗಳಿಸಿ ಔಟಾದರೆ ವೀಸ್ 43 ರನ್ಗಳಿಸಿ ಅಜೇಯರಾಗುಳಿದರು. 20 ಓವರುಗಳಲ್ಲಿ ನಮೀಬಿಯಾ 5 ವಿಕೆಟ್ ಕಳೆದುಕೊಂಡು 144 ರನ್ಗಳಿಸಿ ಪಂದ್ಯ ಸೋತಿತು. ಆದರೆ ನಮಿಬಿಯಾ ನೀಡಿದ ಹೋರಾಟ ಸೋಲಿನಲ್ಲೂ ಗಮನ ಸೆಳೆದಿದ್ದು ಸುಳ್ಳಲ್ಲ.