ಬಾಲಿವುಡ್‌ನಲ್ಲಿ ಈಗಾಗಲೇ ಹಲವು ಬಯೋಪಿಕ್ ಚಿತ್ರಗಳು ಬಂದಿದ್ದು, ಈಗ ಯೋಗಿ ಆದಿತ್ಯನಾಥ್ ಅವರ ಜೀವನಚರಿತ್ರೆಯನ್ನೂ ಸಿನಿಮಾವಾಗಿ ತರುವ ಯೋಜನೆ ಹೊರಬಿದ್ದಿದೆ. ಈ ಬಯೋಪಿಕ್ ಚಿತ್ರಕ್ಕೆ “ಅಜೇ: ದಿ ಅನ್‌ಟೋಲ್ಡ್ ಸ್ಟೋರಿ ಆಫ್ ಎ ಯೋಗಿ” (Ajey: The Untold Story of a Yogi) ಎಂಬ ಶೀರ್ಷಿಕೆ ನೀಡಲಾಗಿದೆ.
ಮಧ್ಯಮ ವರ್ಗದ ಹುಡುಗನೊಬ್ಬ ಮುಖ್ಯಮಂತ್ರಿಯಾಗುವ ಯಶೋಗಾಥೆ ಹೊಂದಿರುವ ಈ ಸಿನಿಮಾದಲ್ಲಿ, ಅನಂತ್ ಜೋಶಿ ಯೋಗಿ ಆದಿತ್ಯನಾಥ್ ಅವರ ಪಾತ್ರವನ್ನು ನಿರ್ವಹಿಸಲಿದ್ದಾರೆ. ರವೀಂದ್ರ ಗೌಮ್ ನಿರ್ದೇಶನದ ಈ ಚಿತ್ರ ಶಾಂತನು ಗುಪ್ತಾ ಅವರ ದಿ ಮಾಂಕ್ ಹೂ ಬಿಕಮ್ ಚೀಫ್ ಮಿನಿಸ್ಟರ್ (The Monk Who Became Chief Minister) ಎಂಬ ಪ್ರಸಿದ್ಧ ಪುಸ್ತಕವನ್ನು ಆಧರಿಸಿದೆ.
ಈ ಸಿನಿಮಾದ ಮೋಷನ್ ಪೋಸ್ಟರ್ ಈಗಾಗಲೇ ಬಿಡುಗಡೆಯಾಗಿದ್ದು, ಅನಂತ್ ಜೋಶಿ ಅವರ ಲುಕ್ ಗಮನ ಸೆಳೆದಿದೆ. ಯೋಗಿ ಆದಿತ್ಯನಾಥ್ ಅವರ ಮೂಲ ಹೆಸರು ಅಜಯ್ ಸಿಂಗ್ ಬಿಶ್ತ್ ಆಗಿರುವುದರಿಂದ, ಈ ಚಿತ್ರಕ್ಕೆ ಅಜೇ ಎಂಬ ಶೀರ್ಷಿಕೆ ಇಡಲಾಗಿದೆ.
2025ರಲ್ಲಿ ಚಿತ್ರಮಂದಿರಗಳಲ್ಲಿ ಬಿಡುಗಡೆಯಾಗಲಿದ್ದು, ಹಿಂದಿ, ತೆಲುಗು, ತಮಿಳು, ಕನ್ನಡ ಮತ್ತು ಮಲಯಾಳಂ ಭಾಷೆಗಳಲ್ಲಿ ಪ್ರದರ್ಶನ ಕಾಣಲಿದೆ. ಅನಂತ್ ಜೋಶಿ ಮುಖ್ಯಪಾತ್ರದಲ್ಲಿರುವ ಈ ಚಿತ್ರದಲ್ಲಿ ಪರೇಶ್ ರಾವಲ್, ದಿನೇಶ್ ಲಾಲ್ ಯಾದವ್ (ನಿರಾಹುವಾ), ಅಜಯ್ ಮೆಂಗಿ, ಪವನ್ ಮಲ್ಹೋತ್ರಾ, ಗರಿಮಾ ಸಿಂಗ್, ರಾಜೇಶ್ ಖಟ್ಟರ್ ಮುಂತಾದವರು ಪ್ರಮುಖ ಪಾತ್ರಗಳಲ್ಲಿ ನಟಿಸಲಿದ್ದಾರೆ.
ಈ ಚಿತ್ರಕ್ಕೆ ಮೀಟ್ ಬ್ರದರ್ಸ್ ಸಂಗೀತ ನೀಡಿದರೆ, ಛಾಯಾಗ್ರಹಣಕ್ಕಾಗಿ ವಿಷ್ಣು ರಾವ್, ನಿರ್ಮಾಣ ವಿನ್ಯಾಸಕ್ಕಾಗಿ ಉದಯ್ ಪ್ರಕಾಶ್ ಸಿಂಗ್, ನಿರ್ಮಾಣದ ಹೊಣೆಗಾರಿಕೆ ದಿಲೀಪ್ ಬಚ್ಚನ್ ಝಾ ಮತ್ತು ಪ್ರಿಯಾಂಕ್ ದುಬೆ ವಹಿಸಿಕೊಂಡಿದ್ದಾರೆ.
ಈ ಬಯೋಪಿಕ್ ಸಿನಿಮಾ ಯೋಗಿ ಆದಿತ್ಯನಾಥ್ ಅವರ ಜೀವನದ ಅಪರೂಪದ ಪಯಣವನ್ನು ತೆರೆ ಮೇಲೆ ಹೇಗೆ ನಿರೂಪಿಸಲಿದೆ ಎಂದು ಕಾದು ನೋಡಬೇಕು.
