ಬೆಂಗಳೂರು: ರಾಜ್ಯದ ಅತ್ಯಂತ ಕುಖ್ಯಾತ ಹಾಗೂ ಹೈಪ್ರೊಫೈಲ್ ಕೈದಿಗಳ ತಾಣ ಎಂದೇ ಕರೆಯಲ್ಪಡುವ ಪರಪ್ಪನ ಅಗ್ರಹಾರ ಕೇಂದ್ರ ಕಾರಾಗೃಹದಲ್ಲಿ ಇದೀಗ ಅಲ್ಲೋಲ ಕಲ್ಲೋಲ ಸೃಷ್ಟಿಯಾಗಿದೆ. ಇಷ್ಟು ದಿನ ಜೈಲನ್ನು ರೆಸಾರ್ಟ್ನಂತೆ ಬಳಸಿಕೊಂಡು ಮೋಜು ಮಸ್ತಿ ಮಾಡುತ್ತಿದ್ದ ಕೈದಿಗಳಿಗೆ ಖಡಕ್ ಅಧಿಕಾರಿಗಳು ಬಿಸಿ ಮುಟ್ಟಿಸಿದ್ದು, ಜೈಲಿನಲ್ಲಿ ನಿಜವಾದ ಶಿಸ್ತಿನ ಪರ್ವ ಆರಂಭವಾಗಿದೆ. ‘ಫೈವ್ಸ್ಟಾರ್ ಜೈಲು’ ಎಂಬ ಅಪಖ್ಯಾತಿಯನ್ನು ತೊಲಗಿಸಲು ಅಧಿಕಾರಿಗಳು ಸಮರ ಸಾರಿದ್ದಾರೆ.
ರೆಸಾರ್ಟ್ ಲೈಫ್ಗೆ ಬಿತ್ತು ಬ್ರೇಕ್
ಕಳೆದ ಕೆಲವು ವರ್ಷಗಳಿಂದ ಪರಪ್ಪನ ಅಗ್ರಹಾರ ಜೈಲು ಕೈದಿಗಳ ಪಾಲಿಗೆ ಶಿಕ್ಷೆಯ ತಾಣವಾಗಿರದೆ, ಸುಖಭೋಗದ ಕೇಂದ್ರವಾಗಿತ್ತು ಎಂಬುದು ಗುಟ್ಟಾಗಿಯೇನು ಉಳಿದಿರಲಿಲ್ಲ. ಹಣವಿದ್ದರೆ ಜೈಲಿನೊಳಗೆ ರಾಜಾತಿಥ್ಯ ಸಿಗುತ್ತಿತ್ತು. ಮೊಬೈಲ್, ಗಾಂಜಾ, ಸಿಗರೇಟು, ಹೊರಗಿನ ಊಟ, ಮಲಗಲು ಐಷಾರಾಮಿ ಬೆಡ್ಗಳು ಸೇರಿದಂತೆ ಸಕಲ ಸೌಲಭ್ಯಗಳು ಕೈದಿಗಳ ಕಾಲ ಬುಡಕ್ಕೆ ಬಂದು ಬೀಳುತ್ತಿದ್ದವು. ಆದರೆ, ಈ ‘ಗೋಲ್ ಮಾಲ್’ ದರ್ಬಾರ್ಗೆ ಇದೀಗ ತೆರೆ ಬಿದ್ದಿದೆ. ಜೈಲಿನ ಒಳಾಂಗಣ ಈಗ ಸಂಪೂರ್ಣ ಬದಲಾಗಿದ್ದು, ನಿಯಮ ಮೀರಿ ನಡೆಯುತ್ತಿದ್ದ ಅಕ್ರಮಗಳಿಗೆ ಕಡಿವಾಣ ಬಿದ್ದಿದೆ.
ಖಾಕಿ ಕದರ್ ತೋರಿಸಿದ ಅಧಿಕಾರಿಗಳು
ಜೈಲಿನ ಅಕ್ರಮಗಳಿಗೆ ಶಾಶ್ವತ ಪರಿಹಾರ ಕಂಡುಕೊಳ್ಳುವ ನಿಟ್ಟಿನಲ್ಲಿ ಸರ್ಕಾರ ಕೈಗೊಂಡ ದಿಟ್ಟ ನಿರ್ಧಾರದ ಫಲವಾಗಿ, ಕಾರಾಗೃಹ ಇಲಾಖೆಯ ಡಿಜಿಪಿಯಾಗಿ ಅಲೋಕ್ ಕುಮಾರ್ ಹಾಗೂ ಜೈಲು ಅಧೀಕ್ಷಕರಾಗಿ ಐಪಿಎಸ್ ಅಧಿಕಾರಿ ಅನ್ಶುಕುಮಾರ್ ಅವರು ಅಧಿಕಾರ ವಹಿಸಿಕೊಂಡರು. ಈ ಇಬ್ಬರು ದಕ್ಷ ಅಧಿಕಾರಿಗಳ ಎಂಟ್ರಿ ಆಗುತ್ತಿದ್ದಂತೆಯೇ ಜೈಲಿನ ಚಿತ್ರಣ ಬದಲಾಗಿದೆ. ಅಧಿಕಾರಿಗಳಿಬ್ಬರು ಚಾರ್ಜ್ ತೆಗೆದುಕೊಂಡ ಮರುಕ್ಷಣವೇ ಭ್ರಷ್ಟ ವ್ಯವಸ್ಥೆಯ ವಿರುದ್ಧ ಸಮರ ಸಾರಿದ್ದಾರೆ. ಕೇವಲ ಆದೇಶ ನೀಡದೆ ಖುದ್ದು ಫೀಲ್ಡಿಗಿಳಿದು ಪರಿಶೀಲನೆ ನಡೆಸುತ್ತಿರುವುದು ಕೈದಿಗಳ ನಿದ್ದೆಗೆಡಿಸಿದೆ.
ಎರಡು ಟ್ರ್ಯಾಕ್ಟರ್ ಲೋಡ್ಗಳಷ್ಟು ಅಕ್ರಮ ವಸ್ತುಗಳ ಸೀಜ್
ಅಧಿಕಾರಿಗಳ ಖಡಕ್ ಸೂಚನೆಯ ಮೇರೆಗೆ ಜೈಲು ಸಿಬ್ಬಂದಿಗಳು ಇತ್ತೀಚೆಗೆ ನಡೆಸಿದ ದಿಢೀರ್ ದಾಳಿ (ರೇಡ್) ಕೈದಿಗಳನ್ನು ಕಂಗಾಲಾಗಿಸಿದೆ. ಪ್ರತಿ ಬ್ಯಾರಕ್ ಹಾಗೂ ಸೆಲ್ಗಳನ್ನು ಜಾಲಾಡಿದ ಸಿಬ್ಬಂದಿಗಳು, ಅಲ್ಲಿ ಅನಧಿಕೃತವಾಗಿ ಸಂಗ್ರಹಿಸಿಡಲಾದ ವಸ್ತುಗಳನ್ನು ಕಂಡು ದಂಗಾಗಿದ್ದಾರೆ. ಕೈದಿಗಳು ತಮ್ಮ ಕೋಣೆಗಳನ್ನು ಮನೆಯಂತೆ ಮಾಡಿಕೊಂಡು ಅಡುಗೆ ಪಾತ್ರೆಗಳು, ಸ್ಟೌವ್ಗಳು, ಡಜನ್ಗಟ್ಟಲೆ ಬೆಡ್ಶೀಟ್ಗಳು, ದಿಂಬುಗಳು, ಐಷಾರಾಮಿ ಚೇರ್ಗಳು, ಎಲೆಕ್ಟ್ರಾನಿಕ್ ವಸ್ತುಗಳನ್ನು ಇಟ್ಟುಕೊಂಡಿದ್ದರು.
ಈ ಕಾರ್ಯಾಚರಣೆಯಲ್ಲಿ ವಶಪಡಿಸಿಕೊಳ್ಳಲಾದ ವಸ್ತುಗಳ ಪ್ರಮಾಣ ಎಷ್ಟಿತ್ತೆಂದರೆ, ಅವುಗಳನ್ನು ಸಾಗಿಸಲು ಎರಡು ಟ್ರ್ಯಾಕ್ಟರ್ಗಳು ಬೇಕಾದವು! ಜೈಲು ಆವರಣದಲ್ಲಿ ಬಕೆಟ್ಗಳು, ಪಾತ್ರೆಗಳು, ಬಟ್ಟೆಬರೆಗಳು ಮತ್ತು ಚೇರ್ಗಳ ದೊಡ್ಡ ರಾಶಿಯೇ ಬಿದ್ದಿದ್ದು, ಇದು ಜೈಲಿನಲ್ಲಿ ಇಷ್ಟು ದಿನ ನಡೆದಿದ್ದ ಅರಾಜಕತೆಗೆ ಸಾಕ್ಷಿಯಾಗಿದೆ. ಈ ಎಲ್ಲಾ ವಸ್ತುಗಳನ್ನು ಮುಲಾಜಿಲ್ಲದೆ ಜೈಲಿನ ಆವರಣದಲ್ಲಿ ಡಂಪ್ ಮಾಡಲಾಗಿದೆ.
ಅಕ್ರಮಕ್ಕೆ ಸಹಕರಿಸುವ ಸಿಬ್ಬಂದಿಗೂ ಎಚ್ಚರಿಕೆ
ಕೇವಲ ಕೈದಿಗಳಲ್ಲದೆ, ಇಷ್ಟು ದಿನ ಕೈದಿಗಳಿಂದ ಲಂಚ ಪಡೆದು ಅವರಿಗೆ ರಾಜಾತಿಥ್ಯ ನೀಡುತ್ತಿದ್ದ ಭ್ರಷ್ಟ ಜೈಲು ಸಿಬ್ಬಂದಿಗಳಿಗೂ ಅಧಿಕಾರಿಗಳು ಖಡಕ್ ವಾರ್ನಿಂಗ್ ನೀಡಿದ್ದಾರೆ. ಇನ್ನು ಮುಂದೆ ಯಾವುದೇ ಅಕ್ರಮ ಕಂಡುಬಂದಲ್ಲಿ ನೇರವಾಗಿ ಅಮಾನತು ಶಿಕ್ಷೆ ಎದುರಿಸಬೇಕಾಗುತ್ತದೆ ಎಂದು ಎಚ್ಚರಿಸಲಾಗಿದೆ. ಹೀಗಾಗಿ ಜೈಲು ಸಿಬ್ಬಂದಿಗಳು ಕೂಡ ಮೈಯೆಲ್ಲಾ ಕಣ್ಣಾಗಿ ಕೆಲಸ ಮಾಡುವಂತಾಗಿದೆ.
ಒಟ್ಟಿನಲ್ಲಿ, ಪರಪ್ಪನ ಅಗ್ರಹಾರ ಜೈಲು ಎಂದರೆ ‘ದುಡ್ಡಿದ್ದವನಿಗೆ ದರ್ಬಾರ್’ ಎನ್ನುವ ಕಾಲ ಮುಗಿದಿದೆ. ಹೊಸ ಅಧಿಕಾರಿಗಳ ಬಿಗಿ ಕ್ರಮಗಳಿಂದಾಗಿ ಜೈಲು ಈಗ ನಿಜವಾದ ಅರ್ಥದಲ್ಲಿ ಸುಧಾರಣಾ ಕೇಂದ್ರವಾಗುವ ಲಕ್ಷಣಗಳು ಕಾಣಿಸುತ್ತಿವೆ. ಮುಂದಿನ ದಿನಗಳಲ್ಲಿ ಈ ಶಿಸ್ತು ಹೀಗೆಯೇ ಮುಂದುವರಿಯಲಿದೆಯೇ ಎಂಬುದು ಕುತೂಹಲ ಮೂಡಿಸಿದೆ.
