ಸ್ಯಾಂಡಲ್ ವುಡ್ ನಟ ದರ್ಶನ್ ತೂಗುದೀಪ ಅವರು ರೇಣುಕಾಸ್ವಾಮಿ ಕೊಲೆ ಪ್ರಕರಣದಲ್ಲಿ ಈಗಾಗಲೇ ಜೈಲು ಪಾಲಾಗಿದ್ದು, ಸಂಕಷ್ಟಗಳ ಸರಮಾಲೆಯಲ್ಲೇ ಸಿಲುಕಿದ್ದಾರೆ. ಆದರೆ, ಇದೀಗ ಅವರ ಆಪ್ತ ವಲಯದಲ್ಲೇ ಭುಗಿಲೆದ್ದಿರುವ ಬೆಂಕಿ ಜೈಲಿನ ಗೋಡೆಗಳನ್ನು ಮೀರಿ ಹೊರಬರುತ್ತಿದೆ. ದರ್ಶನ್ ಅವರ ಪತ್ನಿ ವಿಜಯಲಕ್ಷ್ಮಿ ಮತ್ತು ನಟ ಧನ್ವೀರ್ ಗೌಡ ನಡುವಿನ ಹಣಕಾಸಿನ ಕಿತ್ತಾಟ ಮತ್ತು ವೈರಲ್ ಆಡಿಯೋ ವಿಚಾರ ದರ್ಶನ್ ಅವರನ್ನು ಕೆರಳಿಸಿದೆ. ಪರಪ್ಪನ ಅಗ್ರಹಾರದ ಜೈಲಿನಲ್ಲಿ ತನ್ನನ್ನು ಭೇಟಿ ಮಾಡಲು ಬಂದಿದ್ದ ನಟ ಝೈದ್ ಖಾನ್ ಮತ್ತು ಪತ್ನಿ ವಿಜಯಲಕ್ಷ್ಮಿ ಅವರ ಮುಂದೆ ದರ್ಶನ್ ಬೆಂಕಿ ಉಗುಳಿದ್ದು, ಧನ್ವೀರ್ ಗೆ ನೇರ ಎಚ್ಚರಿಕೆ ನೀಡಿದ್ದಾರೆ ಎಂಬ ಸ್ಫೋಟಕ ಮಾಹಿತಿ ಹೊರಬಿದ್ದಿದೆ.
ನನ್ನ ಪತ್ನಿ ಮತ್ತು ನನ್ನ ಕುಟುಂಬದ ಬಗ್ಗೆ ಮಾತನಾಡಲು ಈ ಧನ್ವೀರ್ ಗೆ ಯಾವ ಹಕ್ಕಿದೆ? ಅವನ್ಯಾರೋ ನನ್ನ ಮನೆಯ ವಿಚಾರದ ಬಗ್ಗೆ ಚರ್ಚಿಸಲು? ಎಂದು ದರ್ಶನ್ ಘರ್ಜಿಸಿದ್ದಾರೆ ಎಂದು ಝೈದ್ ಖಾನ್ ಮಾಧ್ಯಮಗಳ ಮುಂದೆ ಹೇಳಿಕೆ ನೀಡಿದ್ದಾರೆ. ಅಷ್ಟೇ ಅಲ್ಲದೆ, ಧಮ್ ಇದ್ದರೆ ನಾನು ಜೈಲಿನಿಂದ ಹೊರಗೆ ಬಂದ ಮೇಲೆ ನನ್ನ ಎದುರು ಬಂದು ಮಾತನಾಡಲಿ ಎಂದು ಸವಾಲು ಹಾಕುವ ಮೂಲಕ ದರ್ಶನ್ ಹಳೆ ದರ್ಪವನ್ನು ಪ್ರದರ್ಶಿಸಿದ್ದಾರೆ. ತನ್ನ ಕುಟುಂಬದ ಗೌರವಕ್ಕೆ ಧಕ್ಕೆ ತರುತ್ತಿರುವವರ ವಿರುದ್ಧ ಕಾನೂನು ಸಮರ ಸಾರಲು ವಕೀಲರಿಗೆ ಸೂಚನೆ ನೀಡಿದ್ದಾರೆ.
ಈ ವಿವಾದದ ಬಗ್ಗೆ ಬೆಳಕು ಚೆಲ್ಲಿದ ಝೈದ್ ಖಾನ್, ವಿಜಯಲಕ್ಷ್ಮಿ ಅವರು ಯಾರ ಬಳಿಯೂ ಸಹಾಯ ಕೇಳಲು ಹೋಗಿರಲಿಲ್ಲ. ಧನ್ವೀರ್ ತಾನಾಗಿಯೇ ಬಂದು ಸಹಾಯ ಮಾಡುವ ನಾಟಕವಾಡಿ, ಈಗ ಅಕ್ಕನ ಹೆಸರನ್ನು ಹಾಳು ಮಾಡಲು ಸಂಚು ರೂಪಿಸುತ್ತಿದ್ದಾನೆ. ಬೇಕೆಂದೇ ವಿಡಿಯೋ ಮತ್ತು ಆಡಿಯೋಗಳನ್ನು ಬಿಡುಗಡೆ ಮಾಡಿ ಬ್ಲಾಕ್ ಮೇಲ್ ತಂತ್ರ ಅನುಸರಿಸುತ್ತಿದ್ದಾನೆ ಎಂದು ಗಂಭೀರ ಆರೋಪ ಮಾಡಿದ್ದಾರೆ. ಇದು ಕೇವಲ ಹಣದ ವಿಚಾರವಲ್ಲ, ಒಬ್ಬ ನಟನ ಸಂಕಷ್ಟದ ಸಮಯವನ್ನು ಬಳಸಿಕೊಂಡು ಬೆನ್ನಿಗೆ ಚೂರಿ ಹಾಕುವ ಕೆಲಸ ಎಂದು ಅವರು ಆಕ್ರೋಶ ಹೊರಹಾಕಿದ್ದಾರೆ.
ಆದರೆ, ಜೈಲಿನಿಂದಲೇ ದರ್ಶನ್ ನೀಡಿದ್ದಾರೆ ಎನ್ನಲಾದ ಈ ಎಚ್ಚರಿಕೆ ಅವರಿಗೆ ಕಾನೂನಾತ್ಮಕವಾಗಿ ಉರುಳಾಗುವ ಸಾಧ್ಯತೆಯೂ ಇದೆ. ಈಗಾಗಲೇ ಕೊಲೆ ಪ್ರಕರಣದಲ್ಲಿ ಜಾಮೀನಿಗಾಗಿ ಹೋರಾಡುತ್ತಿರುವ ದರ್ಶನ್, ಹೊರಗಿರುವ ವ್ಯಕ್ತಿಗಳಿಗೆ ಬೆದರಿಕೆ ಹಾಕುತ್ತಿದ್ದಾರೆ ಅಥವಾ ಹಿಂಸೆಗೆ ಪ್ರಚೋದನೆ ನೀಡುತ್ತಿದ್ದಾರೆ ಎಂದು ಪ್ರಾಸಿಕ್ಯೂಷನ್ ವಾದಿಸಿದರೆ, ಅವರ ಜಾಮೀನು ಅರ್ಜಿ ಮತ್ತಷ್ಟು ಕಠಿಣವಾಗಬಹುದು. ವೈಯಕ್ತಿಕ ಘನತೆ ಕಾಪಾಡುವ ಭರದಲ್ಲಿ ದರ್ಶನ್ ಬೇಡದ ರಗಳೆಯನ್ನು ಮೈಮೇಲೆ ಎಳೆದುಕೊಂಡಿದ್ದಾರೆಯೇ ಎಂಬ ಚರ್ಚೆ ಈಗ ಕಾನೂನು ವಲಯದಲ್ಲಿ ಶುರುವಾಗಿದೆ.
