ಗಣರಾಜ್ಯೋತ್ಸವದ ಅಂಗವಾಗಿ ಬೆಂಗಳೂರಿನ ಐತಿಹಾಸಿಕ ಲಾಲ್ಬಾಗ್ ಉದ್ಯಾನವನದಲ್ಲಿ ನಡೆಯುತ್ತಿರುವ ಫಲಪುಷ್ಪ ಪ್ರದರ್ಶನಕ್ಕೆ ಭರ್ಜರಿ ಸ್ಪಂದನೆ ದೊರಕುತ್ತಿದೆ. ಪ್ರತಿ ವರ್ಷದಂತೆ ಈ ಬಾರಿ ಕೂಡ ದೇಶ–ವಿದೇಶಗಳಿಂದ ಬಂದಿರುವ ಅಪರೂಪದ ಹೂವುಗಳು, ಆಕರ್ಷಕ ಹೂ ವಿನ್ಯಾಸಗಳು ಹಾಗೂ ವಿಶೇಷ ಥೀಮ್ಗಳು ಜನಮನ ಸೆಳೆಯುತ್ತಿವೆ.
ಜನವರಿ 14ರಿಂದ ಆರಂಭವಾದ ಈ ಫ್ಲವರ್ ಶೋ ಜನವರಿ 26ರವರೆಗೆ ನಡೆಯಲಿದ್ದು, ಆರಂಭವಾದ ಕೇವಲ 2 ದಿನಗಳಲ್ಲೇ 72,740 ಮಂದಿ ಪ್ರದರ್ಶನ ವೀಕ್ಷಿಸಿದ್ದಾರೆ. ಇದರಿಂದ ಲಾಲ್ಬಾಗ್ ಫಲಪುಷ್ಪ ಪ್ರದರ್ಶನಕ್ಕೆ ಈ ಬಾರಿ ದಾಖಲೆ ಮಟ್ಟದ ಆದಾಯ ಹರಿದು ಬಂದಿದೆ.
ಪ್ರದರ್ಶನದ ಮೊದಲ ದಿನವೇ 32,950 ಮಂದಿ ಭೇಟಿ ನೀಡಿ ಹೂಗಳ ಸೌಂದರ್ಯವನ್ನು ಸವಿದರು. ಅದರ ಮುಂದಿನ ದಿನವಾದ ಶುಕ್ರವಾರ 39,790 ಮಂದಿ ಫ್ಲವರ್ ಶೋ ವೀಕ್ಷಿಸಿದ್ದು, ಪ್ರತಿದಿನವೂ ಜನಸಂದಣಿ ಹೆಚ್ಚುತ್ತಿರುವುದು ಗಮನಕ್ಕೆ ಬಂದಿದೆ.
ಈ ಬಾರಿ ವಿಶೇಷವಾಗಿ ಗಣರಾಜ್ಯೋತ್ಸವ ಥೀಮ್ನಲ್ಲಿ ರೂಪಿಸಲಾಗಿರುವ ಹೂವಿನ ಮಾದರಿಗಳು, ದೇಶಭಕ್ತಿಯನ್ನು ಉಕ್ಕಿಸುವ ವಿನ್ಯಾಸಗಳು ಹಾಗೂ ಮಕ್ಕಳನ್ನು ಆಕರ್ಷಿಸುವ ಹೂ ಶಿಲ್ಪಗಳು ಹೆಚ್ಚಿನ ಮೆಚ್ಚುಗೆ ಪಡೆದಿವೆ. ಕುಟುಂಬಗಳೊಂದಿಗೆ ಆಗಮಿಸುವ ಪ್ರವಾಸಿಗರ ಸಂಖ್ಯೆ ಹೆಚ್ಚಾಗಿದ್ದು, ಶಾಲಾ–ಕಾಲೇಜು ವಿದ್ಯಾರ್ಥಿಗಳೂ ಹೆಚ್ಚಿನ ಸಂಖ್ಯೆಯಲ್ಲಿ ಭಾಗವಹಿಸುತ್ತಿದ್ದಾರೆ.
ಜನಸಂದಣಿಯನ್ನು ನಿಯಂತ್ರಿಸಲು ಭದ್ರತಾ ಕ್ರಮಗಳನ್ನು ಬಲಪಡಿಸಲಾಗಿದ್ದು, ಪ್ರವೇಶ ವ್ಯವಸ್ಥೆ, ಪಾರ್ಕಿಂಗ್ ಹಾಗೂ ಕುಡಿಯುವ ನೀರಿನ ಸೌಲಭ್ಯಗಳನ್ನು ಕಲ್ಪಿಸಲಾಗಿದೆ. ಮುಂದಿನ ದಿನಗಳಲ್ಲೂ ವಾರಾಂತ್ಯ ಹಾಗೂ ಗಣರಾಜ್ಯೋತ್ಸವದಂದು ಇನ್ನಷ್ಟು ಜನರು ಆಗಮಿಸುವ ಸಾಧ್ಯತೆ ಇದೆ ಎಂದು ಅಧಿಕಾರಿಗಳು ಅಂದಾಜಿಸಿದ್ದಾರೆ.
