ನವದೆಹಲಿ: ವಿಶ್ವಸಂಸ್ಥೆಯ ಭದ್ರತಾ ಮಂಡಳಿಯ ಖಾಯಂ ಅಲ್ಲದ ಸದಸ್ಯತ್ವಕ್ಕೆ ಭಾರತವನ್ನು ಆಯ್ಕೆ ಮಾಡಿದ ರಾಷ್ಟ್ರಗಳಿಗೆ ಪ್ರಧಾನಿ ನರೇಂದ್ರ ಮೋದಿ ಕೃತಜ್ಞತೆ ಸಲ್ಲಿಸಿದ್ದಾರೆ.
ವಿಶ್ವಸಂಸ್ಥೆಯ 192 ಸದಸ್ಯ ರಾಷ್ಟ್ರಗಳ ಪೈಕಿ 184 ರಾಷ್ಟ್ರಗಳು ಭಾರತದ ಪರ ಮತ ಹಾಕಿವೆ. ಭಾರತದ ಪರ ಮತ ಹಾಕುವ ಮೂಲಕ ಅಭೂತಪೂರ್ವ ಬೆಂಬಲಕ್ಕೆ ನೀಡಿದ್ದಕ್ಕೆ ನಾವು ಚಿರರುಣಿಯಾಗಿದ್ದೇವೆ ಎಂದು ಮೋದಿ ಹರ್ಷ ವ್ಯಕ್ತಪಡಿಸಿದ್ದಾರೆ.
ಭಾರತದ ಈ ಸಾಧನೆ ವಿಶ್ವಸಂಸ್ಥೆಯ ಭದ್ರತಾ ಮಂಡಳಿಯ ಖಾಯಂ ಸದಸ್ಯತ್ವ ಪಡೆಯಲು ಪೂರಕವಾಗಲಿದೆ. ಸದಸ್ಯ ರಾಷ್ಟ್ರಗಳ ಈ ಬೆಂಬಲ ನೋಡಿ ನನಗೆ ಅತೀವ ಸಂತೋಷವಯಿತು. ಭಾರತದ ಬಗ್ಗೆ ಸದಸ್ಯ ರಾಷ್ಟ್ರಗಳಿರುವ ನಂಬಿಕೆಯೇ ಈ ಬೆಂಬಲ ಸಿಗಲು ಕಾರಣವಾಯಿತು ಎಂದು ವಿಶ್ವಸಂಸ್ಥೆಯ ಭಾರತದ ರಾಯಭಾರಿ ಟಿ.ಎಸ್ ತಿರುಮೂರ್ತಿ ಅಭಿಪ್ರಾಯಪಟ್ಟಿದ್ದಾರೆ.
ವಿಶ್ವಸಂಸ್ಥೆಯ ಭದ್ರತಾ ಮಂಡಳಿಯಲ್ಲಿ ಭಾರತದ ಖಾಯಂ ಆಲ್ಲದ ಸದಸ್ಯತ್ವದ ಅವಧಿ 2021ರ ಜನವರಿ 1ರಿಂದ ಪ್ರಾರಂಭವಾಗಿ ಎರಡು ವರ್ಷಗಳ ಅವಧಿ ಹೊಂದಿರುತ್ತದೆ.
8 ಬಾರಿ ಸದಸ್ಯತ್ವಕ್ಕೆ ಅಲಂಕರಿಸಿದೆ ಭಾರತ
ವಿಶ್ವಸಂಸ್ಥೆಯ ಭದ್ರತಾ ಮಂಡಳಿಯ ಖಾಯಂ ಸದಸ್ಯತ್ವಕ್ಕೆ ಹಲವು ದಶಕಗಳಿಂದ ಭಾರತದ ಪ್ರಯತ್ನ ಮುಂದುವರೆದೇ ಇದೆ. ಸದ್ಯ ಅಮೆರಿಕ, ಇಂಗ್ಲೆಂಡ್, ರಷ್ಯಾ, ಫ್ರಾನ್ಸ್ ಹಾಗೂ ಚೀನಾ ಖಾಯಂ ಸದಸ್ಯ ರಾಷ್ಟ್ರಗಳಾಗಿವೆ.
ಆದರೆ, ಭಾರತ ಖಾಯಂ ಆಲ್ಲದ ಸದಸ್ಯತ್ವ ಪಡೆದಿರುವುದು ಇದೇ ಮೊದಲೇನೂ ಅಲ್ಲ. 19050-51, 1967-68, 1972-73, 977-78, 984-85, 1991-92 ಹಾಗೂ 2011-12ರಲ್ಲಿ ಭಾರತ ಖಾಯಂ ಅಲ್ಲದ ಸದಸ್ಯತ್ವ ಪಡೆದಿತ್ತು.
ಈ ವರ್ಷ ಭಾರತದ ಜತೆ ಮೆಕ್ಸಿಕೋ, ಐರ್ಲೆಂಡ್ ಹಾಗೂ ನಾರ್ವೆ ರಾಷ್ಟ್ರಗಳು ಖಾಯಂ ಅಲ್ಲದ ಸದಸ್ಯತ್ವ ಪಡೆದುಕೊಂಡಿವೆ.
