ಸತತ 4ನೇ ಜಯ ದಾಖಲಿಸಿದ ಇಂಗ್ಲೆಂಡ್ಗೆ ಸೆಮಿಫೈನಲ್ ಸ್ಥಾನ ಫಿಕ್ಸ್, 26 ರನ್ಗಳಿಂದ ಸೋತ ಶ್ರೀಲಂಕಾ ಟೂರ್ನಿಯಿಂದ ಔಟ್
ಶಾರ್ಜಾದಲ್ಲಿ ಟಾಸ್ ಗೆದ್ದ ಶ್ರೀಲಂಕಾ ಇಂಗ್ಲೆಂಡ್ ತಂಡವನ್ನು ಬ್ಯಾಟಿಂಗ್ಗೆ ಇಳಿಸಿತು. ಶಾರ್ಜಾದ ಟರ್ನಿಂಗ್ ಪಿಚ್ ಇಂಗ್ಲೆಂಡ್ ಬ್ಯಾಟ್ಸ್ಮನ್ಗಳಿಗೆ ಸವಾಲು ಆಗಿತ್ತು.
ಹಸರಂಗ ಜೇಸನ್ ರಾಯ್ (9 ರನ್) ಮತ್ತು ಜಾನಿ ಬೇರ್ ಸ್ಟೋವ್ (0 ರನ್), ವಿಕೆಟ್ ಪಡೆದರೆ ಡೇವಿಡ್ ಮಲಾನ್ (6 ರನ್) ವಿಕೆಟ್ ಚಮಿರಾ ಪಾಲಾಯಿತು.
ಸಂಕಷ್ಟದಲ್ಲಿದ್ದ ಇಂಗ್ಲೆಂಡ್ಗೆ ಚೇತರಿಕೆ ನೀಡಿದ್ದು ಜಾಸ್ ಬಟ್ಲರ್ ಮತ್ತು ನಾಯಕ ಇಯಾನ್ ಮೊರ್ಗಾನ್. ಈ ಜೋಡಿ 78 ಎಸೆತಗಳಲ್ಲಿ 112ರನ್ಗಳನ್ನು ಸೇರಿಸಿತು.
ಬಟ್ಲರ್ ಬೀಡು ಬೀಸಾಗಿ ಆಡಿದರೆ ಮೊರ್ಗಾನ್ ಎಚ್ಚರಿಕೆಯ ಆಟ ಆಡಿದರು. ಬಟ್ಲರ್ ಅರ್ಧಶತಕದ ಗಡಿ ದಾಟಿದ ಬಳಿಕ ಸಿಡಿಲಬ್ಬರದ ಆಟ ಆಡಿದರು. 19ನೇ ಓವರ್ನಲ್ಲಿ ಔಟಾಗುವ ಮುನ್ನ ಮೊರ್ಗಾನ್ 40 ರನ್ಗಳಿಸಿದ್ದರು.
ಬಟ್ಲರ್ ಲಂಕಾ ಬೌಲರ್ಗಳಿಗೆ ಬೌಂಡರಿ, ಸಿಕ್ಸರ್ಗಳ ಪರಿಚಯ ಮಾಡಿಸಿಕೊಟ್ಟರು. ಇನ್ನಿಂಗ್ಸ್ನ ಕೊನೆಯ ಎಸೆತದಲ್ಲಿ ಸಿಕ್ಸರ್ ಸಿಡಿಸಿ ಶತಕದ ಸಂಭ್ರಮ ಆಚರಿಸಿಕೊಂಡರು.
ಬಟ್ಲರ್ 67 ಎಸೆತಗಳಲ್ಲಿ 6 ಬೌಂಡರಿ ಮತ್ತು 6 ಸಿಕ್ಸರ್ ನೆರವಿನಿಂದ ಅಜೇಯ 101 ರನ್ಗಳಿಸಿದರು. 20 ಓವರುಗಳಲ್ಲಿ ಇಂಗ್ಲೆಂಡ್ 4 ವಿಕೆಟ್ ಕಳೆದುಕೊಂಡು 163 ರನ್ಗಳಿಸಿತು.
ಚೇಸಿಂಗ್ ಆರಂಭಿಸಿದ ಶ್ರೀಲಂಕಾ ಆರಂಭದಲ್ಲೇ ಮುಗ್ಗರಿಸಿತು. ನಿಸ್ಸಂಕಾ ರನೌಟ್ ಬಲೆಯಲ್ಲಿ ಬಿದ್ದರೆ, ಕುಸಾಲ್ ಪೆರಾರ ಮತ್ತು ಅಸಲಂಕಾ ರಶೀದ್ ಮ್ಯಾಜಿಕ್ಗೆ ಬಲಿಯಾದರು.
ಕ್ರಿಸ್ ಜೊರ್ಡಾನ್ ಫೆರ್ನಾಂಡೋ ಆಟಕ್ಕೆ ಕಡಿವಾಣ ಹಾಕಿದರು. ನಾಯಕ ದಾಸುನ್ ಶನಕ ಮತ್ತು ಹಸರಂಗ ಹೋರಾಟ ನೀಡುವ ಯೋಚನೆಯಲ್ಲಿದ್ದರು.
ಆದರೆ 34ರನ್ಗಳಿಸಿದ್ದ ಹಸರಂಗ ಲಿವಿಂಗ್ ಸ್ಟೋನ್ಗೆ ವಿಕೆಟ್ ಒಪ್ಪಿಸಿದರು. 26 ರನ್ಗಳಿಸಿದ ಶನಕ ರನೌಟ್ ಬಲೆಯಲ್ಲಿ ಬಿದ್ದರು.
ಕೆಳ ಸರದಿಯ ಬ್ಯಾಟ್ಸ್ಮನ್ಗಳು ಪ್ರತಿರೋಧ ತೋರಲಿಲ್ಲ. 19 ಓವರುಗಳಲ್ಲಿ ಶ್ರೀಲಂಕಾ 137 ರನ್ಗಳಿಗೆ ಆಲೌಟ್ ಆಯಿತು. ಇಂಗ್ಲೆಂಡ್ 26 ರನ್ಗಳ ಜಯ ದಾಖಲಿಸಿ ಸೆಮಿಫೈನಲ್ಗೇರಿದ ಅಧಿಕೃತ ತಂಡವಾಯಿತು.
