ವಿಶ್ವ ತಾಯಂದಿರ ದಿನದ ಅಂಗವಾಗಿ ಸ್ಯಾಂಡಲ್ ವುಡ್ ನ ಹಲವು ತಾರೆಯರು ತಮಗೆ ಜನ್ಮ ಕೊಟ್ಟ, ಬದುಕು ಕೊಟ್ಟ ತಾಯಂದಿರನ್ನು ನೆನೆದಿದ್ದಾರೆ. ಸ್ಯಾಂಡಲ್ ವುಡ್ ಬಾದ್ ಷಾ ಕಿಚ್ಚ ಸುದೀಪ್ ಟ್ವಿಟ್ಟರ್ ಮೂಲಕ ಎಲ್ಲಾ ಮಾತೃಹೃದಯಿ ಸ್ವರೂಪ ಅಮ್ಮಂದಿರಿಗೆ ಶುಭಾಶಯ ಕೋರಿದ್ದಾರೆ. ತಮ್ಮ ಟ್ವೀಟ್ ನಲ್ಲಿ “ಜೀವ ಕೊಟ್ಟ ನನ್ನ ಹೆತ್ತ ತಾಯಿಗೆ ಜೀವನ ಕೊಟ್ಟ ನನ್ನ ಕನ್ನಡ ತಾಯಿಗೆ , ಅನ್ನ ಕೊಟ್ಟ ಭೂತಾಯಿಗೆ , ತಮ್ಮ ಹೃದಯಗಳಲ್ಲಿ ಪ್ರೀತಿಯ ಸ್ಥಾನ ಕೊಟ್ಟು , ನನ್ನನ್ನು ಅಕ್ಕರೆಯಿಂದ ಬೆಳೆಸುತ್ತಿರುವ ಎಲ್ಲಾ ಮಾತೃಹೃದಯಿ ಸ್ವರೂಪ ಅಭಿಮಾನಿ ತಾಯಂದಿರಿಗೆ ನಾನು ಸದಾ ಋಣಿ” ಎಂದಿದ್ದಾರೆ.
ಪವರ್ ಸ್ಟಾರ್ ಪುನೀತ್ ರಾಜ್ ಕುಮಾರ್ ಅವರ ತಾಯಿ ಪಾರ್ವತಮ್ಮ ರಾಜ್ ಕುಮಾರ್ ಅವರಿಗೆ ಮುತ್ತು ಕೊಡ್ತಿರೋ ಫೋಟೋವೊಂದನ್ನ ಅಪ್ಲೋಡ್ ಮಾಡಿ ಅಮ್ಮ ನೀನು ನಮಗಾಗಿ ಅಂತಾ ವಿಶ್ವ ತಾಯಂದಿರ ದಿನದ ಶುಭ ಕೋರಿದ್ದಾರೆ.
ಇನ್ನು ನವರಸನಾಯಕ ಜಗ್ಗೇಶ್ ಟ್ವಿಟ್ಟರ್ ನಲ್ಲಿ ಕಾವ್ಯಾತ್ಮಕವಾಗಿ ಸಾಲುಗಳನ್ನ ಬರೆದು ಅಮ್ಮನ ದಿನ ಹೇಗೆ ಇರಬಾರದು ಎಂದು ಹೇಳಿದ್ದಾರೆ. ‘ಹೀಗಿರದಿರಲಿ #ಅಮ್ಮನದಿನ’ ಅಂತಾ ಹ್ಯಾಷ್ ಟ್ಯಾಗ್ ಬಳಸಿ ಅಮ್ಮಂದಿರ ದಿನದ ಶುಭ ಕೋರಿದ್ದಾರೆ. ಹಾಗೇ ಅವರ ಅಮ್ಮನ ಸೀರೆ ಹಾಗೂ ಕೆಲ ವಸ್ತುಗಳನ್ನ ಇಂದಿಗೂ ಜೋಪಾನವಾಗಿಟ್ಟುಕೊಂಡಿರೋ ಫೋಟೋ ಹಾಕಿ ಬದುಕಿರುವಾಗಲೇ ತಾಯಿಯನ್ನ ಚೆನ್ನಾಗಿ ನೋಡಿಕೊಳ್ಳಿ ಎಂದು ಹೇಳಿದ್ದಾರೆ.
