3ನೇ ಏಕದಿನ ಪಂದ್ಯ : ಭಾರತಕ್ಕೆ 288 ರನ್ ಗುರಿ
ಕೇಪ್ ಟೌನ್ ನಲ್ಲಿ ನಡೆಯುತ್ತಿರುವ ಮೂರನೇ ಏಕದಿನ ಪಂದ್ಯದಲ್ಲಿ ದಕ್ಷಿಣ ಆಫ್ರಿಕಾ ತಂಡ 287 ರನ್ ಗಳಿಗೆ ಆಲೌಟ್ ಆಗಿದೆ. ಟೀಂ ಇಂಡಿಯಾ ಪಂದ್ಯ ಗೆಲ್ಲಲು 288 ರನ್ ಗಳಿಸಬೇಕಿದೆ.
ಪಂದ್ಯದಲ್ಲಿ ಟಾಸ್ ಗೆದ್ದ ಕೆ.ಎಲ್.ರಾಹುಲ್ ಬೌಲಿಂಗ್ ಆಯ್ದುಕೊಂಡರು. ನಾಯಕನ ನಿರ್ಣಯ ಸಮರ್ಥಿಸಿಕೊಳ್ಳುವಂತೆ ದೀಪಕ್ ಚಹಾರ್ ಮೂರನೇ ಓವರ್ ನಲ್ಲಿ ಮಲಾನ್ (1) ರನ್ ವಿಕೆಟ್ ಪಡೆದು ಭಾರತಕ್ಕೆ ಬ್ರೇಕ್ ತಂದುಕೊಟ್ಟರು.
ಇದಾದ ಬಳಿಕ ಬವುಮಾ (8) ರಾಹುಲ್ ಅದ್ಭುತ ರನೌಟ್ ಗೆ ಬಲಿಯಾದರು. 15 ರನ್ ಗಳಿಸಿ ಮಾರ್ಕ್ರಂ ಚಹಾರ್ ಗೆ ವಿಕೆಟ್ ಒಪ್ಪಿಸಿದರು. ಇದಾದ ಬಳಿಕ ಕ್ವಿಂಟನ್ ಡಿ ಕಾಕ್ ಮತ್ತು ವ್ಯಾನ್ ಡರ್ ಡುಸ್ಸನ್ ಜುಗಲ್ ಬಂಧಿ ಭಾರತೀಯ ಬೌಲರ್ ಗಳ ಬೆಂಡೆತ್ತಿದರು.
ಈ ಜೋಡಿ ಶತಕದ ಜೊತೆಯಾಟವಾಡಿತು. ಈ ಹಂತದಲ್ಲಿ ಕ್ವಿಂಡನ್ ಡಿ ಕಾಕ್ ಶತಕ ಸಿಡಿಸಿದರು. ಡುಸ್ಸನ್ ಅರ್ಧ ಶತಕ ಸಿಡಿಸಿದರು.
ಆದ್ರೆ ಜಸ್ಪ್ರೀತ್ ಬುಮ್ರಾ ಶತಕ ಸಿಡಿಸಿ ಮುನ್ನುಗ್ಗುತ್ತಿದ್ದ ಡಿ ಕಾಕ್ (124) ಗೆ ಖೆಡ್ಡಾ ತೋಡಿದರು. 52 ರನ್ ಗಳಿಸಿದ್ದ ಡೆರ್ ಡುಸ್ಸನ್ ಗೆ ಚಾಹಲ್ ಪೆವಿಲಿಯನ್ ದಾರಿ ತೋರಿಸಿದರು. ಇಲ್ಲಿಂದ ಭಾರತೀಯ ಬೌಲರ್ ಗಳ ಆಟ ಶುರುವಾಯಿತು.
ಮಿಲ್ಲರ್ 39 ರನ್, ಸಿಡಿಸಿ ಕನ್ನಡಿಗ ಪ್ರಸಿದ್ಧ್ ಕೃಷ್ಣಗೆ ಚೊಚ್ಚಲ ವಿಕೆಟ್ ಕೊಟ್ಟರು. ಡ್ವೈನ್ ಪ್ರಿಟೋರಿಯಸ್ ಹೋರಾಟ 20 ರನ್ ಗಳಿಗೆ ಅಂತ್ಯವಾಯಿತು. ಅಂತಿಮವಾಗಿ ದಕ್ಷಿಣ ಆಫ್ರಿಕಾ 49.5 ಓವರ್ ಗಳಿಗೆ 287 ರನ್ ಗಳಿಗೆ ಆಲೌಟ್ ಆಯಿತು̤
ಭಾರತದ ಪರ ಕನ್ನಡಿಗ ಪ್ರಸಿದ್ಧ್ ಕೃಷ್ಣ ಮೂರು ವಿಕೆಟ್, ಬುಮ್ರಾ, ಚಹಾರ್ ತಲಾ ಎರಡು ವಿಕೆಟ್, ಚಾಹಲ್ ಒಂದು ವಿಕೆಟ್ ಪಡೆದರು.
