Sanjay Manjrekar | ಧೋನಿ, ಕೊಹ್ಲಿಯಂತೆ ರಾಹುಲ್ ಕ್ಯಾಪ್ಟನ್ಸಿಗೆ ಸೂಕ್ತವಲ್ಲ..
ಕೆ.ಎಲ್. ರಾಹುಲ್ ನಾಯಕತ್ವ ಲಕ್ನೋ ಸೂಪರ್ ಜೈಂಟ್ಸ್ ತಂಡ ಚೊಚ್ಚಲ ಪ್ರಯತ್ನದಲ್ಲಿಯೇ ಐಪಿಎಲ್ ನಲ್ಲಿ ಪ್ಲೇ ಆಫ್ಸ್ ಪ್ರವೇಶ ಪಡೆದುಕೊಂಡು ಸೈ ಎನಿಸಿಕೊಂಡಿದೆ. ಕೆಎಲ್ ರಾಹುಲ್ ನಾಯಕತ್ವದ ಲಕ್ನೋ ಲೀಗ್ ಹಂತದಲ್ಲಿ ಒಟ್ಟು 14 ಪಂದ್ಯಗಳಲ್ಲಿ 9 ಗೆಲುವುಗಳನ್ನು ಸಾಧಿಸಿ ಅಂಕಪಟ್ಟಿಯಲ್ಲಿ ಮೂರನೇ ಸ್ಥಾನದಲ್ಲಿತ್ತು. ಆದ್ರೆ ನಿರ್ಣಾಯಕ ಎಲಿಮಿನೇಟರ್ ಪಂದ್ಯದಲ್ಲಿ ಆರ್ ಸಿಬಿ ವಿರುದ್ಧ ಲಕ್ನೋ ಸೂಪರ್ ಜೈಂಟ್ಸ್ ತಂಡ ಸೋಲು ಕಂಡಿದೆ.
ನಿರ್ಣಾಯಕ ಎಲಿಮಿನೇಟರ್ ಪಂದ್ಯದಲ್ಲಿ ಸಹ ಆಟಗಾರರು ವಿಫಲರಾದರೂ, ಕೆ.ಎಲ್ ರಾಹುಲ್ 79 ರನ್ಗಳ ನಿರ್ಣಾಯಕ ಇನ್ನಿಂಗ್ಸ್ನೊಂದಿಗೆ ಮಿಂಚಿದರು. ಅಲ್ಲದೇ ಲಕ್ನೋ ನಾಯಕ ಸತತ ನಾಲ್ಕು ಋತುಗಳಲ್ಲಿ 600 ಕ್ಕೂ ಹೆಚ್ಚು ರನ್ ಗಳಿಸಿದ ಮೊದಲ ಬ್ಯಾಟ್ಸ್ಮನ್ ಎಂಬ ಇತಿಹಾಸವನ್ನು ನಿರ್ಮಿಸಿದರು. ಒಂದು ಕಡೆ ನಾಯಕರಾಗಿ ಯಶಸ್ಸು, ಮತ್ತೊಂದು ಕಡೆ ಬ್ಯಾಟರ್ ಆಗಿ ಯಶ ಗಳಿಸಿದ ರಾಹುಲ್ ಬಗ್ಗೆ ಅನೇಕರು ಪ್ರಶಂಸೆ ವ್ಯಕ್ತಪಡಿಸುತ್ತಿದ್ದಾರೆ. ಆದ್ರೆ ಮಾಜಿ ಟೀಂ ಇಂಡಿಯಾ ಕ್ರಿಕೆಟಿಗ ಸಂಜಯ್ ಮಂಜ್ರೇಕರ್ ಅವರು ಕೆಎಲ್ ರಾಹುಲ್ ಅವರ ಪ್ರದರ್ಶನವನ್ನು ಟೀಕಿಸಿದ್ದಾರೆ.
‘‘ನಿರ್ಣಾಯಕ ಎಲಿಮಿನೇಟರ್ ಪಂದ್ಯದಲ್ಲಿ ಕೆಎಲ್ ರಾಹುಲ್ ಪ್ರದರ್ಶನ ಶ್ಲಾಘನೀಯ. ಆದರೆ ಓಪನರ್ ಆಗಿ ಬಂದು ಕೊನೆಯವರೆಗೂ ಕ್ರೀಸ್ ನಲ್ಲಿದ್ದರೂ ಅವರ ಬ್ಯಾಟಿಂಗ್ ಸ್ಟ್ರೈಕ್ ರೇಟ್ ಕಡಿಮೆ ಇತ್ತು. ಹೇಜಲ್ ವುಡ್ ಬೌಲಿಂಗ್ ನಲ್ಲಿ ಉತ್ತಮ ಬೌಂಡರಿ ಬಾರಿಸಿದ ರಾಹುಲ್ ಗೆ ಅದೇ ಟೆಂಪೋವನ್ನ ಮುಂದುವರಿಸಲು ವಿಫಲರಾದರು. ಕೊನೆಯವರೆಗೂ ಆಡಬೇಕು ಅನ್ನೋದು ಒಳ್ಳೆಯದೇ ಆದ್ರೆ ಆ ಸಮಯದಲ್ಲಿ ವೇಗವಾಗಿ ಆಡಬೇಕು.
ಆದರೆ ರಾಹುಲ್ ಬ್ಯಾಟಿಂಗ್ ನಲ್ಲಿ ಅದು ಕಾಣಿಸಲಿಲ್ಲ. ಮೊದಲ ಪವರ್ ಪ್ಲೇ ಅಂತ್ಯದ ವೇಳೆಗೆ ಅವರು 17 ಎಸೆತಗಳಲ್ಲಿ 26 ರನ್ ಗಳಿಸಿದ್ದರು. ಲಕ್ನೋ ಗೆಲುವಿಗೆ ಏಳು ಓವರ್ಗಳಲ್ಲಿ 99 ರನ್ಗಳ ಅಗತ್ಯವಿರುವಾಗ ರಾಹುಲ್ 42 ಎಸೆತಗಳಲ್ಲಿ 48 ರನ್ ಗಳಿಸಿದರು. ನಂತರ ಬ್ಯಾಟ್ ಝಳಪಿಸಿದ ರಾಹುಲ್ ಉಳಿದ 16 ಎಸೆತಗಳಲ್ಲಿ 31 ರನ್ ಗಳಿಸಿದರು. ಆದರೆ ಆದಾಗಲೇ ಆಗಬೇಕಿದ್ದ ಹಾನಿ ನಡೆದು ಹೋಗಿತ್ತು.
ಈ ರೀತಿಯಾಗದೇ ಮೊದಲಿನಿಂದಲೂ ರಾಹುಲ್ ವೇಗವಾಗಿ ರನ್ ಗಳಿಸಿದ್ದರೇ ಪರಿಸ್ಥಿತಿ ಬೇರೆಯದ್ದೇ ರೀತಿಯಲ್ಲಿರುತ್ತಿತ್ತು. ಒಂದು ವೇಳೆ ನಾನು ರಾಹುಲ್ ಕೋಚ್ ಆಗಿದ್ದರೆ ಖಂಡಿತವಾಗಿಯೂ ಅವರ ಪ್ರದರ್ಶನಕ್ಕೆ ಬೈಯುತ್ತಿದ್ದೆ. ಎಂಎಸ್ ಧೋನಿ ಮತ್ತು ವಿರಾಟ್ ಕೊಹ್ಲಿಯಂತೆ ರಾಹುಲ್ ನಾಯಕತ್ವಕ್ಕೆ ಅಷ್ಟು ಸೂಕ್ತವಲ್ಲ. ತಾತ್ಕಾಲಿಕವಾಗಿ, ಅವರು ಬೆಸ್ಟ್ ಅಷ್ಟೆ ಎಂದಿದ್ದಾರೆ ಸಂಜಯ್ ಮಂಜ್ರೇಕರ್. sanjay-manjrekar-criticize-captain-kl-rahul
