ಒಲವಲ್ಲಿ ಅವಳು – ಅವನು
ಪ್ರೀತಿ… ನೋಡಿದ ತಕ್ಷಣ ಆಕರ್ಶಿತರಾಗುವುದನ್ನೇ ಪ್ರೀತಿ ಎನ್ನುವುದಾದರೆ ,, ಪ್ರತಿ ದಿನ ಪ್ರತಿ ಕ್ಷಣ ಒಬ್ಬೊಬ್ಬರ ಮೇಲೆ ನಮಗಾಗುವ ಸೆಳೆತ ಆಕರ್ಶಣೆಗೆ ಪ್ರೀತಿಯ ಹೆಸರಿಡಬೇಕಾಗುತ್ತದೆ…
ಪ್ರೀತಿ ಇಬ್ಬರ ಮನಸ್ಸನ್ನ ಬೆಸೆಯುವಂತಹದ್ದು… ಇಬ್ಬರ ಆತ್ಮಗಳ ನಡುವಿನ ಬಂಧನ…
ಪ್ರೀತಿಯಲ್ಲಿ ಹೆಣ್ಣು ಗಂಡು ತಮ್ಮ ತಮ್ಮ ಪಾತ್ರಗಳನ್ನೇ ನಿಭಾಯಿಸಬೇಕಾಗುತ್ತದೆ…
ಹಾಗೆಯೇ ಇಬ್ಬರೂ ನಿಭಾಯಿಸಬೇಕಾದ ಒಂದು ಬಹುಮುಖ್ಯವಾದ ಕರ್ತವ್ಯ ಅಂದ್ರೆ ನಂಬಿಕೆ…
ಸಮಯ , ಸಂದರ್ಭ , ಪರಿಸ್ಥಿತಿ ಯಾವುದೇ ಇರಲಿ ಇಬ್ಬರೂ ಒಬ್ಬರನ್ನ ಒಬ್ಬರು ನಂಬುವುದು… ನಂಬಿಕೆಯ ದರ್ಪಣ ಎಲ್ಲಿಯವರೆಗೂ ಚೂರಾಗುವುದಿಲ್ಲವೋ ಅಲ್ಲಿಯವರೆಗೂ ಪ್ರೀತಿಯ ಪಾವಿತ್ರ್ಯತೆ ,, ಅವರಿಬ್ಬರ ನಡುವಣ ಸಂಬಂಧಕ್ಕೆ ಎಳ್ಳಷ್ಟೂ ತೊಂದರೆಯಾಗುವುದಿಲ್ಲ…
ಅದಕ್ಕೆ ಈ ನಂಬಿಕೆಯನ್ನುವ ನಾಜೂಕಾದ ದರ್ಪಣವನ್ನ ಅವನು ಮತ್ತೆ ಅವಳು ಇಬ್ಬರೂ ಹುಷಾರಾಗಿ ಬಹಳ ನಾಜೂಕಾಗಿ , ನಿಷ್ಠೆಯಿಂದ ಜೋಪಾನ ಮಾಡಬೇಕಾಗುತ್ತದೆ..
ಅವನ ಪಾತ್ರವೇನು..??
ಒಂದು ಹುಡುಗಿ ಸಾಕಷ್ಟು ಆಸೆಗಳನ್ನ ಇಟ್ಟುಕೊಂಡಿರುತ್ತಾಳೆ.. ತನ್ನ ಹುಡುಗನ ಜೊತೆಗೆ ಹೇಗೆಲ್ಲಾ ಇರಬೇಕೆಂಬ ಕನಸುಗಳ ಗೋಪುರವನ್ನೇ ಮನದಲ್ಲೇ ನಿರ್ಮಾಣ ಮಾಡಿಕೊಂಡಿರುತ್ತಾಳೆ… ಪ್ರತಿ ಕ್ಷಣ ತನ್ನ ಹುಡುಗನ ಒಂದು ಛವಿಗಾಗಿ ಕಾಯುತ್ತಿರುತ್ತಾಳೆ.. ಅವನ ನೆನಪಲ್ಲೇ ಕಾಯುತ್ತಿರುತ್ತಾಳೆ… ಜೀವನದಲ್ಲಿ ಅವನ ಜೊತೆಗೆ ಹೇಗೆಲ್ಲಾ ಇರಬೇಕೆಂಬ ಆಸೆಗಳ ಮಹಲನ್ನ ಕಟ್ಟಿಕೊಂಡು ಆ ಅರಮನೆಗೆ ಆಕೆ ರಾಣಿಯಾಗಿರುತ್ತಾಳೆ..
ಆ ರಾಣಿಯನ್ನ ಅರಮನೆಯಿಂದ ಹೊರಕರೆದುಕೊಂಡು ಬಂದು ತನ್ನ ಸವಾರಿ ಮೇಲೆ ಕೂರಿಸಿ ಹೊರಗಡೆ ಪ್ರಪಂಚ ಸುತ್ತಿಸುವ ರಾಜನ ಕನಸು ಆ ಹುಡುಗಿಯದ್ದು…
ಅರಮನೆಯೊಳಗೆ ವಜ್ರ ಕೊಟ್ಟು , ನಿತ್ಯವೂ ಹಬ್ಬದೂಟ ಬಡಿಸಿ , ಮೈತುಂಬ ಒಡವೆಗಳನ್ನ ಕೊಟ್ಟು ಲಕ್ಷ ಲಕ್ಷ ರೂಪಾಯಿಯ ಬಟ್ಟೆಗಳನ್ನ ಕೊಡಿಸಿ ಪಂಜರದೊಳಗಿನ ಗಿಣಿಯಂತೆ ಆಕೆಯನ್ನ ಕಾಪಾಡಿದರೆ , ಅವಳಿಗೆ ರಕ್ಷಣ ದೇಹಕ್ಕೆ ಸಿಗುತ್ತೆ ಹೊರತು ಮನಸ್ಸಿಗಲ್ಲ..
ಅವಳ ಆತ್ಮಕ್ಕೆ , ಮನಸ್ಸಿಗೆ ಆಗುವ ನೋವಿಗೆ ಯಾರು ಮುಲಾಮು ನೀಡ್ತಾರೆ… ಯಾರು ರಕ್ಷಣೆ ಮಾಡ್ತಾರೆ…
ಹೊರಗಡೆ ಅವನೂ ಅವಳ ಜೊತೆಗೆ ಪ್ರತಿ ಹೆಜ್ಜೆಯಲ್ಲೂ ಒಟ್ಟಿಗೆ ನಡೆಯಬೇಕು.. ಅವಳ ಕನಸಿಗೆ ರೆಕ್ಕೆಯಾಗಬೇಕು… ಅವಳ ಬೆನ್ನ ಹಿಂದೆ ನಾನಿದ್ದೀನಿ… ಪ್ರಪಂಚವೇ ಅವಳ ವಿರುದ್ಧ ತಿರುಗಿ ಬಿದ್ದರೂ ನಾನಿರುವೆ ,,,, ನಿನ್ನ ಕನಸಿಗೆ ಸಾವಿರ ಅಡಚಣೆ ಬಂದರೂ ಈಡೇರಿಸಲು ನಾನು ನಿನ್ನ ಬೆಂಬಲಿಸುವೆ … ಎಷ್ಟೇ ಜನರು , ಸಮಾಜ ನಿನ್ನ ವಿರುದ್ಧ ಮಾತನಾಡಲಿ , ನನಗೆ ನೀನೇನು ಗೊತ್ತಿದೆ… ತಲೆ ಕೆಡಿಸಿಕೊಳ್ಬೇಡ,.. ನೀನು ಏನೇನೆಲ್ಲಾ ಮಾಡಬೇಕೆಂದಿದೆಯೋ ಅದನ್ನೆಲ್ಲವ ಮಾಡು ,,, ನಿನ್ನ ಪರಿವಾರದವರು ಬೆಂಬಲಿಸಲಿ ಬಿಡಲಿ.. ನಾನಿರುವೆ ನಿನ್ನ ಜೊತೆಗೆ…
ಈ ಪಂಜರದ ಗಿಳಿ ಅಲ್ಲ,,, ಸ್ವಾತಂತ್ರ್ಯವಾಗಿ ಬದುಕುವ ಹಕ್ಕು ನಿನಗಿದೆ.. ನಿನ್ನ ಜೀವನ ನಿನ್ನಿಷ್ಟದಂತೆ ಜೀವಿಸುವ ಹಕ್ಕು ನಿನಗಿದೆ… ನಿನ್ನ ದೇಹಕ್ಕೆ ನಾನು ಹಕ್ಕುದಾರನಲ್ಲ… ನಿನ್ನ ಇಷ್ಟವಿಲ್ಲದೇ ನಾನು ನಿನ್ನ ಮುಟ್ಟುವುದಿಲ್ಲ… ಮತ್ತೊಬ್ಬರಿಗೆ ನಿನ್ನ ದೇಹಕ್ಕಾಗಲೀ ಆತ್ಮಕ್ಕಾಗಲಿ ಮನಸ್ಸಿಗಾಗಲಿ ಹಾನಿ ಮಾಡುವುದಕ್ಕೂ ನಾನು ಬಿಡುವುದಿಲ್ಲ ಎಂದು ಕಣ್ಣಲ್ಲಿ ಕಣ್ಣಿಟ್ಟು ಜೋಪಾನ ಮಾಡಬೇಕು ಅವನು ಅವಳನ್ನ.. ಫುಟ್ ಪಾತ್ ನಲ್ಲಿ ಊಟ ಮಾಡಿಸಿದ್ರೂ ಪ್ರೀತಿಯಿಂದ ಮಾಡಿಸಿದರೆ ಸಾಕು..
ತಂದೆಯಂತೆ ಅವಳ ಜವಾಬ್ದಾರಿ ತೆಗೆದುಕೊಂಡು , ಅವಳ ಮುಖದಲ್ಲಿ ನಗು ತರಿಸಲು ಪ್ರಯತ್ನಿಸಬೇಕು.. ಅವಳನ್ನ ಮಗುವಿನಂತೆಯೂ ನೇವರಿಸಿ , ಅವಳ ಜೊತೆಗೆ ಅವಳಿಗೆ ಅಗತ್ಯವಿದ್ದಾಗ ಸಮಯ ಕಳೆಯಬೇಕು..
ಅವಳತ್ತಾಗ ಕಣ್ಣೀರೊರೆಸಬೇಕು.. ನಕ್ಕಾಗ ಅವಳ ಖುಷಿಯ ಕ್ಷಣವನ್ನ ನೆನಪಿನ ಗ್ಯಾಲರಿಗೆ ಸೇರಿಸಬೇಕು.. ಅವಳನ್ನ ಮುದ್ದು ಮಾಡಬೇಕು.. ಅವಳಿಗೆ ಅಸಹಜವೆನಿಸುವಂತೆ ನಡೆದುಕೊಳ್ಳಬಾರದು.., ಅವಳಿಗೆ ಒಂದು ನಡವಳಿಕೆ ಇಷ್ಟವಾಗ್ತಿಲ್ಲವೆಂದರೆ ,,, ಅದನ್ನ ಬದಲಾಯಿಸಿಕೊಳ್ಳಲು ಪ್ರಯತ್ನ….
ಅವಳ ಕೈ ಹಿಡಿದು ನಡೆಸುವುದು… ಆಗಾಗ ಸ್ವಲ್ಪ ರೇಗಿಸುತ್ತಾ ಚೇಷ್ಟೆ ಮಾಡುವುದು… ಅವಳ ಹಣೆಗೆ ಮುತ್ತಿಟ್ಟರೆ ಅದು ಅವಳಿಗೆ ಇಡೀ ಜೀವನವೇ ಸಿಕ್ಕಷ್ಟು ಖುಷಿ… ಅಪ್ಪನಂತೆ ಒಂದು ಹುಡುಗಿಗೆ ಅವಳ ಹುಡುಗ ಅನ್ನಿಸಬೇಕು… ಆ ರೀತಿ ಅವನು ಅವಳೊಂದಿಗಿರಬೇಕು…
ಅವಳ ಪಾತ್ರವೇನು..??
ಒರಟು ಮನಸ್ಸು ಅವನದ್ದಾದ್ರೂ ,,, ಅವನ ಒಳಮನಸ್ಸು ಬಹಳ ಮೃದು ಎನ್ನುವುದನ್ನ ಅರಿತು ಅವನನ್ನ ತಾಯಯಿಯಂತೆ ಸಲಹಿ ಅವನ ಕಾಳಜಿ ಮಾಡುವುದು… ಅವನ ಮಡಿಲಲ್ಲಿ ಮಲಗಿಸಿ ಅವನ ತಲೆ ಕೂದಲು ಸವರುತ್ತಾ ,,, ಅವನ ಬಳಿ ಪ್ರೀತಿಯಿಂದ ಮಾತನಾಡುತ್ತಾ ಅವನ ತೊಂದರೆಗಳನ್ನ ಅರಿತುಕೊಳ್ಳುವುದು.. ಅವನನ್ನ ಅರ್ಥ ಮಾಡಿಕೊಳ್ಳುವುದು.. ಅವನ ಪ್ರೀತಿ , ತೊಂದರೆಗಳನ್ನ ಎಲ್ಲರಿಗಿಂತ ಮುಂಚೆಯೇ ಅರ್ಥ ಮಾಡಿಕೊಳ್ಳುವುದು..
ಇಡೀ ಪ್ರಪಂಚವೇ ಅವನನ್ನ ವಿರೋಧಿಸಿದ್ರೂ ಅವನನ್ನ ಎಲ್ಲರಿಗಿಂತ ಹೆಚ್ಚು ನಂಬುವುದು.. ಅವನ ಒರಟು ಹೃದಯವನ್ನೂ ತನ್ನ ಮೃದುತ್ವದಿಂದ ಹದಗೊಳಿಸುವುದು..
ಅವನ ಪ್ರೀತಿಯ ಬೆಲೆ ಕೊಡುವುದು , ಅವನ ಭಾವನೆಗಳಿಗೆ ಸ್ಪಂದಿಸುವುದು.. ಅವನಿಗೆ ತಾಯಿ ಪ್ರೀತಿ ಕೊಟ್ಟು , ಅವನಿಗೆ ಅಗತ್ಯವಿದ್ದಾಗ ಕರುಣಾಮಯಿಯಾಗುವುದು… ಅವನ್ನೆಷ್ಟೇ ಕಠೋರವಿರಲಿ , ಅವನ ಕೈಬಿಡುವ ಮುನ್ನ ಬದಲಾಯಿಸುವ ಪ್ರಯತ್ನ ಮಾಡುವುದು… ಅವನ ಕಾಳಜಿ ಅರ್ಥ ಮಾಡಿಕೊಂಡು ,,, ಅವನ ಎಲ್ಲರಿಗಿಂತ ಹೆಚ್ಚಾಗಿ ಹುಚ್ಚರಂತೆ ಪ್ರೀತಿ ಮಾಡುವುದು…
ಸಮಯ ಬಂದರೆ ತನ್ನ ಪ್ರೀತಿಗಾಗಿ ಎಲ್ಲರನ್ನೂ ಎದುರುಹಾಕಿಕೊಂಡು ಅವನ ಪ್ರೀತಿಗೆ ಬೆಲೆ ಕೊಟ್ಟು ಅವನಿಗೆ ಹೆಚ್ಚು ಪ್ರಾಮುಖ್ಯತೆ ಕೊಡುವುದು ಅವಳು ನಿಭಾಯಿಸಬೇಕಾದ ಪ್ರಮುಖ ಪಾತ್ರ…
