Jabalpur RTO Raid: ಸಾಮಾನ್ಯ ನೌಕರನಿಗೆ 5 ಮನೆ, ಬಾರ್, ಹೋಮ್ ಥಿಯೇಟರ್ – ದಂಗಾದ ಅಧಿಕಾರಿಗಳು..
ರಾಜಕಾರಣಿಗಳು ನಮ್ಮ ದೇಶವನ್ನು ದೋಚುತ್ತಾರೆ ಎಂಬ ಮಾತು ಒಂದಲ್ಲ ಒಂದು ಹಂತದಲ್ಲಿ ಕೇಳಿರುತ್ತೇವೆ ಆದರೆ.. ಕೆಲ ಸರಕಾರಿ ಅಧಿಕಾರಿಗಳು, ನೌಕರರು ಕೂಡ ರಾಜಕೀಯ ನಾಯಕರ ಜೊತೆ ಪೈಪೋಟಿಗಿಳಿದು ಲಂಚ ತಿಂದು, ದೇಶ ದೋಚುತ್ತಿದ್ದಾರೆ.
ಮಧ್ಯಪ್ರದೇಶದ ಜಬಲ್‌ಪುರ ನಗರದಲ್ಲಿ ಇತ್ತೀಚೆಗೆ ನಡೆದ ಆರ್‌ಟಿಒ ಅಧಿಕಾರಿಯ ಘಟನೆ ಇದಕ್ಕೆ ಸಾಕ್ಷಿಯಾಗಿದೆ. ಆಗಸ್ಟ್ 18 ರಂದು, ಆರ್ಥಿಕ ಅಪರಾಧ ವಿಭಾಗದ ಅಧಿಕಾರಿಗಳು ಜಬಲ್‌ಪುರ ನಗರದಲ್ಲಿ ಆರ್‌ಟಿಒ ಅಧಿಕಾರಿ ಸಂತೋಷ್ ಪಾಲ್ ಅವರ ಮನೆಯಲ್ಲಿ ಶೋಧ ನಡೆಸಿದರು.
ಸಂತೋಷ್ ಪಾಲ್ ಅವರ ಪತ್ನಿ ಲೇಖಾ ಪಾಲ್ ಅವರು ಪತಿ ಕಾರ್ಯನಿರ್ವಹಿಸುತ್ತಿರುವ ಅದೇ ಆರ್‌ಟಿಒ ಕಚೇರಿಯಲ್ಲಿ ಗುಮಾಸ್ತೆಯಾಗಿ ಕೆಲಸ ಮಾಡುತ್ತಿದ್ದಾರೆ. ಸಂತೋಷ್ ಪೌಲ್ ಹಾಗೂ ಆತನ ಪತ್ನಿ ವಿರುದ್ಧ ದೂರು ಬಂದ ನಂತರ ಫೀಲ್ಡಿಗಿಳಿದ ಅಧಿಕಾರಿಗಳಿಗೆ ಬೆಚ್ಚಿ ಬೀಳಿಸುವ ಸತ್ಯ ಹೊರಬಿದ್ದಿದೆ. ಅವರ ಮನೆಯಲ್ಲಿ (ಆರ್‌ಟಿಒ ಜಬಲ್‌ಪುರ ಮನೆ) ಸೌಲಭ್ಯಗಳನ್ನು ನೋಡಿದ ನಂತರ ಅಧಿಕಾರಿಗಳೇ ದಂಗಾಗಿದ್ದಾರೆ. ಸಂತೋಷ್ ಪಾಲ್ ಅವರ ಮನೆಯಲ್ಲಿ ಐಷಾರಾಮಿ 5 ಸ್ಟಾರ್ ಹೋಟೆಲ್‌ನ ಎಲ್ಲಾ ಸೌಲಭ್ಯಗಳನ್ನು ಕಂಡು EOW ಅಧಿಕಾರಿಗಳು ಆಶ್ಚರ್ಯಚಕಿತರಾಗಿದ್ದಾರೆ.
10,000 ಚದರ ಅಡಿಯ ಐಷಾರಾಮಿ ಮನೆ.. ಮನೆಯಲ್ಲಿ ಈಜುಕೊಳ, ದುಬಾರಿ ಜಕುಝಿ ಬಾತ್‌ಟಬ್, ಮಿನಿ ಬಾರ್, ಹೋಮ್ ಥಿಯೇಟರ್, ಮನೆಯಲ್ಲಿ ಸಂತೋಷ್ ಪಾಲ್‌ಗೆ ವಿಶೇಷ ಕಚೇರಿ ವಸತಿ ಇದೆ.
ತನಿಖೆಯಲ್ಲಿ ಬೆಳಕಿಗೆ ಬಂದಿರುವ ಮತ್ತೊಂದು ಆಘಾತಕಾರಿ ವಿಷಯ ಏನೆಂದರೆ, ಈ ಗಂಡ ಹೆಂಡತಿಗೆ ಒಟ್ಟು ಐದು ಮನೆಗಳಿವೆ. ಫಾರ್ಮ್ ಹೌಸ್ ಕೂಡ ಇತ್ತು ಎಂದು ಅಧಿಕಾರಿಗಳು ತೀರ್ಮಾನಿಸಿದ್ದಾರೆ. ಇಡಬ್ಲ್ಯೂಒ ಅಧಿಕಾರಿಗಳ ತನಿಖೆಯಿಂದ ದುಬಾರಿ ಕಾರು, ಎಸ್‌ಯುವಿ ಹಾಗೂ ಎರಡು ದುಬಾರಿ ದ್ವಿಚಕ್ರ ವಾಹನಗಳು ಇರುವುದು ಬೆಳಕಿಗೆ ಬಂದಿದೆ.
ಗಂಡ ಹೆಂಡತಿಯ ಆದಾಯಕ್ಕೆ ಹೋಲಿಸಿದರೆ ಅವರ ಆಸ್ತಿ ಆದಾಯಕ್ಕಿಂತ 650 ಪಟ್ಟು ಹೆಚ್ಚಾಗಿದೆ ಎಂದು ಇಒಡಬ್ಲ್ಯೂ ಎಸ್‌ಪಿ ದೇವೇಂದ್ರ ಸಿಂಗ್ ರಜಪೂತ್ ಹೇಳಿದ್ದಾರೆ. ಬುಧವಾರ ಮಧ್ಯರಾತ್ರಿಯಿಂದ ನಡೆದ ಶೋಧಕಾರ್ಯದಲ್ಲಿ 16 ಲಕ್ಷ ಹಣ, ಚಿನ್ನಾಭರಣ ಹಾಗೂ ಕೆಲವು ದಾಖಲೆಗಳನ್ನು ಅಧಿಕಾರಿಗಳು ವಶಪಡಿಸಿಕೊಂಡಿದ್ದಾರೆ. ಭ್ರಷ್ಟಾಚಾರದ ಹಣದಲ್ಲಿ ಐಷಾರಾಮಿ ಜೀವನ ನಡೆಸುತ್ತಿರುವ ಈ ಪತಿ-ಪತ್ನಿಯ ವಿರುದ್ಧ ಪೊಲೀಸರು ಭ್ರಷ್ಟಾಚಾರ ತಡೆ ಕಾಯ್ದೆಯಡಿ ಪ್ರಕರಣ ದಾಖಲಿಸಿಕೊಂಡು ತನಿಖೆ ನಡೆಸುತ್ತಿದ್ದಾರೆ.
