ಗುಜರಾತ್‌ನ ಕಚ್ ನಲ್ಲಿ ಕಳೆದ 24 ಗಂಟೆಗಳಲ್ಲಿ ಎರಡನೇ ಬಾರಿ ಕಂಪಿಸಿದ ಭೂಮಿ
ಕಚ್, ಜೂನ್ 15: ಗುಜರಾತ್‌ನ ಕಚ್ ನಲ್ಲಿ ಸೋಮವಾರ ಮಧ್ಯಾಹ್ನ ಭೂಕಂಪನ ಉಂಟಾಗಿದ್ದು, ರಿಕ್ಟರ್‌ ಮಾಪಕದಲ್ಲಿ 4.5 ತೀವ್ರತೆಯ ಭೂಕಂಪನ ತೋರಿಸಿದೆ. ಇಂದು ಸಂಭವಿಸಿದ ಭೂಕಂಪನ ಕಳೆದ 24 ಗಂಟೆಗಳಲ್ಲಿ ಎರಡನೇ ಬಾರಿ ಉಂಟಾಗಿದ್ದು, ಮಧ್ಯಾಹ್ನ 12:57 ರ ಸುಮಾರಿಗೆ ಕಂಪಿಸಿದೆ. ಈ ಮೊದಲು ಭಾನುವಾರ ರಾತ್ರಿ ಕೂಡ ಭೂ ಕಂಪಿಸಿದ ಅನುಭವವಾಗಿದೆ.
ಕಚ್‌ನಿಂದ 15 ಕಿ.ಮೀ ದೂರದಲ್ಲಿ ಭೂಕಂಪದ ಕೇಂದ್ರಬಿಂದು ದಾಖಲಾಗಿದ್ದು, ಇಲ್ಲಿಯವರೆಗೆ ಯಾವುದೇ ಸಾವು ನೋವುಗಳು ಅಥವಾ ಹಾನಿಗಳು ವರದಿಯಾಗಿಲ್ಲ.ಕಚ್‌ನಿಂದ 15 ಕಿ.ಮೀ ದೂರದಲ್ಲಿರುವ ಭಚೌ ಬಳಿ ಭಾನುವಾರ ರಾತ್ರಿ ಭೂಕಂಪ ಸಂಭವಿಸಿದೆ.
ಗುಜರಾತ್ ನಲ್ಲಿ ಭಾನುವಾರ ರಾತ್ರಿ ಸಂಭವಿಸಿದ ಭೂಕಂಪನ 5.3 ತೀವ್ರತೆಯನ್ನು ದಾಖಲಿಸಿದ್ದರೂ, ಆಸ್ತಿ ಅಥವಾ ಜೀವಕ್ಕೆ ಯಾವುದೇ ಹಾನಿ ಸಂಭವಿಸಿಲ್ಲ. ಭಾನುವಾರ ಸಂಭವಿಸಿದ ಭೂಕಂಪನದಿಂದ ಕಚ್ ಮತ್ತು ಅಕ್ಕ ಪಕ್ಕದ ಜಿಲ್ಲೆಗಳಲ್ಲಿನ ಕೆಲವು ಮನೆಗಳು ಬಿರುಕು ಬಿಟ್ಟಿವೆ ಎಂದು ವರದಿಗಳು ತಿಳಿಸಿವೆ.
