ಪತಂಜಲಿ ಸಂಸ್ಥೆಯ ಕೊರೊನಿಲ್ ಔಷಧಿ ಜಾಹೀರಾತಿಗೆ ಕೇಂದ್ರ ಸರ್ಕಾರ ತಡೆ
ಹೊಸದಿಲ್ಲಿ, ಜೂನ್ 24: ಆಯುರ್ವೇದ ಉತ್ಪನ್ನಗಳ ತಯಾರಿಕೆ ಸಂಸ್ಥೆಯಾದ ಪತಂಜಲಿ ಕೋವಿಡ್ -19 ಚಿಕಿತ್ಸೆಗಾಗಿ ಕೊರೊನಿಲ್ ಎಂಬ ಔಷಧಿಯನ್ನು ಬಿಡುಗಡೆ ಮಾಡಿದ್ದು, ಕೆಲವೇ ದಿನಗಳಲ್ಲಿ ಈ ಔಷಧಿ ಕೊರೊನಾ ಸೋಂಕಿತರನ್ನು ಗುಣಪಡಿಸುತ್ತದೆ ಎಂದು ಹೇಳಿಕೊಂಡಿದೆ. ಆದರೆ ಕೇಂದ್ರ ಸರ್ಕಾರದ ಆಯುಷ್ ಸಚಿವಾಲಯ ಪತಂಜಲಿ ಸಂಸ್ಥೆಗೆ ಔಷಧಿಯನ್ನು ಸಂಪೂರ್ಣವಾಗಿ ಪರೀಕ್ಷಿಸಿ ದೃಢೀಕರಿಸುವವರೆಗೂ ಅದರ ಬಗ್ಗೆ ಪ್ರಚಾರ ಮಾಡುವುದನ್ನು ನಿಲ್ಲಿಸುವಂತೆ
ಕೇಳಿಕೊಂಡಿದೆ.
ಮಂಗಳವಾರ ಕೊರೊನಿಲ್ ಎಂಬ ಔಷಧಿಯನ್ನು ಬಿಡುಗಡೆ ಮಾಡಿ ಮಾತನಾಡಿದ ಯೋಗಗುರು ರಾಮದೇವ್, ಕೊರೊನಾ ಸೋಂಕಿನ ಚಿಕಿತ್ಸೆಗಾಗಿ ಇಡೀ ವಿಶ್ವ ಚುಚ್ಚುಮದ್ದು ಅಥವಾ ಔಷಧಕ್ಕಾಗಿ ಕಾಯುತ್ತಿದ್ದು, ನಾವು ಕೊರೊನಿಲ್ ಮತ್ತು ಸ್ವಾಸರಿ ಎಂಬ ಕೊರೊನಾ ಕಿಟ್ ಅನ್ನು ಬಿಡುಗಡೆ ಮಾಡುವ ಮೂಲಕ ಆ ಕಾಯುವಿಕೆಯನ್ನು ಕೊನೆಗೊಳಿಸಿದ್ದೇವೆ. ಈ ಔಷಧವನ್ನು ಸೇವಿಸಿದರೆ ಕೊರೋನಾ ಸೋಂಕಿತರು 3ರಿಂದ 7 ದಿನಗಳ ಒಳಗಾಗಿ ಗುಣಮುಖರಾಗುತ್ತಾರೆ ಎಂದು ಹೇಳಿದರು.
ಪತಂಜಲಿಯ ಸಿಇಒ ಆಚಾರ್ಯ ಬಾಲಕೃಷ್ಣ ಕೊರೊನಿಲ್ ಔಷಧವನ್ನು ಅಶ್ವಗಂಧ, ಅಮೃತಬಳ್ಳಿ ಮತ್ತು ತುಳಸಿಯ ಮಿಶ್ರಣದೊಂದಿಗೆ ತಯಾರಿಸಲಾಗಿದ್ದು, ಈ ಔಷಧದಿಂದ ಕೊರೊನಾ ಸೋಂಕಿತರು ಶೇ.100 ಚೇತರಿಸಿಕೊಳ್ಳುತ್ತಾರೆ. 30 ದಿನಗಳವರೆಗೆ ಬರುವ ಕೊರೊನಾ ಕಿಟ್ 545 ರೂ. ದರದಲ್ಲಿ ಲಭ್ಯವಿದೆ ಎಂದು ಹೇಳಿದ್ದರು.
ಆದರೆ ಆಯುಷ್ ಸಚಿವಾಲಯ ಪತಂಜಲಿ ಸಂಶೋಧನೆಯ ವೈಜ್ಞಾನಿಕ ಅಧ್ಯಯನದ ಹಕ್ಕು ಮತ್ತು ವಿವರಗಳು ನಮಗೆ ತಿಳಿದಿಲ್ಲ. ಔಷಧಿಯ ಸಂಪೂರ್ಣ ವಿವರಗಳನ್ನು ಪತಂಜಲಿ ಸಂಸ್ಥೆಯಲ್ಲಿ ಕೋರಲಾಗಿದ್ದು, ಹಕ್ಕುಗಳನ್ನು ಸಂಪೂರ್ಣವಾಗಿ ಪರಿಶೀಲಿಸುವವರೆಗೆ ಔಷಧಿ ಪ್ರಚಾರ ಮಾಡದಂತೆ ಆಯುಷ್ ಪತಂಜಲಿ ಸಂಸ್ಥೆಗೆ ತಿಳಿಸಿದ್ದು, ಪತಂಜಲಿಯವರ ಔಷಧಿಗಳ ಜಾಹೀರಾತನ್ನು ಡ್ರಗ್ಸ್ ಮತ್ತು ಮ್ಯಾಜಿಕ್ ರೆಮಿಡೀಸ್ (ಆಕ್ಷೇಪಾರ್ಹ ಜಾಹೀರಾತುಗಳು) ಕಾಯ್ದೆ 1954 ರ ಅಡಿಯಲ್ಲಿ ನಿಯಂತ್ರಿಸಲಾಗುತ್ತದೆ ಎಂದು ತಿಳಿಸಿದೆ.
