ಪ್ರಧಾನಿ ನರೇಂದ್ರ ಮೋದಿಗೆ ಈ ವರ್ಷ 75 ವರ್ಷ ಆಗುತ್ತಿರುವ ಹಿನ್ನೆಲೆ, ಭಾರತೀಯ ಜನತಾ ಪಾರ್ಟಿಯಲ್ಲಿ ಮುಂದಿನ ನಾಯಕತ್ವದ ಬಗ್ಗೆ ಚರ್ಚೆಗಳು ತೀವ್ರಗೊಂಡಿದೆ. ಈ ಕುರಿತು ಸ್ಪಷ್ಟನೆ ನೀಡಿದ ಬಿಜೆಪಿ ಶಾಸಕ ಶ್ರೀವತ್ಸ, ಪಕ್ಷದಲ್ಲಿ ನಾಯಕತ್ವ ಬದಲಾವಣೆಯ ವಿಷಯದಲ್ಲಿ ಯಾವುದೇ ಗೊಂದಲವಿಲ್ಲವೆಂದು ಹೇಳಿದ್ದಾರೆ.
ಮಾಧ್ಯಮಗಳೊಂದಿಗೆ ಮಾತನಾಡಿದ ಶ್ರೀವತ್ಸ, ಬಿಜೆಪಿಯು ಒಂದು ಸಂಘಟಿತ ಪಕ್ಷ. ಇಲ್ಲಿ ವ್ಯಕ್ತಿಗಿಂತ ಪಕ್ಷ ಮುಖ್ಯ. ಪ್ರಧಾನಿ ಮೋದಿಗೆ ಪರ್ಯಾಯ ನಾಯಕರು ನಮ್ಮಲ್ಲಿಯೇ ಸಾಕಷ್ಟು ಮಂದಿ ಇದ್ದಾರೆ. ನೇತೃತ್ವದ ಕೊರತೆಯೇನೂ ಇಲ್ಲ. ಪಕ್ಷದಲ್ಲಿ ನೂರಾರು ಪ್ರಬಲ ನಾಯಕರು ಇದ್ದಾರೆ, ಎಂದರು.
ಉಮಾಭಾರತಿ ಮಾದರಿ ಉದಾಹರಣೆ
ಉಮಾಭಾರತಿ ಪಾರ್ಟಿ ಬಿಟ್ಟಾಗಲೂ ಬಿಜೆಪಿ ಮುಂದುವರಿದಿತ್ತು. ಅದೇ ರೀತಿ, ಯಾವುದೇ ವ್ಯಕ್ತಿ ಹೋದರೂ ಪಕ್ಷದ ಪ್ರಭಾವ ಕೆಳಗೆ ಬರುವುದಿಲ್ಲ. ಗುಜರಾತ್ನಲ್ಲಿ ಮೋದಿಗೆ ಒಮ್ಮೊಮ್ಮೆ ನಾಯಕತ್ವ ನೀಡಲಾಗಿತ್ತು, ಆದರೆ ಅದರ ಹಿಂದೆಯೂ ಸಂಘಟನೆ ಶಕ್ತಿ ಮುಖ್ಯವಾಗಿತ್ತು, ಎಂದು ಹೇಳಿದರು.
ವ್ಯಕ್ತಿಗತ ನಾಯಕತ್ವಕ್ಕಿಂತ ಸಂಘಟನೆಯ ಶಕ್ತಿ ಮುಖ್ಯ
ಭಾರತೀಯ ಜನತಾ ಪಾರ್ಟಿಯ ತಳಮಟ್ಟದಿಂದಲೂ ನಾಯಕರು ಬೆಳೆದಿದ್ದಾರೆ. ನೂರಾರು ಮಂದಿ ದೇಶದ ಪ್ರಜ್ಞಾವಂತ ನಾಯಕರಾಗಿ ನಿರ್ಮಾಣವಾಗುತ್ತಿದ್ದಾರೆ. ಈ ಪಕ್ಷದ ತಳಹದಿಯೇ ವ್ಯಕ್ತಿಗತ ನಾಯಕತ್ವವಲ್ಲ, ಬದಲಾಗಿ ಸಿದ್ಧಾಂತ, ಸಂಘಟನೆ ಮತ್ತು ನಿಷ್ಠೆಯ ಮೇಲೆ ನಿಂತಿದೆ ಎಂದು ಅವರು ಹೇಳಿದರು.
