ಕಲಬುರಗಿ ಜಿಲ್ಲೆಯ ಅಫ್ಝಲ್ಪುರ ತಾಲೂಕಿನ ದೇವಲ ಗಾಣಗಾಪುರ ಗ್ರಾಮದ ಯುವತಿ ಪಲ್ಲವಿ ಹೊಸಮನಿ ಕೇವಲ ಮೂರು ವರ್ಷಗಳಲ್ಲಿ ಒಂಬತ್ತು ಸರ್ಕಾರಿ ಹುದ್ದೆಗಳನ್ನು ಗಳಿಸುವ ಮೂಲಕ ರಾಜ್ಯದಾದ್ಯಂತ ಗಮನ ಸೆಳೆದಿದ್ದಾರೆ. ಮಧ್ಯಮ ವರ್ಗದ ಕುಟುಂಬದಿಂದ ಬಂದ ಪಲ್ಲವಿ, ಬಿ.ಟೆಕ್ (ಕೃಷಿ ವಿಭಾಗ) ಪದವಿ ಪಡೆದಿದ್ದಾರೆ. ಲಾಸ್ಟ್ ಬೆಂಚ್ ವಿದ್ಯಾರ್ಥಿನಿಯಾಗಿದ್ದ ಇವರು, ಪದವಿ ನಂತರ ಕೆಲಸ ಸಿಗದೇ ನಿರಾಶರಾದರು. ಆದರೆ, ಒಬ್ಬ ಸರ್ಕಾರಿ ಉದ್ಯೋಗಿಯ ಸಲಹೆಯಿಂದ ಸ್ಪರ್ಧಾತ್ಮಕ ಪರೀಕ್ಷೆಗಳತ್ತ ಒಲವು ಬೆಳೆಸಿಕೊಂಡು, ತಮ್ಮ ಜೀವನವನ್ನೇ ಬದಲಾಯಿಸಿಕೊಂಡರು.
ಪಲ್ಲವಿ ಅವರ ಯಶಸ್ಸಿನ ಹಿಂದಿನ ಕಥೆ
ಯಶಸ್ಸಿನ ಹಾದಿಯಲ್ಲಿ ಅನೇಕ ಸವಾಲುಗಳನ್ನು ಎದುರಿಸಿದ ಪಲ್ಲವಿ, ತಂದೆ ನಾಗೇಶ್ ಹೊಸಮನಿ ಮತ್ತು ತಾಯಿ ವಿಜಯಲಕ್ಷ್ಮೀ ಅವರ ಪ್ರೋತ್ಸಾಹಕ್ಕೆ ಕೃತಜ್ಞತೆ ಸಲ್ಲಿಸುತ್ತಾರೆ. ಧಾರವಾಡದಲ್ಲಿ ಅಧ್ಯಯನ ಮಾಡುತ್ತಿದ್ದಾಗ, ಆರ್ಥಿಕ ಸಮಸ್ಯೆಗಳನ್ನು ಎದುರಿಸಿದರೂ, ತಮ್ಮ ಗುರಿಯಿಂದ ವಿಮುಖರಾಗಲಿಲ್ಲ. ತಮ್ಮ ಕಷ್ಟಗಳನ್ನು ಮೆಟ್ಟಿನಿಂತು, ಕಠಿಣ ಪರಿಶ್ರಮ ಮತ್ತು ಸ್ವಯಂ ಅಧ್ಯಯನಕ್ಕೆ ಒತ್ತು ನೀಡಿದ್ದರಿಂದ ಈ ಮಹತ್ತರ ಸಾಧನೆ ಮಾಡಲು ಸಾಧ್ಯವಾಯಿತು ಎಂದು ಅವರು ಹೇಳಿದ್ದಾರೆ. ಪಲ್ಲವಿ ಅವರ ತಂದೆ, ಮಗಳ ಈ ಸಾಧನೆಗೆ ಹೆಮ್ಮೆ ಪಟ್ಟಿದ್ದಾರೆ.
ಪಲ್ಲವಿ ಗಳಿಸಿದ 9 ಹುದ್ದೆಗಳು
ಪಲ್ಲವಿ ಹೊಸಮನಿ ಅವರು ಕೇವಲ ಮೂರು ವರ್ಷಗಳಲ್ಲಿ ವಿವಿಧ ಇಲಾಖೆಗಳಲ್ಲಿ ಗಳಿಸಿದ ಒಂಬತ್ತು ಹುದ್ದೆಗಳ ವಿವರ ಇಲ್ಲಿದೆ:
* ಕೆಪಿಟಿಸಿಎಲ್ನಲ್ಲಿ ದ್ವಿತೀಯ ದರ್ಜೆ ಸಹಾಯಕ (2023)
* ಡಿಸಿಸಿ ಬ್ಯಾಂಕ್ನಲ್ಲಿ ಪ್ರಥಮ ದರ್ಜೆ ಸಹಾಯಕ (2023)
* ಕಾರ್ಮಿಕ ಇಲಾಖೆಯಲ್ಲಿ ಲೇಬರ್ ಇನ್ಸ್ಪೆಕ್ಟರ್ (2023)
* ಸಾಕ್ಷ್ಯಚಿತ್ರ ಮತ್ತು ಆರ್ಥಿಕ ಇಲಾಖೆಯಲ್ಲಿ ಡಾಟಾ ಎಂಟ್ರಿ (2023)
* ಕೆಆರ್ಐಡಿಎಲ್ನಲ್ಲಿ ಪ್ರಥಮ ದರ್ಜೆ ಸಹಾಯಕ (2023)
* ಕಾರ್ಮಿಕ ಇಲಾಖೆಯಲ್ಲಿ ಫೀಲ್ಡ್ ಇನ್ಸ್ಪೆಕ್ಟರ್ (2023)
* ಆಹಾರ ಮತ್ತು ನಾಗರಿಕ ಸರಬರಾಜು ಇಲಾಖೆಯಲ್ಲಿ ಪ್ರಥಮ ದರ್ಜೆ ಸಹಾಯಕ (2023)
* ವಾಣಿಜ್ಯ ತೆರಿಗೆ ಇಲಾಖೆಯಲ್ಲಿ ಇನ್ಸ್ಪೆಕ್ಟರ್ (2024)
* ಪಂಚಾಯತ್ ಅಭಿವೃದ್ಧಿ ಅಧಿಕಾರಿ (ಪಿಡಿಒ) (2025)
ಇತರ ಸ್ಪರ್ಧಾರ್ಥಿಗಳಿಗೆ ಪಲ್ಲವಿ ಅವರ ಸಲಹೆ ಏನು?
* ಮುಂಜಾನೆಯ ಅಧ್ಯಯನ: ದಿನವಿಡೀ ಓದುವ ಬದಲು ಮುಂಜಾನೆ ಎದ್ದು 4-5 ಗಂಟೆ ಅಧ್ಯಯನ ಮಾಡುವುದು ಹೆಚ್ಚು ಪರಿಣಾಮಕಾರಿ.
* ಸ್ವಯಂ ಅಧ್ಯಯನ: ಕೋಚಿಂಗ್ ಕೇಂದ್ರಗಳು ದಾರಿ ತೋರಿಸಿದರೂ, ಯಶಸ್ಸು ಗಳಿಸಲು ಕಠಿಣ ಸ್ವಯಂ ಅಧ್ಯಯನವೇ ನಿರ್ಣಾಯಕ.
* ಆತ್ಮವಿಶ್ವಾಸ ಮತ್ತು ದೃಢತೆ: ಎಷ್ಟೇ ಕಷ್ಟ ಬಂದರೂ ಗುರಿ ಮುಟ್ಟುವ ಛಲ ಇರಬೇಕು. ಆರ್ಥಿಕ ಮತ್ತು ಕುಟುಂಬದ ಸಮಸ್ಯೆಗಳು ನಿಮ್ಮ ಕನಸಿಗೆ ಅಡ್ಡ ಬರಲು ಬಿಡಬೇಡಿ.
