ಭಾರತದ ದೈತ್ಯ ಉದ್ಯಮ ಸಮೂಹ ರಿಲಯನ್ಸ್ ಇಂಡಸ್ಟ್ರೀಸ್, ಇದೀಗ ದೇಶದ 30,000 ಕೋಟಿ ರೂಪಾಯಿ ಮೌಲ್ಯದ ಪ್ಯಾಕೇಜ್ಡ್ ಕುಡಿಯುವ ನೀರಿನ ಮಾರುಕಟ್ಟೆಗೆ ಲಗ್ಗೆ ಇಟ್ಟಿದೆ. ಮುಕೇಶ್ ಅಂಬಾನಿ ನೇತೃತ್ವದ ಕಂಪನಿಯು ‘ಕ್ಯಾಂಪಾ ಶ್ಯೂರ್’ (Campa Sure) ಎಂಬ ಹೊಸ ಬ್ರಾಂಡ್ ಅನ್ನು ಪರಿಚಯಿಸಿದ್ದು, ಜಿಯೋ ಮಾದರಿಯಲ್ಲೇ ಕಡಿಮೆ ಬೆಲೆಯ ಮೂಲಕ ಇಡೀ ಉದ್ಯಮದಲ್ಲಿ ಸಂಚಲನ ಮೂಡಿಸಿದೆ.
ರಿಲಯನ್ಸ್ನ ಹೊಸ ಆಟ: ಸ್ಥಳೀಯರ ಜೊತೆ ಮೈತ್ರಿ
Related posts
ಈ ಬಾರಿ ರಿಲಯನ್ಸ್ ಯಾವುದೇ ಕಂಪನಿಯನ್ನು ಖರೀದಿಸುವ ಬದಲು, ವಿಭಿನ್ನವಾದ ತಂತ್ರವನ್ನು ಅನುಸರಿಸುತ್ತಿದೆ. ರಿಲಯನ್ಸ್ ಕನ್ಸ್ಯೂಮರ್ ಪ್ರಾಡಕ್ಟ್ಸ್ (ಆರ್ಸಿಪಿಎಲ್), ದೇಶದ ವಿವಿಧ ಭಾಗಗಳಲ್ಲಿರುವ ಸಣ್ಣ ಮತ್ತು ಮಧ್ಯಮ ಗಾತ್ರದ ಪ್ರಾದೇಶಿಕ ನೀರಿನ ಬಾಟ್ಲಿಂಗ್ ತಯಾರಕರೊಂದಿಗೆ ಪಾಲುದಾರಿಕೆ ಮಾಡಿಕೊಳ್ಳಲು ಮುಂದಾಗಿದೆ. ಈ ಮೂಲಕ, ಬಾಟ್ಲಿಂಗ್, ಅತ್ಯಾಧುನಿಕ ತಂತ್ರಜ್ಞಾನ ಮತ್ತು ಬ್ರಾಂಡಿಂಗ್ಗೆ ಸಹಕಾರ ನೀಡಿ, ಸ್ಥಳೀಯ ಉದ್ಯಮಗಳನ್ನು ಜೊತೆಯಾಗಿ ಬೆಳೆಸುವ ಗುರಿ ಹೊಂದಿದೆ.
ಆರ್ಸಿಪಿಎಲ್ ನಿರ್ದೇಶಕ ಟಿ ಕೃಷ್ಣಕುಮಾರ್ ಅವರ ಪ್ರಕಾರ, “ನಾವು ಈಗಾಗಲೇ ಉತ್ತರ ಭಾರತದ ಸುಮಾರು 24 ಪ್ರಾದೇಶಿಕ ತಯಾರಕರೊಂದಿಗೆ ಮಾತುಕತೆ ನಡೆಸುತ್ತಿದ್ದೇವೆ. ಈ ಸಹಭಾಗಿತ್ವವು ಸಣ್ಣ ಬ್ರಾಂಡ್ಗಳಿಗೂ ಉತ್ತಮ ಗುಣಮಟ್ಟದ ಮಾನದಂಡಗಳನ್ನು ತಲುಪಲು ಸಹಾಯ ಮಾಡುತ್ತದೆ ಮತ್ತು ಈ ಉದ್ಯಮವನ್ನು ಪ್ರಜಾಪ್ರಭುತ್ವಗೊಳಿಸುತ್ತದೆ.”
ಮಾರುಕಟ್ಟೆಯಲ್ಲಿ ಬೆಲೆ ಸಮರದ ಬಿರುಗಾಳಿ
‘ಕ್ಯಾಂಪಾ ಶ್ಯೂರ್’ ಬ್ರಾಂಡ್ನ ಪ್ರಮುಖ ಅಸ್ತ್ರವೇ ಅದರ ಬೆಲೆ. ಮಾರುಕಟ್ಟೆಯಲ್ಲಿ ಈಗಾಗಲೇ ಪ್ರಾಬಲ್ಯ ಹೊಂದಿರುವ ಬಿಸ್ಲೆರಿ, ಕೋಕಾ-ಕೋಲಾದ ಕಿನ್ಲೆ ಮತ್ತು ಪೆಪ್ಸಿಕೋದ ಅಕ್ವಾಫಿನಾದಂತಹ ಬ್ರಾಂಡ್ಗಳಿಗಿಂತ ಶೇಕಡ 20-30ರಷ್ಟು ಕಡಿಮೆ ದರದಲ್ಲಿ ನೀರನ್ನು ಮಾರಾಟ ಮಾಡಲು ರಿಲಯನ್ಸ್ ನಿರ್ಧರಿಸಿದೆ.
ದರ ಪಟ್ಟಿ ಹೀಗಿದೆ:
* ಒಂದು ಲೀಟರ್ ಬಾಟಲಿ:ಇತರೆ ಬ್ರಾಂಡ್ಗಳು 20 ರೂ.ಗೆ ಮಾರಾಟ ಮಾಡಿದರೆ, ಕ್ಯಾಂಪಾ ಶ್ಯೂರ್ ಕೇವಲ 15 ರೂ.ಗೆ ಲಭ್ಯವಾಗಲಿದೆ.
*ಎರಡು ಲೀಟರ್ ಪ್ಯಾಕ್:ಪ್ರತಿಸ್ಪರ್ಧಿಗಳ ಬೆಲೆ 30-35 ರೂ. ಇದ್ದರೆ, ಕ್ಯಾಂಪಾ ಶ್ಯೂರ್ 25 ರೂ.ಗೆ ಸಿಗಲಿದೆ.
*ಸಣ್ಣ ಪ್ಯಾಕ್: 250 ಮಿಲಿಲೀಟರ್ ಬಾಟಲಿಯ ಬೆಲೆ ಕೇವಲ 5 ರೂ.ನಿಂದ ಆರಂಭವಾಗಲಿದೆ.
ರಿಲಯನ್ಸ್ನ ಈ ನಡೆ, ತಂಪು ಪಾನೀಯಗಳ ಮಾರುಕಟ್ಟೆಯಲ್ಲಿ ‘ಕ್ಯಾಂಪಾ ಕೋಲಾ’ ಸೃಷ್ಟಿಸಿದ ಪರಿಣಾಮವನ್ನು ನೆನಪಿಸುತ್ತಿದೆ. ಕ್ಯಾಂಪಾ ಕೋಲಾವನ್ನು ಕಡಿಮೆ ಬೆಲೆಗೆ ಬಿಡುಗಡೆ ಮಾಡಿದಾಗ, ಪೆಪ್ಸಿ ಮತ್ತು ಕೋಕಾ-ಕೋಲಾ ತಮ್ಮ ಉತ್ಪನ್ನಗಳ ಬೆಲೆ ಇಳಿಸಲು ಮತ್ತು ಸಣ್ಣ ಪ್ಯಾಕ್ಗಳನ್ನು ಬಿಡುಗಡೆ ಮಾಡುವುದು ಅನಿವಾರ್ಯವಾಗಿತ್ತು. ಈಗ ನೀರಿನ ಮಾರುಕಟ್ಟೆಯಲ್ಲೂ ಅದೇ ಪರಿಸ್ಥಿತಿ ಮರುಕಳಿಸುವ ಸಾಧ್ಯತೆ ದಟ್ಟವಾಗಿದೆ. ತಮ್ಮ ಮಾರುಕಟ್ಟೆ ಪಾಲನ್ನು ಉಳಿಸಿಕೊಳ್ಳಲು ಬಿಸ್ಲೆರಿ, ಕೋಕ್ ಮತ್ತು ಪೆಪ್ಸಿಕೋ ಬ್ರಾಂಡಿಂಗ್ ಮತ್ತು ಪ್ರಚಾರದ ವೆಚ್ಚವನ್ನು ಹೆಚ್ಚಿಸಲು ಸಿದ್ಧತೆ ನಡೆಸುತ್ತಿವೆ.
ಕೇವಲ ಬೆಲೆ ಸಮರವಲ್ಲ, ಗುಣಮಟ್ಟದ ಗುರಿ
“ನಮ್ಮ ಗುರಿ ಕೇವಲ ಮಾರುಕಟ್ಟೆಯಲ್ಲಿ ಸಂಚಲನ ಸೃಷ್ಟಿಸುವುದಲ್ಲ, ಬದಲಿಗೆ ಗ್ರಾಹಕರಿಗೆ ನ್ಯಾಯಯುತ ಬೆಲೆಯಲ್ಲಿ ಗುಣಮಟ್ಟದ ಉತ್ಪನ್ನಗಳನ್ನು ಒದಗಿಸುವುದು,” ಎನ್ನುತ್ತಾರೆ ಕೃಷ್ಣಕುಮಾರ್. ಪ್ರಾದೇಶಿಕ ತಯಾರಕರೊಂದಿಗೆ ಕೈಜೋಡಿಸುವುದರಿಂದ ದೇಶದಲ್ಲಿ ಹೆಚ್ಚುತ್ತಿರುವ ನಕಲಿ ಬಾಟಲಿ ನೀರಿನ ಹಾವಳಿಯನ್ನು ತಡೆಯಬಹುದು ಎಂಬ ವಿಶ್ವಾಸವನ್ನು ಅವರು ವ್ಯಕ್ತಪಡಿಸಿದ್ದಾರೆ.
ರಿಲಯನ್ಸ್ ಈಗಾಗಲೇ ‘ಇಂಡಿಪೆಂಡೆನ್ಸ್’ ಎಂಬ ಪ್ರೀಮಿಯಂ ಬ್ರಾಂಡ್ ನೀರನ್ನು ಮಾರಾಟ ಮಾಡುತ್ತಿದ್ದು, ‘ಕ್ಯಾಂಪಾ ಶ್ಯೂರ್’ ಮೂಲಕ ಸಾಮಾನ್ಯ ಗ್ರಾಹಕರನ್ನು ತಲುಪುವ ಬಹು-ಬ್ರಾಂಡ್ ತಂತ್ರವನ್ನು ಅಳವಡಿಸಿಕೊಂಡಿದೆ.
ಸಮಯಕ್ಕೆ ಸರಿಯಾಗಿ ಸಿಕ್ಕ ಜಿಎಸ್ಟಿ ಬೂಸ್ಟ್
ಇತ್ತೀಚೆಗೆ ಸರ್ಕಾರವು ಪ್ಯಾಕೇಜ್ಡ್ ನೀರಿನ ಮೇಲಿನ ಜಿಎಸ್ಟಿಯನ್ನು ಶೇ. 18 ರಿಂದ ಶೇ. 5ಕ್ಕೆ ಇಳಿಸಿತ್ತು. ಇದು ರಿಲಯನ್ಸ್ನ ಆಕ್ರಮಣಕಾರಿ ಬೆಲೆ ನೀತಿಗೆ ಮತ್ತಷ್ಟು ನೆರವಾಗಿದೆ. ಮೊದಲ ಹಂತವಾಗಿ, ಮುಂದಿನ ಎರಡು ವಾರಗಳಲ್ಲಿ ‘ಕ್ಯಾಂಪಾ ಶ್ಯೂರ್’ ಉತ್ತರ ಭಾರತದ ಮಾರುಕಟ್ಟೆಗಳಲ್ಲಿ ಲಭ್ಯವಾಗಲಿದ್ದು, ಶೀಘ್ರದಲ್ಲೇ ದೇಶದಾದ್ಯಂತ ವಿಸ್ತರಿಸುವ ಯೋಜನೆ ಹೊಂದಿದೆ.
