ಗಾಂಧಿನಗರದಲ್ಲಿ ಹೊಸ ಇತಿಹಾಸ ಸೃಷ್ಟಿಯಾಗಿದೆ. 2025ರ ವರ್ಷಾಂತ್ಯಕ್ಕೆ ಕನ್ನಡ ಚಿತ್ರರಂಗದಲ್ಲಿ ಅಕ್ಷರಶಃ ಸುನಾಮಿಯೊಂದು ಅಪ್ಪಳಿಸಿದೆ. ಇಷ್ಟು ದಿನ ಬರೀ ಟ್ರೈಲರ್ ಮತ್ತು ಹಾಡುಗಳ ಮೂಲಕ ಕುತೂಹಲದ ಕಿಚ್ಚು ಹಚ್ಚಿದ್ದ ಬಹುನಿರೀಕ್ಷಿತ ಚಿತ್ರ 45 ಇಂದು ರಾಜ್ಯಾದ್ಯಂತ ತೆರೆಕಂಡು, ಚಿತ್ರಮಂದಿರಗಳನ್ನು ಹೌಸ್ ಫುಲ್ ಬೋರ್ಡ್ಗಳಿಂದ ಅಲಂಕರಿಸಿದೆ. ತ್ರಿಮೂರ್ತಿಗಳಾದ ಹ್ಯಾಟ್ರಿಕ್ ಹೀರೋ ಶಿವರಾಜ್ ಕುಮಾರ್, ರಿಯಲ್ ಸ್ಟಾರ್ ಉಪೇಂದ್ರ ಮತ್ತು ರಾಜ್ ಬಿ ಶೆಟ್ಟಿ ಅವರ ಆರ್ಭಟಕ್ಕೆ ಬಾಕ್ಸ್ ಆಫೀಸ್ ರೆಕಾರ್ಡ್ಗಳು ಧೂಳಿಪಟವಾಗುವ ಲಕ್ಷಣಗಳು ಮೊದಲ ದಿನವೇ ಗೋಚರಿಸಿವೆ.
ಮ್ಯಾಜಿಕಲ್ ಕಂಪೋಸರ್ ಈಗ ಮಾಸ್ಟರ್ ಡೈರೆಕ್ಟರ್
ಇಷ್ಟು ದಿನ ತಮ್ಮ ಸ್ವರ ಮಾಧುರ್ಯದಿಂದ ಕನ್ನಡಿಗರನ್ನು ತೇಲಿಸುತ್ತಿದ್ದ ಮಾಂತ್ರಿಕ ಅರ್ಜುನ್ ಜನ್ಯ, ತಾವೇನು ಕಡಿಮೆ ಇಲ್ಲ ಎಂಬುದನ್ನು ಸಾಬೀತು ಮಾಡಿದ್ದಾರೆ. ಡೈರೆಕ್ಟರ್ ಕ್ಯಾಪ್ ತೊಟ್ಟ ಮೊದಲ ಪ್ರಯತ್ನದಲ್ಲೇ ಅವರು ಸಿಕ್ಸರ್ ಬಾರಿಸಿದ್ದಾರೆ. ಮೂವರು ಘಟಾನುಘಟಿ ನಟರನ್ನು ಒಂದೇ ಫ್ರೇಮ್ ನಲ್ಲಿ ತಂದು, ಅವರಿಗೆ ಸಮಾನವಾದ ಸ್ಕ್ರೀನ್ ಸ್ಪೇಸ್ ನೀಡಿ, ಕಥೆಯನ್ನು ರೋಚಕವಾಗಿ ಹೇಳುವಲ್ಲಿ ಜನ್ಯ ನೂರಕ್ಕೆ ನೂರು ಅಂಕ ಗಿಟ್ಟಿಸಿಕೊಂಡಿದ್ದಾರೆ. ಅವರ ನಿರ್ದೇಶನದ ಟೈಮಿಂಗ್ ಮತ್ತು ಮೇಕಿಂಗ್ ಶೈಲಿಗೆ ವಿಮರ್ಶಕರು ತಲೆದೂಗಿದ್ದಾರೆ.
ಅಭಿಮಾನಿಗಳಿಗೆ ರಸದೌತಣ ನೀಡಿದ ತ್ರಿಮೂರ್ತಿಗಳು
ಇದು ಬರೀ ಸಿನಿಮಾವಲ್ಲ, ಇದೊಂದು ನಟನಾ ರಾಕ್ಷಸರ ಸಂಗಮ. ಪರದೆಯ ಮೇಲೆ ಶಿವಣ್ಣನ ಎನರ್ಜಿ ನೋಡಿದರೆ ಎಂತವರಿಗೂ ರೋಮಾಂಚನವಾಗುತ್ತದೆ. ಅವರ ಖದರ್, ಉಪೇಂದ್ರ ಅವರ ಟ್ರೇಡ್ ಮಾರ್ಕ್ ಸ್ಟೈಲ್ ಮತ್ತು ವಿಭಿನ್ನ ಮ್ಯಾನರಿಸಂ ಹಾಗೂ ರಾಜ್ ಬಿ ಶೆಟ್ಟಿ ಅವರ ನೈಜ ಮತ್ತು ರಗಡ್ ನಟನೆ ಪ್ರೇಕ್ಷಕರಿಗೆ ಹಬ್ಬದ ಊಟ ಬಡಿಸಿದೆ. ಒಬ್ಬರಿಗಿಂತ ಒಬ್ಬರು ಪೈಪೋಟಿಗೆ ಬಿದ್ದವರಂತೆ ನಟಿಸಿದ್ದು, ಅಭಿಮಾನಿಗಳು ಸಿಳ್ಳೆ, ಕರತಾಡನಗಳ ಮೂಲಕ ಸ್ವಾಗತಿಸುತ್ತಿದ್ದಾರೆ.
ಚಿತ್ರಮಂದಿರಗಳೇ ಜಾತ್ರೆಯ ಮೈದಾನ
ಬೆಂಗಳೂರಿನ ಐತಿಹಾಸಿಕ ತ್ರಿವೇಣಿ ಚಿತ್ರಮಂದಿರ ಸೇರಿದಂತೆ ರಾಜ್ಯದ ಪ್ರಮುಖ ಥಿಯೇಟರ್ಗಳಲ್ಲಿ ಹಬ್ಬದ ವಾತಾವರಣ ನಿರ್ಮಾಣವಾಗಿದೆ. ಬೃಹತ್ ಕಟೌಟ್ ಗಳು, ಹಾಲಿನ ಅಭಿಷೇಕ ಮತ್ತು ಪಟಾಕಿಗಳ ಸದ್ದು ಮುಗಿಲು ಮುಟ್ಟಿದೆ. ವಿಶೇಷವೆಂದರೆ, ಕರುನಾಡ ಚಕ್ರವರ್ತಿ ಶಿವರಾಜ್ ಕುಮಾರ್ ಅವರು ಪತ್ನಿ ಗೀತಾ ಶಿವರಾಜ್ ಕುಮಾರ್ ಹಾಗೂ ಚಿತ್ರತಂಡದೊದಿಗೆ ಸಾಮಾನ್ಯರಂತೆ ಕುಳಿತು ಸಿನಿಮಾ ವೀಕ್ಷಿಸಿದ್ದು ಅಭಿಮಾನಿಗಳ ಪಾಲಿಗೆ ಬಂಪರ್ ಲಾಟರಿ ಹೊಡೆದಂತಾಗಿತ್ತು. ತಮ್ಮ ನೆಚ್ಚಿನ ನಟನ ಜೊತೆ ಸಿನಿಮಾ ನೋಡಿದ ಖುಷಿಯಲ್ಲಿ ಅಭಿಮಾನಿಗಳು ತೇಲಾಡಿದ್ದಾರೆ.
ಸುರಜ್ ಪ್ರೊಡಕ್ಷನ್ ಅಡಿಯಲ್ಲಿ ರಮೇಶ್ ರೆಡ್ಡಿ ಅವರು ಹಾಕಿದ ಬಂಡವಾಳ ಪರದೆಯ ಮೇಲಿನ ಅದ್ಧೂರಿತನದಲ್ಲಿ ಎದ್ದು ಕಾಣುತ್ತಿದೆ. ಮೇಕಿಂಗ್ ಕ್ವಾಲಿಟಿ, ಹಿನ್ನೆಲೆ ಸಂಗೀತ ಮತ್ತು ಛಾಯಾಗ್ರಹಣ ಎಲ್ಲವೂ ಹಾಲಿವುಡ್ ಮಟ್ಟದಲ್ಲಿದೆ. 2025ರ ಕೊನೆಯಲ್ಲಿ ಸ್ಯಾಂಡಲ್ ವುಡ್ ಗೆ ಅತಿದೊಡ್ಡ ಬೂಸ್ಟ್ ಸಿಕ್ಕಂತಾಗಿದ್ದು, ಹೊಸ ವರ್ಷವನ್ನು ಸ್ವಾಗತಿಸಲು ಸಜ್ಜಾಗಿರುವ ಸಿನಿಪ್ರಿಯರಿಗೆ 45 ಸಿನಿಮಾ ಒಂದು ಪಕ್ಕಾ ಮನರಂಜನೆಯ ಪ್ಯಾಕೇಜ್ ಆಗಿದೆ. ಒಟ್ಟಿನಲ್ಲಿ ಹೇಳುವುದಾದರೆ, 45 ಚಿತ್ರದ ಮೂಲಕ ಕನ್ನಡ ಚಿತ್ರರಂಗಕ್ಕೆ ಮತ್ತೊಂದು ಬ್ಲಾಕ್ ಬಸ್ಟರ್ ಹಿಟ್ ಸಿಕ್ಕಿದೆ.
