ಬೆಂಗಳೂರು: ಕಾಫಿ ಡೇ ಎಂದರೆ ಅದು ಕೇವಲ ಒಂದು ಬ್ರಾಂಡ್ ಅಲ್ಲ, ಅದು ಕಾಫಿ ಪ್ರಿಯರ ಪಾಲಿನ ಭಾವನೆ. ದಿವಂಗತ ವಿ.ಜಿ. ಸಿದ್ಧಾರ್ಥ್ ಅವರು ಕಟ್ಟಿಬೆಳೆಸಿದ ಈ ಸಾಮ್ರಾಜ್ಯ, ಅವರ ಅಕಾಲಿಕ ನಿಧನದ ನಂತರ ಬಿರುಗಾಳಿಗೆ ಸಿಕ್ಕಿದ ಹಡಗಿನಂತಾಗಿತ್ತು. ಸಾವಿರಾರು ಕೋಟಿ ಸಾಲ, ಹೂಡಿಕೆದಾರರ ಆತಂಕ, ಭವಿಷ್ಯದ ಬಗ್ಗೆ ಮೂಡಿದ್ದ ಕತ್ತಲು… ಇವೆಲ್ಲವನ್ನೂ ಕಂಡು ಎಂತಹವರೂ ಎದೆಗುಂದುತ್ತಿದ್ದರು. ಆದರೆ, ಸಿದ್ಧಾರ್ಥ್ ಅವರ ಪತ್ನಿ ಮಾಳವಿಕಾ ಹೆಗ್ಡೆ ಎದೆಗುಂದಲಿಲ್ಲ. ಪತಿಯ ಕನಸನ್ನು ಉಳಿಸಿಕೊಳ್ಳಲು ಜಟ್ಟಿಯಂತೆ ಅಖಾಡಕ್ಕಿಳಿದ ಅವರು, ಇದೀಗ ದೊಡ್ಡ ಗೆಲುವೊಂದನ್ನು ಸಾಧಿಸಿದ್ದಾರೆ. ಹೌದು, ಕೆಫೆ ಕಾಫಿ ಡೇ ಪಾಲಿಗೆ ಈಗೊಂದು ಬಿಗ್ ನ್ಯೂಸ್ ಸಿಕ್ಕಿದೆ.
ಆಕ್ಸಿಸ್ ಬ್ಯಾಂಕ್ ನೀಡಿದ ಸಿಹಿ ಸುದ್ದಿ
ಕೆಫೆ ಕಾಫಿ ಡೇಯ ಮಾತೃ ಸಂಸ್ಥೆಯಾದ ಕಾಫಿ ಡೇ ಎಂಟರ್ಪ್ರೈಸಸ್ಗೆ (CDEL) ಪ್ರಮುಖ ಸಾಲದಾತ ಸಂಸ್ಥೆಯಾದ ಆಕ್ಸಿಸ್ ಬ್ಯಾಂಕ್ ದೊಡ್ಡ ರಿಲೀಫ್ ನೀಡಿದೆ. ಸಾಲದ ಸುಳಿಯಲ್ಲಿ ಸಿಲುಕಿದ್ದ ಕಂಪನಿಯು ತನ್ನ ಬಾಕಿ ಸಾಲವನ್ನು ತೀರಿಸಲು ಒನ್ ಟೈಮ್ ಸೆಟಲ್ಮೆಂಟ್ (OTS) ಅಥವಾ ಏಕಕಾಲದ ಇತ್ಯರ್ಥಕ್ಕೆ ಪ್ರಸ್ತಾಪಿಸಿತ್ತು. ಇದಕ್ಕೆ ಆಕ್ಸಿಸ್ ಬ್ಯಾಂಕ್ ಒಪ್ಪಿಗೆ ಸೂಚಿಸಿದೆ.
ಈ ಒಪ್ಪಂದದ ಪ್ರಕಾರ, ಕಂಪನಿಯು ಆಕ್ಸಿಸ್ ಬ್ಯಾಂಕ್ಗೆ ಪಾವತಿಸಬೇಕಿದ್ದ ಬಾಕಿ ಸಾಲವನ್ನು 70 ಕೋಟಿ ರೂಪಾಯಿಗಳಿಗೆ ಇತ್ಯರ್ಥಪಡಿಸಿಕೊಳ್ಳಲು ಅನುಮೋದನೆ ದೊರೆತಿದೆ. ನಿಯಂತ್ರಕ ಫೈಲಿಂಗ್ನಲ್ಲಿ ಕಾಫಿ ಡೇ ಎಂಟರ್ಪ್ರೈಸಸ್ ಈ ಮಾಹಿತಿಯನ್ನು ಹಂಚಿಕೊಂಡಿದ್ದು, ಆಕ್ಸಿಸ್ ಬ್ಯಾಂಕ್ ಲಿಮಿಟೆಡ್ ಕಂಪನಿಯೊಂದಿಗೆ ಬಾಕಿ ಇರುವ 70 ಕೋಟಿ ರೂಪಾಯಿಗಳ ಸಾಲದ ಒನ್ ಟೈಮ್ ಸೆಟ್ಲ್ಮೆಂಟ್ಗೆ ಒಪ್ಪಿಗೆ ನೀಡಿದೆ ಎಂದು ತಿಳಿಸಿದೆ. ಈ ನಿರ್ಧಾರವು ಕಂಪನಿಯ ಆರ್ಥಿಕ ಚೇತರಿಕೆಗೆ ದೊಡ್ಡ ಉತ್ತೇಜನ ನೀಡಿದೆ.
ಸಾಲ ತೀರಿಸಲು ಗಡುವು ನಿಗದಿ
ಈ ಒಟಿಎಸ್ ಒಪ್ಪಂದದ ಅನ್ವಯ, ಕಾಫಿ ಡೇ ಎಂಟರ್ಪ್ರೈಸಸ್ (CDEL) ಬ್ಯಾಂಕಿಗೆ ಪಾವತಿಸಬೇಕಾದ ಸಂಪೂರ್ಣ ಮೊತ್ತವನ್ನು 2026ರ ಸೆಪ್ಟೆಂಬರ್ 30ರ ಒಳಗೆ ಪಾವತಿಸಲಿದೆ. ಸಾಲದ ಭಾರವನ್ನು ಇಳಿಸಿಕೊಳ್ಳಲು ಕಂಪನಿಯು ತನ್ನ ಆಸ್ತಿಗಳ ಮಾರಾಟ ಮತ್ತು ಇತರ ಆರ್ಥಿಕ ಮೂಲಗಳನ್ನು ಸಮರ್ಥವಾಗಿ ಬಳಸಿಕೊಳ್ಳುತ್ತಿದೆ. ಹಂತ ಹಂತವಾಗಿ ಸಾಲ ತೀರಿಸುವ ಮಾಳವಿಕಾ ಅವರ ತಂತ್ರಗಾರಿಕೆ ಇದೀಗ ಫಲ ನೀಡುತ್ತಿದೆ.
ಫೀನಿಕ್ಸ್ನಂತೆ ಎದ್ದು ಬಂದ ಮಾಳವಿಕಾ
ಜುಲೈ 2019 ರಲ್ಲಿ ಕಾಫಿ ಡೇ ಸಾಮ್ರಾಜ್ಯದ ಸಂಸ್ಥಾಪಕ ವಿ.ಜಿ. ಸಿದ್ಧಾರ್ಥ್ ಅವರು ನಿಗೂಢವಾಗಿ ಸಾವನ್ನಪ್ಪಿದಾಗ, ಇಡೀ ಉದ್ಯಮ ಜಗತ್ತೇ ಬೆಚ್ಚಿಬಿದ್ದಿತ್ತು. ಕಂಪನಿಯು ಸಾವಿರಾರು ಕೋಟಿ ಸಾಲದ ಸುಳಿಯಲ್ಲಿತ್ತು. ಬಹುತೇಕರು ಕಾಫಿ ಡೇ ಕಥೆ ಮುಗಿಯಿತು, ಕಂಪನಿ ದಿವಾಳಿಯಾಗುವುದು ಖಚಿತ ಎಂದೇ ಮಾತನಾಡಿಕೊಂಡಿದ್ದರು. ಅಂತಹ ಕಠಿಣ ಸಮಯದಲ್ಲಿ ಕಂಪನಿಯ ಚುಕ್ಕಾಣಿ ಹಿಡಿದವರು ಮಾಳವಿಕಾ ಸಿದ್ಧಾರ್ಥ್.
ಅವರು ಕೇವಲ ಕಂಪನಿಯ ಮುಖ್ಯಸ್ಥೆಯಾಗಿ ಕೂರಲಿಲ್ಲ, ಬದಲಿಗೆ ಒಬ್ಬ ಹೋರಾಟಗಾರ್ತಿಯಂತೆ ಕಷ್ಟಗಳನ್ನು ಎದುರಿಸಿದರು. ಸಾಲದಾತರೊಂದಿಗೆ ಮಾತುಕತೆ, ಆಸ್ತಿಗಳ ಮಾರಾಟ ಮತ್ತು ವೆಚ್ಚ ಕಡಿತದ ಮೂಲಕ ಕಂಪನಿಯನ್ನು ಮತ್ತೆ ಸರಿದಾರಿಗೆ ತಂದರು. ಅವರ ಈ ಧೈರ್ಯ ಮತ್ತು ಪರಿಶ್ರಮದ ಫಲವಾಗಿಯೇ ಇಂದು ಕಾಫಿ ಡೇ ಮತ್ತೆ ಚೇತರಿಕೆಯ ಹಾದಿಯಲ್ಲಿ ಸಾಗುತ್ತಿದೆ.
ಕಂಪನಿಯ ಆರ್ಥಿಕ ಸ್ಥಿತಿಯನ್ನು ಸುಧಾರಿಸುವ ನಿಟ್ಟಿನಲ್ಲಿ ಹಲವು ಪ್ರಮುಖ ನಿರ್ಧಾರಗಳನ್ನು ತೆಗೆದುಕೊಳ್ಳಲಾಗಿದೆ. ಇದರಲ್ಲಿ ಮೈಸೂರು ಅಮಲ್ಗಾ-ಮೇಟೆಡ್ ಕಾಫಿ ಇಸ್ಟೇಟ್ಸ್ ಲಿಮಿಟೆಡ್ (MACEL) ಗೆ ವರ್ಗಾಯಿಸಲಾಗಿದೆ ಎನ್ನಲಾದ 3,535 ಕೋಟಿ ರೂಪಾಯಿಗಳ ವ್ಯವಹಾರವೂ ಸೇರಿದೆ. ಜೂನ್ 30, 2025 ರ ಮಾಹಿತಿಯಂತೆ, ಬ್ಯಾಂಕುಗಳು ಮತ್ತು ಎನ್ಸಿಡಿಗಳಿಂದ ಪಡೆದ ಅಲ್ಪಾವಧಿ ಮತ್ತು ದೀರ್ಘಾವಧಿಯ ಸಾಲ ಸೇರಿದಂತೆ ಕಂಪನಿಯ ಒಟ್ಟು ಆರ್ಥಿಕ ಸಾಲವು 372.52 ಕೋಟಿ ರೂಪಾಯಿಗಳಷ್ಟಿದೆ. ಸಾವಿರಾರು ಕೋಟಿಗಳಿಂದ ನೂರಾರು ಕೋಟಿಗೆ ಸಾಲವನ್ನು ಇಳಿಸಿರುವುದು ಮಾಳವಿಕಾ ಅವರ ಆಡಳಿತಾತ್ಮಕ ದಕ್ಷತೆಗೆ ಹಿಡಿದ ಕನ್ನಡಿಯಾಗಿದೆ.
ಪ್ರಸ್ತುತ ಬ್ಯಾಂಕುಗಳಿಂದ ಒಟ್ಟು 196.42 ಕೋಟಿ ಬಾಕಿ ಉಳಿಸಿಕೊಂಡಿದ್ದು, ಅದರಲ್ಲಿ 181.66 ಕೋಟಿ ಅಸಲು ಮತ್ತು 14.76 ಕೋಟಿ ಬಡ್ಡಿ ಪಾವತಿಯೂ ಸೇರಿದೆ. ಮಾರ್ಚ್ 2020 ರಲ್ಲಿ, ಸಿಡಿಇಎಲ್ ತನ್ನ ತಂತ್ರಜ್ಞಾನ ವ್ಯವಹಾರ ಪಾರ್ಕ್ ಅನ್ನು ಬ್ಲಾಕ್ಸ್ಟೋನ್ ಗ್ರೂಪ್ಗೆ ಮಾರಾಟ ಮಾಡಿ, ಬಂದ ಹಣದಲ್ಲಿ 13 ಸಾಲದಾತರಿಗೆ ಬರೋಬ್ಬರಿ 1,644 ಕೋಟಿ ರೂಪಾಯಿ ಮರುಪಾವತಿ ಮಾಡುವುದಾಗಿ ಘೋಷಿಸಿತ್ತು. ಇದು ಕಂಪನಿಯ ಮೇಲಿನ ವಿಶ್ವಾಸವನ್ನು ಹೆಚ್ಚಿಸಿತ್ತು.
ಷೇರು ಮಾರುಕಟ್ಟೆಯಲ್ಲಿ ಸಂಚಲನ
ಆಕ್ಸಿಸ್ ಬ್ಯಾಂಕ್ ಜೊತೆಗಿನ ಈ ಒಪ್ಪಂದದ ಸುದ್ದಿ ಹೊರಬರುತ್ತಿದ್ದಂತೆ ಷೇರು ಮಾರುಕಟ್ಟೆಯಲ್ಲಿಯೂ ಕಾಫಿ ಡೇ ಷೇರುಗಳು ಚಿಗುರಿಕೊಂಡಿವೆ. ಈ ವರ್ಷದ ಆರಂಭದಲ್ಲಿ, ರಾಷ್ಟ್ರೀಯ ಕಂಪನಿ ಕಾನೂನು ಮೇಲ್ಮನವಿ ನ್ಯಾಯಮಂಡಳಿ (NCLAT) ಕೂಡ ಕಾಫಿ ಡೇ ವಿರುದ್ಧದ ದಿವಾಳಿತನ ಪ್ರಕ್ರಿಯೆಯನ್ನು ರದ್ದುಗೊಳಿಸಿತ್ತು. ಇದರ ಬೆನ್ನಲ್ಲೇ ಈಗ ಸಾಲ ಇತ್ಯರ್ಥದ ಸುದ್ದಿ ಬಂದಿರುವುದು ಹೂಡಿಕೆದಾರರಲ್ಲಿ ಸಂತಸ ಮೂಡಿಸಿದೆ. ಸೋಮವಾರದ ವಹಿವಾಟಿನಲ್ಲಿ ಕಾಫಿ ಡೇ ಎಂಟರ್ಪ್ರೈಸಸ್ ಲಿಮಿಟೆಡ್ನ ಷೇರುಗಳು ಶೇ. 6.33 ರಷ್ಟು ಏರಿಕೆ ಕಂಡು 37.46 ರೂಪಾಯಿಗಳಿಗೆ ಸ್ಥಿರವಾಯಿತು.
ಒಟ್ಟಾರೆಯಾಗಿ, ಗಂಡನ ಕನಸನ್ನು ನನಸು ಮಾಡಲು ಕಂಕಣ ತೊಟ್ಟಿರುವ ಮಾಳವಿಕಾ ಸಿದ್ಧಾರ್ಥ್ ಅವರ ಶ್ರಮಕ್ಕೆ ತಕ್ಕ ಪ್ರತಿಫಲ ಸಿಗುತ್ತಿದೆ. ಕಾಫಿ ಡೇ ಎಂಬ ಬೃಹತ್ ಸಾಮ್ರಾಜ್ಯ ಮತ್ತೆ ಗತವೈಭವಕ್ಕೆ ಮರಳುವ ಲಕ್ಷಣಗಳು ಸ್ಪಷ್ಟವಾಗಿ ಗೋಚರಿಸುತ್ತಿವೆ.
