ಭಾರತೀಯ ಚಿತ್ರರಂಗದ ಬಾಕ್ಸಾಫೀಸ್ ಸುಲ್ತಾನ್ ರಾಕಿಂಗ್ ಸ್ಟಾರ್ ಯಶ್ ಅವರ ಮುಂದಿನ ನಡೆ ಏನು ಎನ್ನುವ ಕುತೂಹಲಕ್ಕೆ ಈಗಾಗಲೇ ಟಾಕ್ಸಿಕ್ ಸಿನಿಮಾ ಉತ್ತರ ನೀಡಿದೆ. ಕೆಜಿಎಫ್ ಚಾಪ್ಟರ್ 2 ಎಂಬ ದೈತ್ಯ ಯಶಸ್ಸಿನ ನಂತರ ಯಶ್ ಅವರು ಇಡೀ ವಿಶ್ವವೇ ತಿರುಗಿ ನೋಡುವಂತಹ ಕಥೆಯೊಂದಿಗೆ ಮರಳುತ್ತಿದ್ದಾರೆ. ಗೀತು ಮೋಹನ್ ದಾಸ್ ನಿರ್ದೇಶನದಲ್ಲಿ ಸಿದ್ಧವಾಗುತ್ತಿರುವ ಈ ಬಹುನಿರೀಕ್ಷಿತ ಚಿತ್ರ ಇದೇ ಮಾರ್ಚ್ 19 ರಂದು ಬೆಳ್ಳಿಪರದೆಗೆ ಅಪ್ಪಳಿಸಲು ಸಜ್ಜಾಗಿದೆ. ಆದರೆ ಸಿನಿಮಾ ಬಿಡುಗಡೆ ಹತ್ತಿರವಾಗುತ್ತಿದ್ದಂತೆಯೇ ಬಾಲಿವುಡ್ ಅಂಗಳದಲ್ಲಿ ಪಿತೂರಿಯ ವಾಸನೆ ಬರುತ್ತಿದೆ. ಯಶ್ ಅವರ ವೇಗಕ್ಕೆ ಕಡಿವಾಣ ಹಾಕಲು ಉತ್ತರ ಭಾರತದ ಕೆಲವೊಂದು ಲಾಬಿಗಳು ಸಜ್ಜಾದಂತೆ ಕಾಣುತ್ತಿದೆ.
ರೆಟ್ರೋ ಲುಕ್ ಪೋಸ್ಟರ್ ಮತ್ತು ನೆಗೆಟಿವ್ ಪಬ್ಲಿಸಿಟಿಯ ಹಿಂದಿನ ಮರ್ಮವೇನು
ಸದ್ಯ ಟಾಕ್ಸಿಕ್ ಚಿತ್ರತಂಡ ಪ್ರೇಕ್ಷಕರ ಹಸಿವನ್ನು ತಣಿಸಲು ಹಂತ ಹಂತವಾಗಿ ಸಿನಿಮಾದ ಪೋಸ್ಟರ್ಗಳನ್ನು ಬಿಡುಗಡೆ ಮಾಡುತ್ತಿದೆ. ವಿಭಿನ್ನವಾಗಿರುವ ಮತ್ತು ರೆಟ್ರೋ ಶೈಲಿಯನ್ನು ನೆನಪಿಸುವ ಈ ಪೋಸ್ಟರ್ಗಳು ಅಭಿಮಾನಿಗಳಿಗೆ ಹಬ್ಬದೂಟ ನೀಡಿದೆ. ಆದರೆ ಸಾಮಾಜಿಕ ಜಾಲತಾಣಗಳಲ್ಲಿ ಒಂದು ಗುಂಪು ವ್ಯವಸ್ಥಿತವಾಗಿ ಈ ಪೋಸ್ಟರ್ಗಳ ಮೇಲೆ ಮುಗಿಬಿದ್ದಿದೆ. ಯಾವುದೇ ಹುರುಳಿಲ್ಲದ ಕಾರಣಗಳನ್ನು ಮುಂದಿಟ್ಟುಕೊಂಡು ಚಿತ್ರದ ಗುಣಮಟ್ಟವನ್ನೇ ಪ್ರಶ್ನಿಸುವ ಮಟ್ಟಕ್ಕೆ ಟೀಕೆಗಳು ವ್ಯಕ್ತವಾಗುತ್ತಿವೆ. ಈ ಬೆಳವಣಿಗೆಯನ್ನು ಗಮನಿಸಿದರೆ ಇದು ಕೇವಲ ಟೀಕೆಯಲ್ಲ ಬದಲಾಗಿ ಇದೊಂದು ಪಕ್ಕಾ ಪ್ಲಾನ್ ಮಾಡಿ ನಡೆಸುತ್ತಿರುವ ಅಪಪ್ರಚಾರ ಎಂಬುದು ಸ್ಪಷ್ಟವಾಗುತ್ತಿದೆ. ಈ ನೆಗೆಟಿವ್ ಕ್ಯಾಂಪೇನ್ ಹಿಂದೆ ಬಾಲಿವುಡ್ ನ ಒಂದು ದೊಡ್ಡ ಲಾಬಿ ಕೆಲಸ ಮಾಡುತ್ತಿದೆ ಎಂಬ ಅನುಮಾನ ಈಗ ಸಿನಿರಸಿಕರಲ್ಲಿ ದಟ್ಟವಾಗಿದೆ.
ಧುರಂಧರ್ 2 ವರ್ಸಸ್ ಟಾಕ್ಸಿಕ್ ಇದು ಕೇವಲ ಕ್ಲ್ಯಾಶ್ ಅಲ್ಲ ಪ್ರತಿಷ್ಠೆಯ ಕಾದಾಟ
ಈ ಅಪಪ್ರಚಾರದ ಅಸಲಿ ಕಾರಣ ಹುಡುಕುತ್ತಾ ಹೋದರೆ ಸಿಗುವ ಉತ್ತರವೇ ಧುರಂಧರ್ 2. ಹೌದು ಮಾರ್ಚ್ 19 ರಂದು ಬಾಲಿವುಡ್ ನ ಬಹುನಿರೀಕ್ಷಿತ ಧುರಂಧರ್ 2 ಸಿನಿಮಾ ಕೂಡ ಬಿಡುಗಡೆಯಾಗುತ್ತಿದೆ. ಒಂದೇ ದಿನ ಎರಡು ಪ್ಯಾನ್ ಇಂಡಿಯಾ ಮಟ್ಟದ ಸಿನಿಮಾಗಳು ಅಖಾಡಕ್ಕಿಳಿಯುತ್ತಿರುವುದರಿಂದ ಸಹಜವಾಗಿಯೇ ಬಾಕ್ಸಾಫೀಸ್ ವಾರ್ ಜೋರಾಗಿರಲಿದೆ. ಯಶ್ ಅವರ ಟಾಕ್ಸಿಕ್ ಬಗ್ಗೆ ಈಗಲೇ ನೆಗೆಟಿವ್ ಸುದ್ದಿಗಳನ್ನು ಹಬ್ಬಿಸಿದರೆ ಪ್ರೇಕ್ಷಕರ ಮನಸ್ಸನ್ನು ಧುರಂಧರ್ 2 ಕಡೆಗೆ ಸೆಳೆಯಬಹುದು ಎಂಬುದು ವಿರೋಧಿಗಳ ಲೆಕ್ಕಾಚಾರ. ಟಾಕ್ಸಿಕ್ ಹೈಪ್ ಕಡಿಮೆ ಮಾಡಿ ತಮ್ಮ ಸಿನಿಮಾದ ಗಳಿಕೆಯನ್ನು ಹೆಚ್ಚಿಸಿಕೊಳ್ಳಲು ಮಾಡುತ್ತಿರುವ ಚೀಪ್ ಗಿಮಿಕ್ ತಂತ್ರ ಇದಾಗಿದೆ ಎಂದು ಗಾಂಧಿನಗರದ ಪಂಡಿತರು ವಿಶ್ಲೇಷಿಸುತ್ತಿದ್ದಾರೆ.
ಇತಿಹಾಸ ಮರೆತವರಿಗೆ ರಾಕಿ ಭಾಯ್ ಅಂದ್ರೆ ಏನೆಂದು ನೆನಪಿಸಬೇಕಿದೆ
ಯಶ್ ಸಿನಿಮಾವನ್ನು ಸೋಶಿಯಲ್ ಮೀಡಿಯಾದಲ್ಲಿ ಟ್ರೋಲ್ ಮಾಡುವ ಮೂಲಕ ಸೋಲಿಸಬಹುದು ಎಂದುಕೊಂಡಿದ್ದರೆ ಅದು ಮೂರ್ಖತನದ ಪರಮಾವಧಿ. ಏಕೆಂದರೆ ಯಶ್ ಬಾಕ್ಸಾಫೀಸ್ ಕೊಳ್ಳೆ ಹೊಡೆಯಲು ಬರುವಾಗ ಎದುರಿಗೆ ಯಾರು ಇದ್ದಾರೆ ಎಂದು ನೋಡಿದವರೇ ಅಲ್ಲ. ಇತಿಹಾಸದ ಪುಟಗಳನ್ನು ಒಮ್ಮೆ ತಿರುವಿ ಹಾಕಿದರೆ ಸತ್ಯ ತಿಳಿಯುತ್ತದೆ. ಕೆಜಿಎಫ್ ಚಾಪ್ಟರ್ 1 ಬಿಡುಗಡೆಯಾದಾಗ ಎದುರಿಗೆ ಇದ್ದಿದ್ದು ಬಾಲಿವುಡ್ ಬಾದ್ ಶಾ ಶಾರುಖ್ ಖಾನ್ ಅವರ ಜೀರೋ ಸಿನಿಮಾ. ಆದರೂ ಗೆದ್ದಿದ್ದು ಮಾತ್ರ ಯಶ್. ಇನ್ನು ಕೆಜಿಎಫ್ 2 ಸಮಯದಲ್ಲಿ ತಮಿಳಿನ ದಳಪತಿ ವಿಜಯ್ ಅವರ ಬೀಸ್ಟ್ ಸಿನಿಮಾ ಕೂಡ ರಾಕಿ ಭಾಯ್ ಅಬ್ಬರದ ಮುಂದೆ ಮಕಾಡೆ ಮಲಗಿತ್ತು. ಘಟಾನುಘಟಿಗಳನ್ನೇ ಎದುರಿಸಿ ಗೆದ್ದಿರುವ ಯಶ್ ಅವರಿಗೆ ಈ ನೆಗೆಟಿವ್ ಪಬ್ಲಿಸಿಟಿಗಳೆಲ್ಲವೂ ತೃಣ ಸಮಾನ.
ನಾಲ್ಕು ವರ್ಷದ ತಪಸ್ಸು ಸುಳ್ಳಾಗುವುದಿಲ್ಲ
ಒಂದು ಸಿನಿಮಾಗಾಗಿ ಒಬ್ಬ ನಟ ಬರೋಬ್ಬರಿ ನಾಲ್ಕು ವರ್ಷಗಳನ್ನು ಮೀಸಲಿಟ್ಟಿದ್ದಾರೆ ಎಂದರೆ ಆ ಸಿನಿಮಾದಲ್ಲಿ ಎಂತಹ ಕಂಟೆಂಟ್ ಇರಬಹುದು ಎಂದು ಊಹಿಸುವುದು ಕಷ್ಟವೇನಲ್ಲ. ಟಾಕ್ಸಿಕ್ ಕೇವಲ ನಿರ್ದೇಶಕರ ಸಿನಿಮಾವಲ್ಲ ಇದರಲ್ಲಿ ಸ್ವತಃ ಯಶ್ ಅವರೇ ಕಥೆ ಮತ್ತು ಚಿತ್ರಕಥೆಯಲ್ಲಿ ಭಾಗಿಯಾಗಿದ್ದಾರೆ. ಯಶ್ ಅವರ ಜಡ್ಜ್ ಮೆಂಟ್ ಮೇಲೆ ಅಭಿಮಾನಿಗಳಿಗೆ ಅಪಾರವಾದ ನಂಬಿಕೆ ಇದೆ. ಸದ್ಯ ಹರಿದಾಡುತ್ತಿರುವ ಟೀಕೆಗಳಿಗೆಲ್ಲ ಟೀಸರ್ ಮತ್ತು ಟ್ರೇಲರ್ ಬಂದ ಮೇಲೆ ತಾನಾಗಿಯೇ ಉತ್ತರ ಸಿಗಲಿದೆ. ಎಷ್ಟೇ ಗ್ಯಾಂಗ್ ವಾರ್ ಗಳು ನಡೆದರೂ ಅಂತಿಮವಾಗಿ ಗೆಲ್ಲುವುದು ಕಂಟೆಂಟ್ ಮತ್ತು ಯಶ್ ಅವರ ಪರಿಶ್ರಮ ಮಾತ್ರ. ಮಾರ್ಚ್ 19ರಂದು ಬಾಕ್ಸಾಫೀಸ್ ಲೆಕ್ಕಾಚಾರ ತಲೆಕೆಳಗಾಗುವುದು ಖಚಿತ.
