ಬಿಗ್ ಬಾಸ್ ಕನ್ನಡ ಸೀಸನ್ 12ರ ವರ್ಣರಂಜಿತ ತೆರೆ ಬಿದ್ದಿರಬಹುದು, ಆದರೆ ರಿಯಾಲಿಟಿ ಶೋನ ಅಸಲಿ ಆಟ ಈಗಷ್ಟೇ ಶುರುವಾದಂತಿದೆ. ಫಿನಾಲೆ ಮುಗಿದು ನಾಲ್ಕು ದಿನಗಳು ಉರುಳಿದರೂ ಕರುನಾಡಿನ ಮೂಲೆ ಮೂಲೆಯಲ್ಲಿ ಕೇಳಿ ಬರುತ್ತಿರುವ ಒಂದೇ ಒಂದು ಹೆಸರು ಅದು ಗಿಲ್ಲಿ ನಟ. ಬಿಗ್ ಬಾಸ್ ಮನೆಯಿಂದ ವಿಜಯಶಾಲಿಯಾಗಿ ಹೊರಬಂದಿರುವ ಗಿಲ್ಲಿ ನಟ, ಇದೀಗ ನೇರವಾಗಿ ರಾಜ್ಯದ ಅಧಿಕಾರ ಕೇಂದ್ರಕ್ಕೆ ಲಗ್ಗೆ ಇಟ್ಟಿದ್ದಾರೆ. ಹೌದು, ಬಿಗ್ ಬಾಸ್ ಕಿರೀಟ ತೊಟ್ಟ ಗಿಲ್ಲಿ ನಟನಿಗೆ ಸ್ವತಃ ಮುಖ್ಯಮಂತ್ರಿ ಸಿದ್ದರಾಮಯ್ಯನವರೇ ವಿಶೇಷ ಆಹ್ವಾನ ನೀಡಿ ಅಭಿನಂದಿಸಿದ್ದಾರೆ.
ಸಿಎಂ ಕಾವೇರಿ ನಿವಾಸದಲ್ಲಿ ಸಂಭ್ರಮದ ಕ್ಷಣ
ಸಾಮಾನ್ಯವಾಗಿ ಬಿಗ್ ಬಾಸ್ ವಿನ್ನರ್ಗಳು ಸಿನಿಮಾ ಆಫರ್ಗಳಲ್ಲಿ ಬ್ಯುಸಿಯಾಗುತ್ತಾರೆ. ಆದರೆ ಗಿಲ್ಲಿ ನಟನ ಖದರ್ ಸ್ವಲ್ಪ ವಿಭಿನ್ನವಾಗಿದೆ. ಬಿಗ್ ಬಾಸ್ ಸೀಸನ್ 12ರ ವಿಜೇತನಾಗಿ ಹೊರಹೊಮ್ಮಿದ ಬೆನ್ನಲ್ಲೇ, ಗಿಲ್ಲಿ ನಟ ರಾಜ್ಯದ ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರನ್ನು ಭೇಟಿ ಮಾಡಿದ್ದಾರೆ. ಸಿಎಂ ಅವರ ಅಧಿಕೃತ ಸರ್ಕಾರಿ ನಿವಾಸವಾದ ಕಾವೇರಿಯಲ್ಲಿ ಈ ವಿಶೇಷ ಭೇಟಿ ನಡೆದಿದೆ.
ಈ ಸಂದರ್ಭದಲ್ಲಿ ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರು ಗಿಲ್ಲಿ ನಟನಿಗೆ ಆತ್ಮೀಯವಾಗಿ ಬರಮಾಡಿಕೊಂಡು, ಹೂಗುಚ್ಛ ನೀಡಿ, ಶಾಲು ಹೊದಿಸಿ ವಿಶೇಷವಾಗಿ ಅಭಿನಂದನೆ ಸಲ್ಲಿಸಿದರು. ಜನಸಾಮಾನ್ಯರ ಪ್ರತಿನಿಧಿಯಾಗಿ ಗೆದ್ದು ಬಂದಿರುವ ಗಿಲ್ಲಿ ನಟನ ಸಾಧನೆಗೆ ಸಿಎಂ ಬೆನ್ನು ತಟ್ಟಿದ್ದಾರೆ. ಈ ಐತಿಹಾಸಿಕ ಕ್ಷಣದಲ್ಲಿ ನಗರಾಭಿವೃದ್ಧಿ ಸಚಿವ ಭೈರತಿ ಸುರೇಶ್ ಮತ್ತು ಸಿಎಂ ಮಾಧ್ಯಮ ಸಲಹೆಗಾರ ಕೆ.ವಿ. ಪ್ರಭಾಕರ್ ಅವರು ಕೂಡ ಸಾಕ್ಷಿಯಾದರು.
ದ್ವೇಷವೇ ಇಲ್ಲದ ಅಜಾತಶತ್ರು: ಒಂದೇ ಒಂದು ನೆಗೆಟಿವ್ ಕಾಮೆಂಟ್ ಇಲ್ಲ!
ಗಿಲ್ಲಿ ನಟನ ಗೆಲುವು ಕೇವಲ ಟ್ರೋಫಿಗೆ ಸೀಮಿತವಾಗಿಲ್ಲ, ಅದು ಜನರ ಹೃದಯ ಗೆದ್ದಿರುವ ಪರಿ. ಬಿಗ್ ಬಾಸ್ ಇತಿಹಾಸದಲ್ಲೇ ಇದೊಂದು ಅಚ್ಚರಿಯ ದಾಖಲೆ ಎನ್ನಬಹುದು. ಸೋಶಿಯಲ್ ಮೀಡಿಯಾದಲ್ಲಿ ಸದಾ ಜಗಳ, ಟ್ರೋಲ್, ನೆಗೆಟಿವ್ ಕಾಮೆಂಟ್ಗಳೇ ತುಂಬಿ ತುಳುಕುವ ಈ ಕಾಲದಲ್ಲಿ, ಗಿಲ್ಲಿ ನಟನ ಬಗ್ಗೆ ಒಂದೇ ಒಂದು ನೆಗೆಟಿವ್ ಕಾಮೆಂಟ್ ಇಲ್ಲದಿರುವುದು ಅವರ ವ್ಯಕ್ತಿತ್ವಕ್ಕೆ ಹಿಡಿದ ಕನ್ನಡಿಯಾಗಿದೆ. ಫೇಸ್ಬುಕ್, ಇನ್ಸ್ಟಾಗ್ರಾಮ್ ಸೇರಿದಂತೆ ಎಲ್ಲೆಡೆ ಕೇವಲ ಪ್ರೀತಿಯ ಸುರಿಮಳೆಯೇ ಹರಿದು ಬರುತ್ತಿದೆ.
ಅಭಿಮಾನಿಯೊಬ್ಬನ ಟ್ಯಾಟೂ ಮತ್ತು ಯೋಧರ ಸಲಾಂ
ಜನರು ತಮ್ಮನ್ನು ಇಷ್ಟಪಡುತ್ತಾರೆ ಎಂದು ಗಿಲ್ಲಿ ನಟನಿಗೆ ಗೊತ್ತಿತ್ತು, ಆದರೆ ಈ ಮಟ್ಟದ ಹುಚ್ಚು ಪ್ರೀತಿ ಸಿಗುತ್ತದೆ ಎಂದು ಸ್ವತಃ ಅವರಿಗೂ ತಿಳಿದಿರಲಿಲ್ಲ. ಅಭಿಮಾನಿಯೊಬ್ಬ ಗಿಲ್ಲಿ ನಟನ ಮುಖವನ್ನೇ ತನ್ನ ದೇಹದ ಮೇಲೆ ಹಚ್ಚೆ (Tattoo) ಹಾಕಿಸಿಕೊಳ್ಳುವ ಮೂಲಕ ಅಭಿಮಾನದ ಪರಾಕಾಷ್ಠೆ ಮೆರೆದಿದ್ದಾರೆ. ಅಷ್ಟೇ ಅಲ್ಲದೆ, ದೇಶ ಕಾಯುವ ಯೋಧರು ಕೂಡ ಗಿಲ್ಲಿ ನಟನಿಗೆ ಬೆಂಬಲ ಸೂಚಿಸಿ ವಿಡಿಯೋ ಮಾಡಿದ್ದು, ಇದು ತಮಗೆ ಸಿಕ್ಕ ಅತಿದೊಡ್ಡ ಗೌರವ ಎಂದು ಗಿಲ್ಲಿ ಭಾವುಕರಾಗಿ ಹೇಳಿಕೊಂಡಿದ್ದಾರೆ.
ಶಿವಣ್ಣನ ಅಂಗಳದಲ್ಲೂ ಗಿಲ್ಲಿ ಹವಾ
ಮುಖ್ಯಮಂತ್ರಿಗಳನ್ನು ಭೇಟಿಯಾಗುವ ಮುನ್ನ, ಕರುನಾಡ ಚಕ್ರವರ್ತಿ ಶಿವಣ್ಣ ಮತ್ತು ಗೀತಾ ಶಿವರಾಜ್ಕುಮಾರ್ ಅವರನ್ನು ಭೇಟಿಯಾಗಿ ಗಿಲ್ಲಿ ನಟ ಆಶೀರ್ವಾದ ಪಡೆದಿದ್ದಾರೆ. ದೊಡ್ಮನೆ ಹುಡುಗನ ಪ್ರೀತಿಯ ಆಲಿಂಗನ ಮತ್ತು ಹಾರೈಕೆ ಗಿಲ್ಲಿ ನಟನ ಆತ್ಮವಿಶ್ವಾಸವನ್ನು ಮತ್ತಷ್ಟು ಹೆಚ್ಚಿಸಿದೆ. ಜೊತೆಗೆ ಅಯೋಗ್ಯ ಖ್ಯಾತಿಯ ನಿರ್ದೇಶಕ ಮಹೇಶ್ ಕುಮಾರ್ ಅವರನ್ನೂ ಭೇಟಿಯಾಗಿರುವುದು, ಗಿಲ್ಲಿ ನಟನ ಮುಂದಿನ ಸಿನಿ ಪಯಣಕ್ಕೆ ಮುನ್ನುಡಿ ಬರೆದಂತಿದೆ.
ಒಟ್ಟಿನಲ್ಲಿ, ಮನೆಯೊಳಗೆ ಇದ್ದಾಗ ಹೊರಗಿನ ಪ್ರಪಂಚದ ಅರಿವಿಲ್ಲದಿದ್ದ ಗಿಲ್ಲಿ ನಟ, ಈಗ ಹೊರಬಂದು ನೋಡಿದರೆ ಇಡೀ ಕರುನಾಡೇ ತಮ್ಮ ಹೆಸರನ್ನು ಜಪಿಸುತ್ತಿರುವುದನ್ನು ಕಂಡು ಮೂಕವಿಸ್ಮಿತರಾಗಿದ್ದಾರೆ. ಮಾಧ್ಯಮ ಮಿತ್ರರು ಮತ್ತು ಸಮಸ್ತ ಜನತೆ ತೋರಿದ ಈ ನಿಷ್ಕಲ್ಮಷ ಪ್ರೀತಿಗೆ ನಾನು ಸದಾ ಚಿರಋಣಿ ಎಂದು ಗಿಲ್ಲಿ ನಟ ಕೃತಜ್ಞತೆ ಸಲ್ಲಿಸಿದ್ದಾರೆ.
