ಲೋಕಸಭಾ ಸ್ಪೀಕರ್ ಓಂ ಬಿರ್ಲಾ ಅವರ ವಿರುದ್ಧ 118 ವಿರೋಧ ಪಕ್ಷದ ಸಂಸದರು ಸಲ್ಲಿಸಿದ್ದ ಪದಚ್ಯುತಿ ನೋಟಿಸ್ನಲ್ಲಿ ತಾಂತ್ರಿಕ ದೋಷಗಳು ಪತ್ತೆಯಾಗಿರುವುದು ರಾಜಕೀಯ ವಲಯದಲ್ಲಿ ಸಂಚಲನ ಮೂಡಿಸಿದೆ. ನೋಟಿಸ್ನಲ್ಲಿ ದಿನಾಂಕಕ್ಕೆ ಸಂಬಂಧಿಸಿದಂತೆ ಒಟ್ಟು ನಾಲ್ಕು ತಪ್ಪುಗಳು ಇದ್ದವು ಎಂದು ತಿಳಿದುಬಂದಿದೆ. ಈ ಕಾರಣದಿಂದಾಗಿ, ನಿಯಮಾನುಸಾರ ನೋಟಿಸ್ ವಜಾಗೊಳ್ಳುವ ಸಾಧ್ಯತೆ ಎದುರಿಸಿತ್ತು.
ಈ ಬೆಳವಣಿಗೆಯಿಂದ ವಿಪಕ್ಷಗಳು ಸಂಕಷ್ಟಕ್ಕೊಳಗಾದರೂ, ಸ್ಪೀಕರ್ ಸೂಚನೆಯ ಮೇರೆಗೆ ಲೋಕಸಭಾ ಸಚಿವಾಲಯವು ದೋಷ ತಿದ್ದಲು ಅವಕಾಶ ನೀಡಿದೆ ಎನ್ನಲಾಗಿದೆ. ಇದರಿಂದ ತಕ್ಷಣ ಎಚ್ಚೆತ್ತ ವಿರೋಧ ಪಕ್ಷಗಳು ಮೊದಲು ಸಲ್ಲಿಸಿದ್ದ ಹಳೆಯ ನೋಟಿಸ್ನ್ನು ಹಿಂಪಡೆದು, ಅಗತ್ಯ ತಿದ್ದುಪಡಿ ಮಾಡಿಕೊಂಡ ಹೊಸ ನೋಟಿಸ್ ಅನ್ನು ಲೋಕಸಭಾ ಕಾರ್ಯದರ್ಶಿಗಳಿಗೆ ಮರುಸಲ್ಲಿಸಿವೆ.
ರಾಜಕೀಯ ವಲಯದಲ್ಲಿ ಈ ಘಟನೆಗೆ ಮಿಶ್ರ ಪ್ರತಿಕ್ರಿಯೆಗಳು ವ್ಯಕ್ತವಾಗಿವೆ. ನಿಯಮಪಾಲನೆಯಲ್ಲಿ ನಿರ್ಲಕ್ಷ್ಯ ತೋರಿದ ಕಾರಣಕ್ಕೆ ವಿಪಕ್ಷಗಳಿಗೆ ಇದು ಮುಖಭಂಗವಾಗಿದೆಯೆಂದು ಕೆಲವರು ಅಭಿಪ್ರಾಯಪಟ್ಟರೆ, ತಿದ್ದುಪಡಿ ಅವಕಾಶ ನೀಡಿರುವುದು ಪ್ರಜಾಸತ್ತಾತ್ಮಕ ಪ್ರಕ್ರಿಯೆಗೆ ಅನುಕೂಲಕರವೆಂದು ಇನ್ನೂ ಕೆಲವರು ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ.
ಇದೀಗ ಹೊಸ ನೋಟಿಸ್ ಕುರಿತು ಮುಂದಿನ ಕ್ರಮ ಏನೆಂಬುದರತ್ತ ರಾಜಕೀಯ ವಲಯದ ಗಮನ ಕೇಂದ್ರೀಕರಿಸಿದೆ.
