ದಶಕಗಳಿಂದ ಹೊಗೆಯಾಡುತ್ತಿದ್ದ ದ್ವೇಷದ ಕಿಡಿ ಈಗ ಮಧ್ಯಪ್ರಾಚ್ಯದಲ್ಲಿ ದೈತ್ಯ ಜ್ವಾಲೆಯಾಗಿ ಸ್ಫೋಟಗೊಂಡಿದೆ. ವಿಶ್ವದ ದೊಡ್ಡಣ್ಣ ಅಮೆರಿಕ ಮತ್ತು ಯಹೂದಿ ರಾಷ್ಟ್ರ ಇಸ್ರೇಲ್ ಜಂಟಿಯಾಗಿ ಇರಾನ್ ಮೇಲೆ ಬ್ರಹ್ಮಾಸ್ತ್ರ ಪ್ರಯೋಗಿಸುವ ಮೂಲಕ ಜಗತ್ತನ್ನು ಮೂರನೇ ಮಹಾಯುದ್ಧದ ಅಂಚಿಗೆ ತಂದು ನಿಲ್ಲಿಸಿವೆ. ಇಸ್ರೇಲ್ ಮಿಲಿಟರಿ ಮೂಲಗಳ ಪ್ರಕಾರ, ಕಳೆದ ಹಲವು ತಿಂಗಳುಗಳಿಂದ ರಹಸ್ಯವಾಗಿ ರೂಪಿಸಲಾಗಿದ್ದ ಬೃಹತ್ ಮತ್ತು ಜಂಟಿ ಯೋಜನೆಯ ಫಲವಾಗಿ ಈ ಭೀಕರ ವೈಮಾನಿಕ ದಾಳಿ ನಡೆದಿದ್ದು, ಇಡೀ ಮಧ್ಯಪ್ರಾಚ್ಯವೇ ಈಗ ಅಕ್ಷರಶಃ ರಣರಂಗವಾಗಿ ಮಾರ್ಪಟ್ಟಿದೆ.
ಇರಾನ್ ನಾಯಕತ್ವದ ಶಿರಚ್ಛೇದಕ್ಕೆ ಸ್ಕೆಚ್: ಖಮೇನಿ ಕಚೇರಿಯೇ ಟಾರ್ಗೆಟ್
ಈ ಬಾರಿಯ ಸಂಘರ್ಷವು ಕೇವಲ ಗಡಿಭಾಗದ ಚಕಮಕಿಗಳಿಗೆ ಸೀಮಿತವಾಗಿಲ್ಲ. ಅಮೆರಿಕ ಮತ್ತು ಇಸ್ರೇಲ್ ನೇರವಾಗಿ ಇರಾನ್ನ ಆಡಳಿತದ ಬುಡವನ್ನೇ ಅಲ್ಲಾಡಿಸಲು ಮುಂದಾಗಿವೆ. ಅಂತಾರಾಷ್ಟ್ರೀಯ ಮಾಧ್ಯಮಗಳ ವರದಿಯ ಪ್ರಕಾರ, ಈ ದಾಳಿಯ ಪ್ರಮುಖ ಗುರಿ ಇರಾನ್ನ ಸೇನಾ ನೆಲೆಗಳಲ್ಲ, ಬದಲಾಗಿ ಅಲ್ಲಿನ ಸುಪ್ರೀಂ ಲೀಡರ್ ಆಯತೊಲ್ಲಾ ಅಲಿ ಖಮೇನಿ, ಅಧ್ಯಕ್ಷ ಮಸೂದ್ ಪೆಜೆಶ್ಕಿಯಾನ್ ಮತ್ತು ಇರಾನ್ ಸಶಸ್ತ್ರ ಪಡೆಗಳ ಮುಖ್ಯಸ್ಥರಾಗಿದ್ದಾರೆ. ಇರಾನ್ನ ರಾಜಕೀಯ ಮತ್ತು ಮಿಲಿಟರಿ ನಾಯಕತ್ವದ ಬೆನ್ನೆಲುಬು ಮುರಿಯುವುದೇ ಈ ಆಪರೇಷನ್ನ ಮುಖ್ಯ ಉದ್ದೇಶವಾಗಿದ್ದು, ದಾಳಿಯ ತೀವ್ರತೆ ಕಂಡು ಜಗತ್ತೇ ಬೆಚ್ಚಿಬಿದ್ದಿದೆ.
ಗಡಗಡ ನಡುಗಿದ ಅರಬ್ ರಾಷ್ಟ್ರಗಳು: ಆಕಾಶದಲ್ಲಿ ಕ್ಷಿಪಣಿಗಳ ರುದ್ರತಾಂಡವ
ಶತ್ರುಗಳ ದಾಳಿಗೆ ಇರಾನ್ ಸುಮ್ಮನೆ ಕೈಕಟ್ಟಿ ಕುಳಿತಿಲ್ಲ. ಅಮೆರಿಕ ಮತ್ತು ಇಸ್ರೇಲ್ನ ಜಂಟಿ ದಾಳಿಗೆ ಪ್ರತಿಯಾಗಿ ಇರಾನ್ ಅಕ್ಷರಶಃ ಕೆಂಡಾಮಂಡಲವಾಗಿದೆ. ಅಮೆರಿಕದ ಮಿಲಿಟರಿ ನೆಲೆಗಳು ಮತ್ತು ಇಸ್ರೇಲ್ನ ಪ್ರಮುಖ ಆರ್ಥಿಕ ಕೇಂದ್ರಗಳನ್ನು ಗುರಿಯಾಗಿಸಿಕೊಂಡು ಇರಾನ್ ಕ್ಷಿಪಣಿಗಳ ಮಳೆಯನ್ನೇ ಸುರಿಸಿದೆ. ಸಿಎನ್ಎನ್ ವರದಿಯ ಪ್ರಕಾರ, ಇಸ್ರೇಲ್ ಮಾತ್ರವಲ್ಲದೆ ಬಹ್ರೇನ್, ಅಬುಧಾಬಿ, ದುಬೈ, ಕುವೈತ್, ರಿಯಾದ್ ಮತ್ತು ಕತಾರ್ನ ಹಲವು ಭಾಗಗಳಲ್ಲಿ ಭೀಕರ ಸ್ಫೋಟದ ಶಬ್ದಗಳು ಕೇಳಿಬಂದಿವೆ. ಈ ಅರಬ್ ರಾಷ್ಟ್ರಗಳಲ್ಲಿ ಅಮೆರಿಕದ ಸೇನಾ ನೆಲೆಗಳಿರುವುದೇ ಇರಾನ್ನ ಈ ಆಕ್ರೋಶಕ್ಕೆ ಕಾರಣವಾಗಿದೆ. ಮಧ್ಯಪ್ರಾಚ್ಯದ ಆಕಾಶದಲ್ಲಿ ರಾಕೆಟ್ಗಳು ಮತ್ತು ಕ್ಷಿಪಣಿಗಳ ರುದ್ರತಾಂಡವ ಜನಸಾಮಾನ್ಯರಲ್ಲಿ ನಡುಕ ಹುಟ್ಟಿಸಿದೆ.
ವಿಭಜನೆಯಾದ ವಿಶ್ವ: ರಷ್ಯಾದಿಂದ ಅಮೆರಿಕಕ್ಕೆ ಖಡಕ್ ಎಚ್ಚರಿಕೆ
ಈ ಯುದ್ಧವು ಕೇವಲ ಎರಡು ದೇಶಗಳ ನಡುವಿನ ಸಂಘರ್ಷವಾಗಿ ಉಳಿದಿಲ್ಲ. ಇಡೀ ಜಗತ್ತು ಈಗ ಎರಡು ಪ್ರಬಲ ಬಣಗಳಾಗಿ ಒಡೆದುಹೋಗಿದೆ.
ಇರಾನ್ ಪರ ನಿಂತ ಶಕ್ತಿಗಳು:
ಇರಾನ್ ಮೇಲ್ನೋಟಕ್ಕೆ ಏಕಾಂಗಿಯಾಗಿ ಕಂಡರೂ, ತೆರೆಮರೆಯಲ್ಲಿ ಬಲಿಷ್ಠ ರಾಷ್ಟ್ರಗಳ ಬೆಂಬಲ ಹೊಂದಿದೆ. ತನ್ನ ಆಕ್ಸಿಸ್ ಆಫ್ ರೆಸಿಸ್ಟೆನ್ಸ್ ಪಡೆಯಾದ ಲೆಬನಾನ್ನ ಹಿಜ್ಬುಲ್ಲಾ, ಇರಾಕ್ನ ಪಾಪ್ಯುಲರ್ ಮೊಬಿಲೈಸೇಶನ್ ಫೋರ್ಸಸ್ (PMF), ಯೆಮನ್ನ ಹೌತಿ ಬಂಡುಕೋರರು ಮತ್ತು ಗಾಜಾದ ಹಮಾಸ್ ಉಗ್ರಗಾಮಿ ಗುಂಪುಗಳು ಇರಾನ್ಗೆ ಕವಚದಂತೆ ನಿಂತಿವೆ. ಇದಕ್ಕಿಂತ ಮುಖ್ಯವಾಗಿ, ರಷ್ಯಾ ಮತ್ತು ಚೀನಾ ಬಹಿರಂಗವಾಗಿಯೇ ಇರಾನ್ ಬೆನ್ನಿಗೆ ನಿಂತಿವೆ. ರಷ್ಯಾದ ಮಾಜಿ ಅಧ್ಯಕ್ಷ ಡಿಮಿಟ್ರಿ ಮೆಡ್ವೆಡೆವ್ ಅವರು ಅಮೆರಿಕಕ್ಕೆ ನೇರ ಸವಾಲು ಹಾಕಿದ್ದು, ಅಮೆರಿಕಕ್ಕೆ ಕೇವಲ 249 ವರ್ಷಗಳ ಇತಿಹಾಸವಿದೆ, ಆದರೆ ಪರ್ಷಿಯನ್ ಸಾಮ್ರಾಜ್ಯವು 2,500 ವರ್ಷಗಳಷ್ಟು ಪುರಾತನವಾದದ್ದು. ಇನ್ನು 100 ವರ್ಷಗಳ ನಂತರ ಯಾರು ಉಳಿಯುತ್ತಾರೆ ನೋಡೋಣ ಎಂದು ಗುಡುಗಿದ್ದಾರೆ. ಆದರೆ, ಇಸ್ಲಾಮಿಕ್ ರಾಷ್ಟ್ರಗಳ ಪೈಕಿ ಏಕೈಕ ಅಣುಶಕ್ತಿ ಹೊಂದಿರುವ ಪಾಕಿಸ್ತಾನವು ಜಾಣ್ಮೆಯ ನಡೆ ಪ್ರದರ್ಶಿಸಿದ್ದು, ಯುದ್ಧದಿಂದ ಅಂತರ ಕಾಯ್ದುಕೊಂಡಿದೆ.
ಅಮೆರಿಕ ಮತ್ತು ಇಸ್ರೇಲ್ ಪರ ನಿಂತ ಪಾಶ್ಚಿಮಾತ್ಯ ಹಾಗೂ ಅರಬ್ ರಾಷ್ಟ್ರಗಳು:
ಅಮೆರಿಕದ ಪರವಾಗಿ ಅರಬ್ ರಾಷ್ಟ್ರಗಳು ಮತ್ತು ಯುರೋಪಿಯನ್ ಒಕ್ಕೂಟ ಒಗ್ಗಟ್ಟು ಪ್ರದರ್ಶಿಸಿವೆ. ಯುಎಇ, ಕತಾರ್ ಮತ್ತು ಕುವೈತ್ ರಾಷ್ಟ್ರಗಳು ಇರಾನ್ನ ಕ್ಷಿಪಣಿ ದಾಳಿಯನ್ನು ತಮ್ಮ ಸಾರ್ವಭೌಮತ್ವದ ಮೇಲಿನ ದಾಳಿ ಎಂದು ಕರೆದಿದ್ದು, ತೀವ್ರವಾಗಿ ಖಂಡಿಸಿವೆ. ಸೌದಿ ಅರೇಬಿಯಾ ತನ್ನ ನೆರೆಯ ಅರಬ್ ರಾಷ್ಟ್ರಗಳ ರಕ್ಷಣೆಗೆ ಬದ್ಧವಾಗಿರುವುದಾಗಿ ಘೋಷಿಸಿದೆ. ಇತ್ತ ಫ್ರಾನ್ಸ್ ಮತ್ತು ಜರ್ಮನಿ ದೇಶಗಳು ಇರಾನ್ನ ಪರಮಾಣು ಕಾರ್ಯಕ್ರಮವನ್ನು ಕಟುವಾಗಿ ಟೀಕಿಸಿದ್ದು, ತಮ್ಮ ಮಿಲಿಟರಿ ನೆಲೆಗಳ ರಕ್ಷಣೆಗೆ ಸನ್ನದ್ಧವಾಗಿವೆ. ಇಟಲಿ ಪ್ರಧಾನಿ ಜಾರ್ಜಿಯಾ ಮೆಲೋನಿ ಕೂಡ ಪಶ್ಚಿಮದ ಒಕ್ಕೂಟಕ್ಕೆ ದನಿಗೂಡಿಸಿದ್ದಾರೆ.
ಅಣುಯುದ್ಧದ ಭೀತಿ: ಜಗತ್ತಿನ ವಿನಾಶದ ಮುನ್ಸೂಚನೆಯೇ?
ಈಗ ಎದ್ದಿರುವ ಪ್ರಶ್ನೆ ಒಂದೇ, ಇದು ಮೂರನೇ ಮಹಾಯುದ್ಧದ ಆರಂಭವೇ? ಮಧ್ಯಪ್ರಾಚ್ಯದಲ್ಲಿ ಉಂಟಾಗಿರುವ ಈ ಬಿಕ್ಕಟ್ಟು ದಿನೇದಿನೇ ಉಲ್ಬಣಗೊಳ್ಳುತ್ತಿದ್ದು, ಜಾಗತಿಕ ಮಟ್ಟದ ಆರ್ಥಿಕ ಮತ್ತು ರಾಜಕೀಯ ಅಸ್ಥಿರತೆಗೆ ಕಾರಣವಾಗುತ್ತಿದೆ. ಕ್ಷಿಪಣಿಗಳ ಆರ್ಭಟ, ಹೆಚ್ಚುತ್ತಿರುವ ಸಾವು-ನೋವುಗಳು ಮತ್ತು ಪರಮಾಣು ಶಕ್ತಿ ಹೊಂದಿರುವ ರಾಷ್ಟ್ರಗಳ ನೇರ ಮುಖಾಮುಖಿಯು ಮಾನವ ಕುಲದ ವಿನಾಶದ ಮುನ್ಸೂಚನೆಯಂತೆ ಭಾಸವಾಗುತ್ತಿದೆ. ಮುಂದಿನ ದಿನಗಳಲ್ಲಿ ಪರಿಸ್ಥಿತಿ ತಣ್ಣಗಾಗದಿದ್ದರೆ, ಜಗತ್ತು ಮತ್ತೊಮ್ಮೆ ಮಹಾ ದುರಂತವನ್ನು ಎದುರಿಸಬೇಕಾಗಿ ಬರಬಹುದು.
