ದೇಶಾದ್ಯಂತ ಕ್ವಾರಂಟೈನ್ ನಲ್ಲಿ ಇರುವವರ ಸಂಖ್ಯೆ 31.6 ಲಕ್ಷ !
ಹೊಸದಿಲ್ಲಿ, ಜುಲೈ 18: ಇದುವರೆಗೆ ದೇಶದಲ್ಲಿ 10 ಲಕ್ಷಕ್ಕೂ ಹೆಚ್ಚು ಜನರಿಗೆ ಸೋಂಕು ತಗುಲಿದ್ದು, ಕೊರೋನವೈರಸ್ ಸೋಂಕು ಹರಡುವುದನ್ನು ತಡೆಯಲು ಅಧಿಕಾರಿಗಳು ಸಮಗ್ರ ಪ್ರಯತ್ನಗಳನ್ನು ಕೈಗೊಂಡಿರುವ ಹಿನ್ನಲೆಯಲ್ಲಿ ದೇಶಾದ್ಯಂತ ಪ್ರಸ್ತುತ 31.6 ಲಕ್ಷ ಜನರು ಕ್ವಾರಂಟೈನ್ ನಲ್ಲಿ ಇರುವುದಾಗಿ ಅಧಿಕಾರಿಗಳು ತಿಳಿಸಿದ್ದಾರೆ. ಉತ್ತರ ಪ್ರದೇಶದಲ್ಲಿ ರಾಜ್ಯಗಳಲ್ಲಿ ಹೆಚ್ಚಿನ ಸಂಖ್ಯೆಯಲ್ಲಿ ಜನರು ಕ್ವಾರಂಟೈನ್ ನಲ್ಲಿ ಇದ್ದರೆ, ನಂತರದ ಸ್ಥಾನದಲ್ಲಿ ಮಹಾರಾಷ್ಟ್ರವಿದೆ ಎಂದು ಅವರು ಹೇಳಿದರು.
ಲಭ್ಯವಿರುವ ಇತ್ತೀಚಿನ ಅಧಿಕೃತ ಅಂದಾಜಿನ ಪ್ರಕಾರ, ಉತ್ತರಪ್ರದೇಶದಲ್ಲಿ 11 ಲಕ್ಷಕ್ಕೂ ಹೆಚ್ಚು ಜನರು, ಮಹಾರಾಷ್ಟ್ರದಲ್ಲಿ 7.27 ಲಕ್ಷ, ಗುಜರಾತ್ನಲ್ಲಿ 3.25 ಲಕ್ಷ ಮತ್ತು ಒಡಿಶಾದಲ್ಲಿ 2.4 ಲಕ್ಷ ಜನರು ಕ್ವಾರಂಟೈನ್ ಗೆ ಒಳಪಟ್ಟಿದ್ದಾರೆ. ಭಾರತದಾದ್ಯಂತ ಒಟ್ಟು 31.6 ಲಕ್ಷ ಜನರು ಪ್ರಸ್ತುತ ಆಸ್ಪತ್ರೆ ಮತ್ತು ಹೋಂ ಕ್ವಾರಂಟೈನ್ ನಲ್ಲಿ ಇರುವುದಾಗಿ ಕೇಂದ್ರ ಗೃಹ ಸಚಿವಾಲಯದ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.
ವೈರಸ್ ಹರಡುವುದನ್ನು ತಡೆಯಲು ಶಂಕಿತ ಕೋವಿಡ್-19 ರೋಗಿಗಳು, ಲಕ್ಷಣರಹಿತ ಮತ್ತು ಸೌಮ್ಯ ಲಕ್ಷಣಗಳಿರುವ ಪ್ರಕರಣಗಳು ಮತ್ತು ಸೋಂಕಿತ ಜನರ ಸಂಪರ್ಕಿತರನ್ನು ಕ್ವಾರಂಟೈನ್ ಗೆ ಒಳಪಡಿಸಲಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ಉತ್ತರ ಪ್ರದೇಶ ಮತ್ತು ಅಸ್ಸಾಂನಂತಹ ಕೆಲವು ರಾಜ್ಯಗಳಲ್ಲಿ ಹೋಂ ಕ್ವಾರಂಟೈನ್ ಗೆ ಅನುಮತಿಸುವುದಿಲ್ಲ.
ದೆಹಲಿಯಲ್ಲಿ, ಸೌಮ್ಯ ಮತ್ತು ಲಕ್ಷಣರಹಿತ ಕೋವಿಡ್-19 ರೋಗಿಗಳಿಗೆ ಮಾತ್ರ ಹೋಂ ಕ್ವಾರಂಟೈನ್ ಗೆ ಅನುಮತಿಸಲಾಗಿದೆ ಮತ್ತು ಅವರನ್ನು ದೂರವಾಣಿ ಅಥವಾ ವಿಡಿಯೋ ಕರೆಗಳ ಮೂಲಕ ತಜ್ಞರು ನಿರಂತರವಾಗಿ ಮೇಲ್ವಿಚಾರಣೆ ಮಾಡುತ್ತಿರುತ್ತಾರೆ. ಹರಿಯಾಣದಲ್ಲಿ 49,907 ಜನರು, ತಮಿಳುನಾಡಿನಲ್ಲಿ 46,969, ಛತ್ತೀಸ್ಗಢ ದಲ್ಲಿ 41,0621 ಮತ್ತು ಪಂಜಾಬ್ನಲ್ಲಿ 25,307 ಜನರು ಹೋಂ ಕ್ವಾರಂಟೈನ್ ನಲ್ಲಿ ಇದ್ದಾರೆ.
ಅಂದಾಜಿನ ಪ್ರಕಾರ, ಜಾರ್ಖಂಡ್ನಲ್ಲಿ 24,497, ಕರ್ನಾಟಕದಲ್ಲಿ 17,858, ದೆಹಲಿಯಲ್ಲಿ 14,596 ಮತ್ತು ಅಸ್ಸಾಂನಲ್ಲಿ 8,799 ಜನರನ್ನು ಕ್ವಾರಂಟೈನ್ ಗೆ ಒಳಪಡಿಸಲಾಗಿದೆ. ಕೊರೊನಾ ವೈರಸ್ ಹರಡುವುದನ್ನು ನಿಯಂತ್ರಿಸುವಲ್ಲಿ ದೆಹಲಿ, ಕೇರಳ, ರಾಜಸ್ಥಾನ ಮತ್ತು ಮಧ್ಯಪ್ರದೇಶ ಪರಿಣಾಮಕಾರಿಯಾಗಿ ಕ್ರಮಗಳನ್ನು ಕೈಗೊಂಡಿವೆ ಎಂದು ಗೃಹ ಸಚಿವಾಲಯದ ಅಧಿಕಾರಿಗಳು ತಿಳಿಸಿದ್ದಾರೆ.
ಉತ್ತರ ಪ್ರದೇಶ, ಮಹಾರಾಷ್ಟ್ರ, ತಮಿಳುನಾಡು, ಪಶ್ಚಿಮ ಬಂಗಾಳ ಮತ್ತು ಕರ್ನಾಟಕದಲ್ಲಿ ಪರಿಸ್ಥಿತಿ ಆತಂಕಕಾರಿಯಾಗಿ ಮುಂದುವರಿದಿದೆ ಎಂದು ಮತ್ತೊಬ್ಬ ಅಧಿಕಾರಿ ತಿಳಿಸಿದ್ದಾರೆ. ದೇಶದ ಒಟ್ಟು ಕೊರೋನವೈರಸ್ ಪ್ರಕರಣಗಳು 10,03,832 ಕ್ಕೆ ಏರಿಕೆಯಾಗಿದ್ದು, ಶುಕ್ರವಾರದ ವೇಳೆಗೆ ಸಾವಿನ ಸಂಖ್ಯೆ 25,602 ಕ್ಕೆ ಏರಿದೆ. ಮಹಾರಾಷ್ಟ್ರದಲ್ಲಿ ದೇಶದಲ್ಲೇ ಅತಿ ಹೆಚ್ಚು ಕೋವಿಡ್-19 ಪ್ರಕರಣಗಳು ದಾಖಲಾಗಿದೆ. ಇಲ್ಲಿಯವರೆಗೆ ಮಹಾರಾಷ್ಟ್ರ 2,84,281, ತಮಿಳುನಾಡು 1,56,369, ದೆಹಲಿ 1,18,645, ಕರ್ನಾಟಕ 51,422, ಗುಜರಾತ್ 45,481, ಉತ್ತರ ಪ್ರದೇಶ 43,441 ಮತ್ತು ತೆಲಂಗಾಣ 41,018 ದಾಖಲಾಗಿದ್ದರೆ,
ಆಂಧ್ರಪ್ರದೇಶದಲ್ಲಿ 38,044, ಪಶ್ಚಿಮ ಬಂಗಾಳದಲ್ಲಿ 36,117, ರಾಜಸ್ಥಾನದಲ್ಲಿ 27,174, ಹರಿಯಾಣದಲ್ಲಿ 24,002, ಬಿಹಾರದಲ್ಲಿ 21,764 ಮತ್ತು ಮಧ್ಯಪ್ರದೇಶದಲ್ಲಿ 20,378, ಅಸ್ಸಾಂನಲ್ಲಿ 19,754, ಒಡಿಶಾ 15,392 ಮತ್ತು ಜಮ್ಮು ಮತ್ತು ಕಾಶ್ಮೀರದಲ್ಲಿ 12,156 ಸೋಂಕು ಪ್ರಕರಣಗಳು ದಾಖಲಾಗಿವೆ. ಕೇರಳದಲ್ಲಿ ಇದುವರೆಗೆ 10,275 ಕರೋನವೈರಸ್ ಸೋಂಕುಗಳು ವರದಿಯಾಗಿದ್ದರೆ, ಪಂಜಾಬ್ನಲ್ಲಿ 9,094 ಪ್ರಕರಣಗಳಿವೆ.
