ಬೆಂಗಳೂರು: ರಾಜ್ಯದಲ್ಲಿ ಭಾರೀ ಸಂಚಲನ ಮೂಡಿಸಿದ್ದ ಮಹರ್ಷಿ ವಾಲ್ಮೀಕಿ ಪರಿಶಿಷ್ಟ ಪಂಗಡಗಳ ಅಭಿವೃದ್ಧಿ ನಿಗಮದ ನೂರಾರು ಕೋಟಿ ರೂಪಾಯಿ ಅಕ್ರಮ ಹಣ ವರ್ಗಾವಣೆ ಪ್ರಕರಣಕ್ಕೆ ಸಂಬಂಧಿಸಿದಂತೆ, ರಾಜ್ಯ ಸರ್ಕಾರದ ವಿರುದ್ಧ ಬಿಜೆಪಿ ತನ್ನ ಹೋರಾಟವನ್ನು ತೀವ್ರಗೊಳಿಸಿದೆ. ನಿಗಮದ ಹಣ ಲೂಟಿ ಮಾಡುವಾಗ ದಲಿತರ ಮಕ್ಕಳು ನೆನಪಿಗೆ ಬರಲಿಲ್ಲವೇ ಎಂದು ಸಚಿವ ಬಿ.ನಾಗೇಂದ್ರ ಅವರನ್ನು ಮಾಜಿ ಸಚಿವ ಬಿ.ಶ್ರೀರಾಮುಲು ತೀವ್ರವಾಗಿ ಪ್ರಶ್ನಿಸಿದ್ದಾರೆ.
ಸಚಿವ ಬಿ.ನಾಗೇಂದ್ರ ಅವರ ರಾಜೀನಾಮೆಗೆ ಆಗ್ರಹಿಸಿ ಕಳೆದ ಕೆಲವು ದಿನಗಳಿಂದ ಬಿಜೆಪಿ ನಾಯಕರು ನಡೆಸುತ್ತಿರುವ ಅಹೋರಾತ್ರಿ ಧರಣಿ ಸತ್ಯಾಗ್ರಹದಲ್ಲಿ ಭಾಗವಹಿಸಿ ಮಾತನಾಡಿದ ಶ್ರೀರಾಮುಲು, ಕಾಂಗ್ರೆಸ್ ಸರ್ಕಾರದ ಭ್ರಷ್ಟಾಚಾರದ ವಿರುದ್ಧ ಆಕ್ರೋಶ ಹೊರಹಾಕಿದರು.
Related posts
ಬಡ ದಲಿತರ ಹಣದಲ್ಲಿ ಲ್ಯಾಂಬೋರ್ಗಿನಿ ಕಾರು
ಸಚಿವ ನಾಗೇಂದ್ರ ಅವರಿಗೆ ಈಗ ದಿಢೀರನೆ ದಲಿತರಿಗೆ ಅನ್ಯಾಯವಾಗಿದೆ ಎಂಬ ನೆನಪು ಬರುತ್ತಿದೆ. ಆದರೆ ಭ್ರಷ್ಟಾಚಾರ ಮಾಡುವಾಗ, ಹಣ ಲೂಟಿ ಹೊಡೆಯುವಾಗ ಈ ದಲಿತರ ಮಕ್ಕಳು ನೆನಪಿಗೆ ಬರಲಿಲ್ಲವೇ? ಪರಿಶಿಷ್ಟ ಪಂಗಡದ ಬಡ ಜನರಿಗೆ ತಲುಪಬೇಕಿದ್ದ ಕೋಟ್ಯಂತರ ರೂಪಾಯಿ ಹಣವನ್ನು ದೋಚಿ ಮಹಾನ್ ಭ್ರಷ್ಟಾಚಾರ ಎಸಗಲಾಗಿದೆ. ಲೂಟಿ ಮಾಡಿದ ಹಣವನ್ನು ವಾಪಸ್ ಕೊಟ್ಟಿದ್ದರೆ ಕನಿಷ್ಠ ಕ್ಷಮಿಸಬಹುದಿತ್ತು, ಆದರೆ ಅದನ್ನೂ ಮಾಡಿಲ್ಲ. ಕೋಟಿಗಟ್ಟಲೆ ಬೆಲೆ ಬಾಳುವ ಲ್ಯಾಂಬೋರ್ಗಿನಿ ಕಾರು ತೆಗೆದುಕೊಂಡು ಅಡ್ಡಾಡುತ್ತಿದ್ದಾರಲ್ಲ, ಅದು ಯಾರ ದುಡ್ಡು? ಬಡವರ ರಕ್ತ ಹೀರಿ ಗಳಿಸಿದ ದುಡ್ಡಿನಿಂದ ಈ ವೈಭೋಗವೇ ಎಂದು ಶ್ರೀರಾಮುಲು ಸಚಿವರನ್ನು ತರಾಟೆಗೆ ತೆಗೆದುಕೊಂಡರು.
ರಕ್ಷಣೆಗೆ ದಲಿತ ಅಸ್ತ್ರ ಪ್ರಯೋಗ ಬೇಡ:
ಈ ಹಿಂದೆ ಮುಖ್ಯಮಂತ್ರಿಯಾಗಿದ್ದ ಸಿದ್ದರಾಮಯ್ಯ ಅವರೇ 87 ಕೋಟಿ ರೂಪಾಯಿ ಅಕ್ರಮ ಆಗಿರುವುದನ್ನು ಸದನದಲ್ಲೇ ಒಪ್ಪಿಕೊಂಡಿದ್ದರು. ಸಂವಿಧಾನದ ಹೆಸರು ಹೇಳುತ್ತಲೇ ಮಹಾನ್ ಭ್ರಷ್ಟಾಚಾರ ಮಾಡಿದವರು, ಈಗ ತಮ್ಮ ರಕ್ಷಣೆಗೆ ದಲಿತ ಅಸ್ತ್ರ ಪ್ರಯೋಗಿಸುವ ಅಗತ್ಯವಿಲ್ಲ. ನಾವು ಸರ್ಕಾರದ ಪ್ರತಿಯೊಬ್ಬ ದಲಿತ ಸಚಿವರ ಮೇಲೆಯೂ ಈ ರೀತಿ ಆರೋಪ ಮಾಡುತ್ತಿಲ್ಲ, ಕೇವಲ ತಪ್ಪು ಮಾಡಿದವರ ವಿರುದ್ಧ ಮಾತನಾಡುತ್ತಿದ್ದೇವೆ.
ಸಾರಾಯಿ, ಬಂಗಾರದ ಅಂಗಡಿಗೆ ಹಣ ಹೋದ್ದು ಹೇಗೆ?
ಸಚಿವ ನಾಗೇಂದ್ರ ಬಹಳ ದಡ್ಡ ಮತ್ತು ತಿಳಿವಳಿಕೆ ಇಲ್ಲದ ವ್ಯಕ್ತಿ. ಇಷ್ಟೆಲ್ಲಾ ಸಾಕ್ಷ್ಯಾಧಾರಗಳಿದ್ದರೂ ಹಗರಣವೇ ಆಗಿಲ್ಲ ಎಂದು ಹೇಳಿಕೊಂಡು ತಿರುಗುತ್ತಿದ್ದಾರೆ. ಹಗರಣವೇ ನಡೆದಿಲ್ಲ ಎಂದಾದರೆ ಸೇಂದಿ, ಸಾರಾಯಿ ಅಂಗಡಿಗಳಿಗೆ ಹಾಗೂ ಬಂಗಾರದ ಅಂಗಡಿಗಳಿಗೆ ಕೋಟ್ಯಂತರ ರೂಪಾಯಿ ಹಣ ಹೇಗೆ ವರ್ಗಾವಣೆಯಾಯಿತು? ಸಿದ್ದರಾಮಯ್ಯ ಅವರು ಯಾವತ್ತೂ ಒಂದೊಂದು ರೀತಿ ಮಾತನಾಡುವವರಲ್ಲ, ಕಡ್ಡಿ ತುಂಡು ಮಾಡಿದಂತೆ ಸತ್ಯ ಹೇಳುವವರು. ಅವರ ಹೇಳಿಕೆಯೇ ಈ ಬೃಹತ್ ಹಗರಣ ನಡೆದಿರುವುದಕ್ಕೆ ಬಲವಾದ ಸಾಕ್ಷಿಯಾಗಿದೆ ಎಂದು ಶ್ರೀರಾಮುಲು ಹೇಳಿದರು.
ಕೂಡಲೇ ಸಚಿವ ನಾಗೇಂದ್ರ ಅವರನ್ನು ಸಂಪುಟದಿಂದ ವಜಾಗೊಳಿಸಬೇಕು ಮತ್ತು ಲೂಟಿ ಮಾಡಿದ ಪ್ರತಿಯೊಂದು ಪೈಸೆಯನ್ನೂ ವಸೂಲಿ ಮಾಡಬೇಕು ಎಂದು ಬಿಜೆಪಿ ನಾಯಕರು ಈ ಸಂದರ್ಭದಲ್ಲಿ ಆಗ್ರಹಿಸಿದರು.
