ಗೋಂಡಾ: ಯೋಗಗುರು ಬಾಬಾ ರಾಮ್ದೇವ್ ಅವರ ಸ್ವದೇಶಿ ಬ್ರ್ಯಾಂಡ್ ಮತ್ತು ಇತ್ತೀಚಿನ ಹೋರಾಟದ ಎಚ್ಚರಿಕೆಯ ವಿರುದ್ಧ ಬಿಜೆಪಿ ಮಾಜಿ ಸಂಸದ ಬ್ರಿಜ್ಭೂಷಣ್ ಶರಣ್ ಸಿಂಗ್ ತೀವ್ರ ವಾಗ್ದಾಳಿ ನಡೆಸಿದ್ದಾರೆ. ರಾಮ್ದೇವ್ ಆರಂಭಿಸಿದ ಸ್ವದೇಶಿ ಚಳವಳಿ ಈಗ ಹಾದಿ ತಪ್ಪಿದ್ದು, ಅವರು ವಿದೇಶಿ ಒಳಉಡುಪುಗಳನ್ನು ಮಾರಾಟ ಮಾಡುವ ಮಟ್ಟಕ್ಕೆ ಇಳಿದಿದ್ದಾರೆ ಎಂದು ವ್ಯಂಗ್ಯವಾಡಿದ್ದಾರೆ. ಈ ವಾಕ್ಸಮರವು ರಾಜಕೀಯ ವಲಯದಲ್ಲಿ ತೀವ್ರ ಚರ್ಚೆಗೆ ಕಾರಣವಾಗಿದೆ.
ಸ್ವದೇಶಿ ಹೆಸರಲ್ಲಿ ನಕಲಿ ಉತ್ಪನ್ನಗಳ ದಂಧೆ
Related posts
ಗೋಂಡಾ ಜಿಲ್ಲೆಯ ಕಾಲೇಜೊಂದರಲ್ಲಿ ನಡೆದ ಕಾರ್ಯಕ್ರಮದಲ್ಲಿ ಮಾತನಾಡಿದ ಬ್ರಿಜ್ಭೂಷಣ್ ಸಿಂಗ್, ರಾಮ್ದೇವ್ ಅವರ ಉತ್ಪನ್ನಗಳ ಗುಣಮಟ್ಟವನ್ನು ಪ್ರಶ್ನಿಸಿದರು. ಆರಂಭದಲ್ಲಿ ದೇಶಿ ಉತ್ಪನ್ನಗಳ ಪರವಾಗಿ ಧ್ವನಿ ಎತ್ತಿದ್ದಾಗ ರಾಮ್ದೇವ್ ಅವರ ಹೋರಾಟಕ್ಕೆ ಬೆಂಬಲವಿತ್ತು. ಆದರೆ ಈಗ ಅವರ ಉದ್ದೇಶ ಬದಲಾಗಿದೆ. ನಕಲಿ ಉತ್ಪನ್ನಗಳು ಮತ್ತು ವಿದೇಶಿ ಶೈಲಿಯ ಒಳಉಡುಪುಗಳನ್ನೂ ಸ್ವದೇಶಿ ಎಂಬ ಹೆಸರಿನಲ್ಲಿ ಮಾರಾಟ ಮಾಡುತ್ತಿದ್ದಾರೆ ಎಂದು ಆರೋಪಿಸಿದರು.
ಗಂಡಸಿನಂತೆ ಬೀದಿಗೆ ಬಂದು ಹೋರಾಡಿ
ಇತ್ತೀಚೆಗೆ ಕೇಂದ್ರ ಸರ್ಕಾರದ ವಿರುದ್ಧ ಪ್ರತಿಭಟನೆಯ ಎಚ್ಚರಿಕೆ ನೀಡಿದ್ದ ರಾಮ್ದೇವ್ ಅವರಿಗೆ ಬ್ರಿಜ್ಭೂಷಣ್ ನೇರ ಸವಾಲು ಎಸೆದಿದ್ದಾರೆ. ರಾಮ್ದೇವ್ ಅವರಿಗೆ ನಿಜವಾಗಿಯೂ ಕಾಳಜಿ ಇದ್ದರೆ, ಕೇವಲ ಹೇಳಿಕೆಗಳಿಗೆ ಸೀಮಿತವಾಗಬಾರದು. ಗಂಡಸಿನಂತೆ ಬೀದಿಗೆ ಬಂದು ನಿರ್ಣಾಯಕ ಹೋರಾಟ ನಡೆಸಲಿ. ಆಗ ಅವರ ಅಸಲಿ ಶಕ್ತಿ ಏನೆಂಬುದು ತಿಳಿಯುತ್ತದೆ ಎಂದು ಕಿಡಿಕಾರಿದ್ದಾರೆ. ರಾಮ್ದೇವ್ ಅವರ ಪ್ರತಿಭಟನಾ ಬೆದರಿಕೆಯನ್ನು ಬ್ರಿಜ್ಭೂಷಣ್ ಗಂಭೀರವಾಗಿ ಪರಿಗಣಿಸದೆ ಲೇವಡಿ ಮಾಡಿದ್ದಾರೆ.
ಕೇಂದ್ರಕ್ಕೆ ರಾಮ್ದೇವ್ ಎಚ್ಚರಿಕೆ ನೀಡಿದ್ದೇನು?
ದೇಶದ ಶಿಕ್ಷಣ ಮತ್ತು ಸರ್ಕಾರಿ ನೇಮಕಾತಿ ಪ್ರಕ್ರಿಯೆಯಲ್ಲಿ ನಡೆಯುತ್ತಿರುವ ಭ್ರಷ್ಟಾಚಾರವನ್ನು ಪ್ರಶ್ನಿಸಿದ್ದ ಬಾಬಾ ರಾಮ್ದೇವ್, ಕೂಡಲೇ ಈ ಸಮಸ್ಯೆಗಳನ್ನು ಸರಿಪಡಿಸದಿದ್ದರೆ ತಾನು ಪ್ರತಿಭಟನೆ ನಡೆಸುವುದಾಗಿ ಕೇಂದ್ರ ಸರ್ಕಾರಕ್ಕೆ ಎಚ್ಚರಿಕೆ ನೀಡಿದ್ದರು. ಶಾಲೆಗಳಲ್ಲಿ ಕುಡಿಯುವ ನೀರು, ವಿದ್ಯುತ್ ಮತ್ತು ಶಿಕ್ಷಕರ ಕೊರತೆ ಎದ್ದು ಕಾಣುತ್ತಿದೆ. ಯುವಕರು ಉದ್ಯೋಗಕ್ಕಾಗಿ ಬೀದಿಗಿಳಿದು ಹೋರಾಡುತ್ತಿದ್ದಾರೆ. ಸರ್ಕಾರ ಈ ಕುರಿತು ಶೀಘ್ರ ನಿರ್ಧಾರ ಕೈಗೊಳ್ಳಬೇಕು ಎಂದು ಅವರು ಆಗ್ರಹಿಸಿದ್ದರು.
ಬಿಜೆಪಿ ನಾಯಕರ ಸರಣಿ ಟೀಕೆ
ಕೇವಲ ಬ್ರಿಜ್ಭೂಷಣ್ ಮಾತ್ರವಲ್ಲದೆ, ಇತ್ತೀಚೆಗೆ ಬಿಜೆಪಿ ಸಂಸದೆ ಕಂಗನಾ ರಣಾವತ್ ಕೂಡ ಬಾಬಾ ರಾಮ್ದೇವ್ ವಿರುದ್ಧ ಅಸಮಾಧಾನ ವ್ಯಕ್ತಪಡಿಸಿದ್ದರು. ಯೋಗಗುರು ಮತ್ತು ಬಿಜೆಪಿ ನಾಯಕರ ನಡುವಿನ ಈ ಬಹಿರಂಗ ಸಂಘರ್ಷ ಈಗ ಹೊಸ ತಿರುವು ಪಡೆದುಕೊಂಡಿದೆ. ಒಂದು ಕಾಲದಲ್ಲಿ ಸರ್ಕಾರದ ಪರವಾಗಿದ್ದ ರಾಮ್ದೇವ್, ಈಗ ಭ್ರಷ್ಟಾಚಾರದ ಹೆಸರಿನಲ್ಲಿ ಸರ್ಕಾರವನ್ನೇ ಪ್ರಶ್ನಿಸುತ್ತಿರುವುದು ಬಿಜೆಪಿ ನಾಯಕರ ಕೆಂಗಣ್ಣಿಗೆ ಗುರಿಯಾಗಿದೆ. ರಾಮ್ದೇವ್ ಅವರ ಮುಂದಿನ ನಡೆ ಮತ್ತು ಬ್ರಿಜ್ಭೂಷಣ್ ಅವರ ಈ ಟೀಕೆಗೆ ಯೋಗಗುರು ಯಾವ ರೀತಿ ಪ್ರತಿಕ್ರಿಯಿಸುತ್ತಾರೆ ಎಂಬುದು ಕುತೂಹಲ ಮೂಡಿಸಿದೆ.
