ಉತ್ತರ ಪ್ರದೇಶದ ರಾಜಕೀಯ ರಣಕಣದಲ್ಲಿ ಈಗ ಅಯೋಧ್ಯೆಯ ಕಿಚ್ಚು ಹತ್ತಿಕೊಂಡಿದೆ. ಸಮಾಜವಾದಿ ಪಕ್ಷದ ಮುಖ್ಯಸ್ಥ ಅಖಿಲೇಶ್ ಯಾದವ್ ಅವರ ಟೀಕೆಗಳಿಗೆ ಮುಖ್ಯಮಂತ್ರಿ ಯೋಗಿ ಆದಿತ್ಯನಾಥ್ ಅವರು ಅತ್ಯಂತ ತೀಕ್ಷ್ಣವಾಗಿ ಪ್ರತಿಕ್ರಿಯಿಸಿದ್ದು, ಅಯೋಧ್ಯೆಯಲ್ಲೇ ಮುಖಾಮುಖಿ ಸಮರಕ್ಕೆ ಬರುವಂತೆ ಬಹಿರಂಗ ಆಹ್ವಾನ ನೀಡಿದ್ದಾರೆ.
ಧಮ್ ಇದ್ದರೆ ಅಯೋಧ್ಯೆಯಿಂದ ಸ್ಪರ್ಧಿಸಿ
Related posts
ಇತ್ತೀಚೆಗೆ ಅಖಿಲೇಶ್ ಯಾದವ್ ಅವರು ಅಯೋಧ್ಯೆಗೆ ಭೇಟಿ ನೀಡಿದ ಸಂದರ್ಭದಲ್ಲಿ, ಬಿಜೆಪಿ ನಾಯಕರಿಗೆ ತಾಕತ್ ಇದ್ದರೆ ಅಯೋಧ್ಯೆಯಿಂದ ಗೆದ್ದು ತೋರಿಸಲಿ ಎಂದು ಲೇವಡಿ ಮಾಡಿದ್ದರು. ಈ ಸವಾಲನ್ನು ಸ್ವೀಕರಿಸಿರುವ ಯೋಗಿ ಆದಿತ್ಯನಾಥ್, ಅಖಿಲೇಶ್ ಜೀ, ಧಮ್ ಇದ್ದರೆ ಅಯೋಧ್ಯೆಯಿಂದ ನೀವು ನಾಮಪತ್ರ ಸಲ್ಲಿಸಿ, ನಾನು ಕೂಡ ಅಲ್ಲಿಂದಲೇ ಸ್ಪರ್ಧಿಸುತ್ತೇನೆ. ಜನರ ತೀರ್ಪು ಯಾರ ಪರವಾಗಿ ಇರಲಿದೆ ಮತ್ತು ನಮ್ಮಿಬ್ಬರಲ್ಲಿ ಯಾರ ಅದೃಷ್ಟ ಚೆನ್ನಾಗಿದೆ ಎಂಬುದು ಅಲ್ಲೇ ನಿರ್ಧಾರವಾಗಲಿ ಎಂದು ಗುಡುಗಿದ್ದಾರೆ.
ಅಯೋಧ್ಯೆ ನಮಗೆ ಅಭಿವೃದ್ಧಿಯ ಸಂಕೇತ ರಾಜಕೀಯ ದಾಳವಲ್ಲ
ಬಲರಾಮಪುರದ ಸಾರ್ವಜನಿಕ ಸಭೆಯಲ್ಲಿ ಮಾತನಾಡಿದ ಯೋಗಿ, ಅಯೋಧ್ಯೆ ನಮಗೆ ಕೇವಲ ಚುನಾವಣಾ ಕ್ಷೇತ್ರವಲ್ಲ. ಅದು ಉತ್ತರ ಪ್ರದೇಶದ ಗೌರವ ಮತ್ತು ಸಾಂಸ್ಕೃತಿಕ ಅಸ್ಮಿತೆಯ ಕೇಂದ್ರ. ನಾವು ಅಲ್ಲಿಗೆ ರಾಜಕೀಯ ಲಾಭಕ್ಕಾಗಿ ಹೋಗುವುದಿಲ್ಲ, ಬದಲಿಗೆ ಭವ್ಯ ಭಾರತದ ನಿರ್ಮಾಣ ಮತ್ತು ಅಭಿವೃದ್ಧಿಯ ಕನಸಿನೊಂದಿಗೆ ಹೋಗುತ್ತೇವೆ ಎಂದು ಸ್ಪಷ್ಟಪಡಿಸಿದರು.
ಪಿಡಿಎ ಎಂದರೆ ಪರಿವಾರ ಅಭಿವೃದ್ಧಿ ಪ್ರಾಧಿಕಾರ
ಸಮಾಜವಾದಿ ಪಕ್ಷದ ಪಿಡಿಎ ಎನ್ನುವ ಘೋಷಣೆಯನ್ನು ಯೋಗಿ ಆದಿತ್ಯನಾಥ್ ಕ್ರೂರವಾಗಿ ವ್ಯಂಗ್ಯವಾಡಿದ್ದಾರೆ. ಇದು ಹಿಂದುಳಿದವರ ಪರವಾಗಿ ಇರುವ ಸಂಘಟನೆಯಲ್ಲ, ಬದಲಿಗೆ ಪರಿವಾರ ಅಭಿವೃದ್ಧಿ ಪ್ರಾಧಿಕಾರ ಎಂದು ಕರೆದಿದ್ದಾರೆ. ರಾಜ್ಯಸಭಾ ಚುನಾವಣೆಯಲ್ಲಿ ಒಬ್ಬೇ ಒಬ್ಬ ದಲಿತ ಅಭ್ಯರ್ಥಿಗೂ ಸ್ಥಾನ ನೀಡದ ಅಖಿಲೇಶ್ ಯಾದವ್ ಅವರಿಗೆ ಸಾಮಾಜಿಕ ನ್ಯಾಯದ ಬಗ್ಗೆ ಮಾತನಾಡುವ ಹಕ್ಕಿಲ್ಲ ಎಂದು ಕಿಡಿಕಾರಿದರು.
2017ಕ್ಕಿಂತ ಮೊದಲು ಉತ್ತರ ಪ್ರದೇಶದಲ್ಲಿ ಮಾಫಿಯಾಗಳು ಮತ್ತು ಭೂಗಳ್ಳರ ಅಟ್ಟಹಾಸವಿತ್ತು. ಅರಾಜಕತೆಯಿಂದ ರಾಜ್ಯ ತತ್ತರಿಸಿತ್ತು ಎಂದು ಯೋಗಿ ನೆನಪಿಸಿದರು. ಈಗ ರಾಜ್ಯದಲ್ಲಿ ಶಾಂತಿ ನೆಲೆಸಿದ್ದು, ಅಭಿವೃದ್ಧಿಯ ಪರ್ವ ಆರಂಭವಾಗಿದೆ. ಆದರೆ ವಿರೋಧ ಪಕ್ಷಗಳು ಸೋಲಿನ ಭೀತಿಯಿಂದ ಈಗಲೇ ಇವಿಎಂ ಯಂತ್ರಗಳ ಮೇಲೆ ಗೂಬೆ ಕೂರಿಸಲು ಶುರು ಮಾಡಿವೆ. ಸೋಲುವ ಮುನ್ಸೂಚನೆ ಸಿಕ್ಕಾಗಲೆಲ್ಲ ಅಖಿಲೇಶ್ ಇವಿಎಂ ಬಗ್ಗೆ ದೂರುವುದು ಅವರ ಹಳೆಯ ಚಾಳಿ ಎಂದು ಅವರು ಟೀಕಿಸಿದರು.
ಉತ್ತರ ಪ್ರದೇಶದ ಚುನಾವಣಾ ಇತಿಹಾಸದಲ್ಲಿ ಈ ಸವಾಲು ಮತ್ತು ಪ್ರತಿ ಸವಾಲುಗಳು ಹೊಸ ಸಂಚಲನ ಮೂಡಿಸಿದ್ದು, ಅಯೋಧ್ಯೆಯ ಅಖಾಡದಲ್ಲಿ ದಿಗ್ಗಜರ ಸಮರ ನಡೆಯುತ್ತದೆಯೇ ಎಂಬ ಕುತೂಹಲ ಈಗ ಮನೆ ಮಾಡಿದೆ.
