ಉಡುಪಿ: ಕರ್ನಾಟಕದ ಕರಾವಳಿ ಭಾಗದಲ್ಲಿ ಬಿಜೆಪಿಯ ಭದ್ರಕೋಟೆ ಎಂದೇ ಕರೆಯಲ್ಪಡುವ ಉಡುಪಿ ವಿಧಾನಸಭಾ ಕ್ಷೇತ್ರದಲ್ಲಿ ಈಗ ರಾಜಕೀಯ ಕಂಪನ ಶುರುವಾಗಿದೆ. ಮುಂದಿನ ವಿಧಾನಸಭಾ ಚುನಾವಣೆಗೆ ಇನ್ನು ಸಾಕಷ್ಟು ಸಮಯ ಬಾಕಿ ಇದ್ದರೂ, ಬಿಜೆಪಿಯ ಪ್ರಭಾವಿ ನಾಯಕ ಹಾಗೂ ಹಿಂದುತ್ವದ ಫೈರ್ ಬ್ರ್ಯಾಂಡ್ ಎಂದೇ ಗುರುತಿಸಿಕೊಂಡಿರುವ ಮಾಜಿ ಶಾಸಕ ಕೆ. ರಘುಪತಿ ಭಟ್ ಅವರು ಕಾಂಗ್ರೆಸ್ ಸೇರ್ಪಡೆಯಾಗಲಿದ್ದಾರೆ ಎಂಬ ಸುದ್ದಿ ರಾಜಕೀಯ ಅಂಗಳದಲ್ಲಿ ಸಂಚಲನ ಮೂಡಿಸಿದೆ. ಬಿಜೆಪಿಯ ಕಟ್ಟಾಳು ಡಾ. ವಿ.ಎಸ್. ಆಚಾರ್ಯ ಅವರ ಗರಡಿಯಲ್ಲಿ ಬೆಳೆದು, ಉಡುಪಿಯಲ್ಲಿ ಕಮಲವನ್ನು ಅರಳಿಸಿದ ರಘುಪತಿ ಭಟ್ ಅವರು ಈಗ ಹಸ್ತದ ಆಶ್ರಯ ಪಡೆಯುತ್ತಿರುವುದು ಬಿಜೆಪಿಗೆ ನುಂಗಲಾರದ ತುತ್ತಾಗಿ ಪರಿಣಮಿಸಿದೆ.
ಗುರು ಶಿಷ್ಯರ ನಡುವಿನ ಅಸ್ಮಿತೆಯ ಹೋರಾಟ
ಕಳೆದ 2023ರ ಚುನಾವಣೆಯಲ್ಲಿ ರಘುಪತಿ ಭಟ್ ಅವರಿಗೆ ಟಿಕೆಟ್ ನಿರಾಕರಿಸಿದ್ದ ಬಿಜೆಪಿ, ಅವರ ಶಿಷ್ಯ ಯಶಪಾಲ್ ಸುವರ್ಣ ಅವರಿಗೆ ಮಣೆ ಹಾಕಿತ್ತು. ಅಂದು ಕಣ್ಣೀರಿಟ್ಟಿದ್ದರೂ ಪಕ್ಷಕ್ಕಾಗಿ ದುಡಿದಿದ್ದ ರಘುಪತಿ ಭಟ್, ಈಗ ಶಾಸಕ ಯಶಪಾಲ್ ಸುವರ್ಣ ಅವರ ವರ್ತನೆ ಮತ್ತು ಪಕ್ಷದಲ್ಲಿನ ಅವಗಣನೆಯಿಂದ ಬೇಸತ್ತು ಕಾಂಗ್ರೆಸ್ ಕಡೆ ಮುಖ ಮಾಡಿದ್ದಾರೆ ಎನ್ನಲಾಗಿದೆ. ಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್ ಈಗಾಗಲೇ ಭಟ್ ಅವರೊಂದಿಗೆ ಒಂದು ಸುತ್ತಿನ ಮಾತುಕತೆ ನಡೆಸಿದ್ದು, ಕರಾವಳಿಯಲ್ಲಿ ಕಾಂಗ್ರೆಸ್ ಅಸ್ತಿತ್ವವನ್ನು ಮರುಸ್ಥಾಪಿಸಲು ಭಟ್ ಅವರನ್ನು ದಾಳವಾಗಿ ಬಳಸಿಕೊಳ್ಳಲು ಸಂಚು ರೂಪಿಸಿದ್ದಾರೆ. ಸಾಯುವ ಹೊತ್ತಲ್ಲೂ ಕೇಸರಿ ಶಾಲು ಮೈಮೇಲಿರಲಿ ಎಂದಿದ್ದ ಭಟ್, ಈಗ ಕಾಂಗ್ರೆಸ್ ಕೈ ಹಿಡಿಯುತ್ತಿರುವುದು ರಾಜಕೀಯ ವಿಪರ್ಯಾಸವೇ ಸರಿ.
ಕಾಂಗ್ರೆಸ್ ಗೆ ಲಾಭವೋ ಅಥವಾ ಕಾರ್ಯಕರ್ತರ ವಿರೋಧವೋ?
ರಘುಪತಿ ಭಟ್ ಕಾಂಗ್ರೆಸ್ ಸೇರಿದರೆ ಉಡುಪಿಯಲ್ಲಿ ಬಿಜೆಪಿಯ ಮತಬ್ಯಾಂಕ್ ಗೆ ದೊಡ್ಡ ಪೆಟ್ಟು ಬೀಳುವುದು ಖಚಿತ. ಭಟ್ ಅವರೊಂದಿಗೆ ಹಲವು ಸ್ಥಳೀಯ ನಾಯಕರು ಮತ್ತು ನಿಷ್ಠಾವಂತ ಕಾರ್ಯಕರ್ತರು ಕಾಂಗ್ರೆಸ್ ಗೆ ವಲಸೆ ಹೋಗುವ ಸಾಧ್ಯತೆಯಿದೆ. ಆದರೆ, ದಶಕಗಳಿಂದ ಕಾಂಗ್ರೆಸ್ ಸಿದ್ಧಾಂತವನ್ನು ನಂಬಿಕೊಂಡು ಬಂದಿರುವ ಸ್ಥಳೀಯ ಕೈ ನಾಯಕರು ಹಿಂದುತ್ವದ ಹಿನ್ನೆಲೆಯುಳ್ಳ ಭಟ್ ಅವರನ್ನು ಅಷ್ಟು ಸುಲಭವಾಗಿ ಒಪ್ಪಿಕೊಳ್ಳುತ್ತಾರಾ ಎಂಬ ಪ್ರಶ್ನೆಯೂ ಇದೆ. ಕರಾವಳಿಯ 13 ಕ್ಷೇತ್ರಗಳ ಪೈಕಿ ಕೇವಲ ಎರಡು ಸ್ಥಾನಗಳನ್ನು ಹೊಂದಿರುವ ಕಾಂಗ್ರೆಸ್ ಗೆ, ಭಟ್ ಅವರ ಸೇರ್ಪಡೆ ಸಂಜೀವಿನಿಯಂತೆ ಕೆಲಸ ಮಾಡಬಲ್ಲದು ಎಂಬುದು ಹೈಕಮಾಂಡ್ ಲೆಕ್ಕಾಚಾರ.
ಬಿಜೆಪಿಯ ಪ್ರತಿ ತಂತ್ರ: ಪ್ರಮೋದ್ ಮಧ್ವರಾಜ್ ಅಸ್ತ್ರ?
ಒಂದೊಮ್ಮೆ ರಘುಪತಿ ಭಟ್ ಕಾಂಗ್ರೆಸ್ ಅಭ್ಯರ್ಥಿಯಾದರೆ, ಬಿಜೆಪಿಯು ಯಶಪಾಲ್ ಸುವರ್ಣ ಅವರ ಬದಲಿಗೆ ಪ್ರಮೋದ್ ಮಧ್ವರಾಜ್ ಅವರನ್ನು ಕಣಕ್ಕಿಳಿಸುವ ಸಾಧ್ಯತೆಯಿದೆ. ಮೊಗವೀರ ಸಮುದಾಯದ ಪ್ರಭಾವಿ ನಾಯಕರಾದ ಪ್ರಮೋದ್ ಮತ್ತು ಯಶಪಾಲ್ ಇಬ್ಬರಲ್ಲೂ ಒಬ್ಬರಿಗೆ ಬಿಜೆಪಿ ಮಣೆ ಹಾಕಲಿದೆ. ವಿಶೇಷವೆಂದರೆ, ರಘುಪತಿ ಭಟ್ ಕಾಂಗ್ರೆಸ್ ಗೆ ಹೋದರೆ, ಮೂಲತಃ ಕಾಂಗ್ರೆಸ್ ನಿಂದ ಬಂದ ಪ್ರಮೋದ್ ಮಧ್ವರಾಜ್ ಬಿಜೆಪಿ ಪರವಾಗಿ ಸೆಣಸಬೇಕಾಗುತ್ತದೆ. ಇದು ಉಡುಪಿಯ ಇತಿಹಾಸದಲ್ಲಿ ಅತ್ಯಂತ ಕುತೂಹಲಕಾರಿ ಚದುರಂಗದಾಟವಾಗಲಿದ್ದು, ಹಿಂದುತ್ವ ಮತ್ತು ಅಭಿವೃದ್ಧಿಯ ನಡುವೆ ಸಿದ್ಧಾಂತಗಳ ಅದಲು ಬದಲಿಗೆ ಸಾಕ್ಷಿಯಾಗಲಿದೆ.
