ಆಗ ಗೆದ್ದಿದ್ದು ಬೆಳ್ಳಿ.. ಆದ್ರೆ ಆ ಬೆಳ್ಳಿಯೇ ಈಗ ಬಂಗಾರವಾಗಿದ್ದು ಹೇಗೆ ?
ಅದು 2018ರ ಜಕಾರ್ತಾ ಏಷ್ಯನ್ ಗೇಮ್ಸ್ ಚಾಂಪಿಯನ್ಷಿಪ್. ಆ ಕ್ರೀಡಾಕೂಟದ 4/400 ಮೀಟರ್ ಮಿಕ್ಸೆಡ್ ರಿಲೆ ಸ್ಪರ್ಧೆಯಲ್ಲಿ ಭಾರತದ ಸ್ಪರ್ಧಿಗಳು ಬೆಳ್ಳಿ ಪದಕ ಗೆದ್ದುಕೊಂಡಿದ್ದರು. ಭಾರತದ ಸ್ಪರ್ಧಿಗಳಿಂದ ಕೆಲವೇ ಕೆಲವು ಸೆಕೆಂಡುಗಳಲ್ಲಿ ಮೊದಲು ಗುರಿ ಮುಟ್ಟಿದ್ದ ಬಹರೈನ್ ಚಿನ್ನದ ಪದಕ ಗೆದ್ದುಕೊಂಡಿತ್ತು. ಅಂದ ಹಾಗೇ ಈ ಕ್ರೀಡಾಕೂಟ ಆಗಿ ಎರಡು ವರ್ಷವಾಯ್ತು. ಆದ್ರೆ ಆ ಎರಡು ವರ್ಷಗಳ ನಂತರ ಭಾರತಕ್ಕೆ ಬೆಳ್ಳಿ ಪದಕ ಬದಲು ಬಂಗಾರದ ಪದಕ ಸಿಕ್ಕಿದೆ.
ಅಂದ ಹಾಗೇ ಇಲ್ಲಿ ಆಗಿದ್ದು ಇಷ್ಟೇ.. ಬಹರೈನ್ ಪರ ಓಡಿದ್ದ ಒಬ್ಬ ಸ್ಪರ್ಧಿ ಉದ್ದೀಪನಾ ಮದ್ದು ಸೇವಿಸಿರುವುದು ಈಗ ಸಾಬೀತಾಗಿದೆ. ಹೀಗಾಗಿ ಬಹರೈನ್ ರಿಲೆ ತಂಡವನ್ನು ಅನರ್ಹಗೊಳಿಸಲಾಗಿದೆ. ಆದ್ರಿಂದ ಎರಡನೇ ಸ್ಥಾನದಲ್ಲಿದ್ದ ಭಾರತ ಮೊದಲ ಸ್ಥಾನಕ್ಕೇರಿದೆ.
ಬಹರೈನ್ ರಿಲೆ ತಂಡದ ಕೆಮಿ ಆಡಿಕೊಯಾ ಅವರು ಉದ್ದೀಪನಾ ದ್ರವ್ಯ ಸೇವನೆ ಮಾಡಿರುವುದು ಪತ್ತೆಯಾಗಿದೆ. ಅಥ್ಲೆಟಿಕ್ಸ್ ಇಂಟೆಗ್ರೆಟಿ ಯುನಿಟ್ ಕೆಮಿ ಆಡೆಕೊಯಾ ಅವರಿಗೆ ನಾಲ್ಕು ವರ್ಷಗಳ ನಿಷೇಧವನ್ನು ಹೇರಿದೆ.
ಇನ್ನು 4/400 ಮೀಟರ್ ಮಿಕ್ಸೆಡ್ ರಿಲೆ ಸ್ಪರ್ಧೆಯಲ್ಲಿ ಭಾರತದ ಪರ ಮಹಮ್ಮದ್ ಅನಾಸ್, ಪೂವಮ್ಮ, ಹಿಮದಾಸ್ ಮತ್ತು ಅರೋಕಿಯಾ ರಾಜೀವ್ ಸ್ಪರ್ಧಿಸಿದ್ದರು. ಭಾರತದ ಮಿಕ್ಸೆಡ್ ರಿಲೆ ತಂಡ 3ನಿಮಿಷ15:71 ಸೆಕೆಂಡುಗಳಲ್ಲಿ 
ಗುರಿ ತಲುಪಿದ್ರೆ, ಬಹರೈನ್ ಮಿಕ್ಸೆಡ್ ರಿಲೆ ತಂಡ 3 ನಿಮಿಷ 11:89 ಸೆಕೆಂಡುಗಳಲ್ಲಿ ಗುರಿ ಮುಟ್ಟಿತ್ತು.
ಇನ್ನೊಂದೆಡೆ ಮಹಿಳೆಯರ 400 ಮೀಟರ್ ಹರ್ಡಲ್ಸ್ ನಲ್ಲಿಯೂ ಭಾರತಕ್ಕೆ ಈಗ ಕಂಚಿನ ಪದಕ ಸಿಕ್ಕಿದೆ. ಬಹರೈನ್ ತಂಡದ ಪರ ಮಿಕ್ಸೆಡ್ ರಿಲೆ ತಂಡದಲ್ಲಿ ಓಡಿದ್ದ ಕೆಮಿ ಆಡಿಕೊಯಾ ಅವರು 400 ಮೀಟರ್ ಹರ್ಡಲ್ಸ್ ಅವರು ಚಿನ್ನ ಗೆದ್ದುಕೊಂಡಿದ್ರು. ಆದ್ರೆ ಈಗ ಅವರು ಅನರ್ಹಗೊಂಡಿದ್ದ ಕಾರಣ ನಾಲ್ಕನೇ ಸ್ಥಾನ ಪಡೆದಿದ್ದ ಭಾರತದ ಅನು ರಾಘವನ್ ಅವರು ಮೂರನೇ ಸ್ಥಾನ ಪಡೆದುಕೊಂಡಿದ್ದಾರೆ.
ಒಟ್ಟಿನಲ್ಲಿ ಜಕಾರ್ತಾ ಏಷ್ಯನ್ ಗೇಮ್ಸ್ ನಲ್ಲಿ ಭಾರತದ ಪದಕ ಸಂಖ್ಯೆ 20ಕ್ಕೇರಿದೆ. 8 ಚಿನ್ನ, 9 ಬೆಳ್ಳಿ ಹಾಗೂ 3 ಕಂಚಿನ ಪದಕಗಳನ್ನು ಗೆದ್ದುಕೊಂಡಂತಾಗಿದೆ.
