ಸೌತಾಂಪ್ಟನ್ ನಲ್ಲಿ ಆಂಗ್ಲರಿಗೆ ಆಘಾತ ನೀಡಿದ ಐರ್ಲೆಂಡ್
ಆಗಸ್ಟ್ 4ರಂದು ಇಂಗ್ಲೆಂಡ್ ಮತ್ತು ಐರ್ಲೆಂಡ್ ನಡುವಿನ ಮೂರನೇ ಏಕದಿನ ಪಂದ್ಯ ಸೌತಾಂಪ್ಟನ್ ನಲ್ಲಿ ನಡೆಯಿತ್ತು. ಈ ಪಂದ್ಯದ ಫಲಿತಾಂಶ ಮತ್ತು ಆಟ ವೈಖರಿ 18 ವರ್ಷಗಳ ಹಿಂದೆ ಲಾಡ್ರ್ಸ್ ನಲ್ಲಿ ನಡೆದಿದ್ದ ಇಂಗ್ಲೆಂಡ್ ಮತ್ತು ಭಾರತ ನಡುವಿನ ಪಂದ್ಯವನ್ನು ನೆನಪಿಸುವಂತಿತ್ತು. ಹೌದು, ಗಂಗೂಲಿ ಸಾರಥ್ಯದ ಟೀಮ್ ಇಂಡಿಯಾ ನ್ಯಾಟ್ ವೆಸ್ಟ್ ಸರಣಿಯಲ್ಲಿ ಇಂಗ್ಲೆಂಡ್ ಶಾಕ್ ನೀಡಿದ್ದ ಹಾಗೇ ಈ ಬಾರಿ ಐರ್ಲೆಂಡ್ ತಂಡ ಇಂಗ್ಲೆಂಡ್ ಮರೆಯಲು ಆಗದಂತಹ ಆಘಾತವನ್ನು ನೀಡಿದೆ.
ನ್ಯಾಟ್ ವೆಸ್ಟ್ ಸರಣಿಯಲ್ಲಿ ಮಹಮ್ಮದ್ ಕೈಫ್ ಮತ್ತು ಯುವರಾಜ್ ಸಿಂಗ್ ಇಂಗ್ಲೆಂಡ್ ಗೆಲುವಿಗೆ ಅಡ್ಡಿಯಾಗಿದ್ದರು. ಆದ್ರೆ ಈ ಪಂದ್ಯದಲ್ಲಿ ಇಂಗ್ಲೆಂಡ್ ಗೆಲುವಿನ ಕನಸನ್ನು ಭಗ್ನಗೊಳಿಸಿದ್ದು ಐರ್ಲೆಂಡ್ನ ಪೌಲ್ ಸ್ಟಿರ್ಲಿಂಗ್ ಮತ್ತು ಆಂಡಿ ಬಾಲ್ಬ್ರೀನ್. ಎರಡನೇ ವಿಕೆಟ್ಗೆ ಇವರಿಬ್ಬರು ದ್ವಿಶತಕದ (214) ಜೊತೆಯಾಟವನ್ನು ಆಡಿ ಐರ್ಲೆಂಡ್ ತಂಡದ ಐತಿಹಾಸಿಕ ಗೆಲುವಿನ ರೂವಾರಿಗಳಾದ್ರು. ಪೌಲ್ ಸ್ಟಿರ್ಲಿಂಗ್ 128 ಎಸೆತಗಳಲ್ಲಿ 142 ರನ್ ದಾಖಲಿಸಿದ್ರು. ಇದರಲ್ಲಿ 9 ಬೌಂಡರಿ ಮತ್ತು ಆರು ಸಿಕ್ಸರ್ಗಳಿದ್ದವು. ಹಾಗೇ ಆಂಡಿ ಬಾಲ್ಟ್ರೀನ್ 112 ಎಸೆತಗಳಲ್ಲಿ 12 ಬೌಂಡರಿಗಳ ನೆರವಿನಿಂದ 113 ರನ್ ಗಳಿಸಿದ್ರು. ಅಂತಿಮವಾಗಿ ಐರ್ಲೆಂಡ್ 49.5 ಓವರ್ಗಳಲ್ಲಿ ಮೂರು ವಿಕೆಟ್ ಕಳೆದುಕೊಂಡು ಗೆಲುವಿನ 
ನಗೆ ಬೀರಿತ್ತು. ಟೆಕ್ಟರ್ ಅಜೇಯ 29 ರನ್ ಮತ್ತು ಕೆಜೆ ಒಬ್ರಿಯಾನ್ ಅಜೇಯ 15 ರನ್ ಸಿಡಿಸಿದ್ರು.
ಇದಕ್ಕು ಮೊದಲು ಇಂಗ್ಲೆಂಡ್ ಐರ್ಲೆಂಡ್ ತಂಡಕ್ಕೆ ಗೆಲ್ಲಲು 328 ರನ್ ಗಳ ಸವಾಲನ್ನು ನೀಡಿತ್ತು. ಟಾಸ್ ಗೆದ್ದ ಐರ್ಲೆಂಡ್ ಮೊದಲು ಫೀಲ್ಡಿಂಗ್ ಮಾಡುವ ನಿರ್ಧಾರ ತೆಗೆದುಕೊಂಡಿತ್ತು. ಐರ್ಲೆಂಡ್ ಗೇಮ್ ಪ್ಲಾನ್ ನಂತೆ ಇಂಗ್ಲೆಂಡ್ ಅರಂಭದಲ್ಲೇ ಆಘಾತ ಅನುಭವಿಸಿತ್ತು. 44 ರನ್ ಗೆ ಮೂರು ವಿಕೆಟ್ ಕಳೆದುಕೊಂಡು ಸಂಕಷ್ಟಕ್ಕೆ ಸಿಲುಕಿದ್ದ ಇಂಗ್ಲೆಂಡ್ ತಂಡಕ್ಕೆ ಆಧಾರವಾಗಿದ್ದು ಇಯಾನ್ ಮೊರ್ಗಾನ್. ಐರ್ಲೆಂಡ್ ದಾಳಿಗೆ ದಿಟ್ಟ ಉತ್ತರ ನೀಡಿದ ಇಯಾನ್ ಮೊರ್ಗಾನ್ ಆಕರ್ಷಕ ಶತಕ ಸಿಡಿಸಿದ್ರು. ಮೋರ್ಗಾನ್ 84 ಎಸೆತಗಳಲ್ಲಿ 15 ಬೌಂಡರಿ ಮತ್ತು ನಾಲ್ಕು ಸಿಕ್ಸರ್ ಗಳನ್ನು ದಾಖಲಿಸಿದ್ದರು. ಇನ್ನೊಂದೆಡೆ ಬಂಟನ್ 51 ಎಸೆತಗಳಲ್ಲಿ 58 ರನ್ ಗಳಿಸಿದ್ರೆ, ಡೆವಿಡ್ ವಿಲ್ಲೆ 42 ಎಸೆತಗಳಲ್ಲಿ 51 ರನ್ ದಾಖಲಿಸಿದ್ರು. ಹಾಗೇ ಸ್ಯಾಮ್ ಕುರನ್ ಅಜೇಯ 38 ರನ್ ಸಿಡಿಸಿದ್ರು. ಅಂತಿಮವಾಗಿ ಇಂಗ್ಲೆಂಡ್ 49.5 ಓವರ್ ಗಳಲ್ಲಿ 328 ರನ್ ಗಳಿಗೆ ಆಲೌಟಾಯ್ತು.
ಯಾರು ಊಹಿಸದ ರೀತಿಯಲ್ಲಿ ಬ್ಯಾಟಿಂಗ್ ಮಾಡಿದ್ದ ಐರ್ಲೆಂಡ್ ಇಂಗ್ಲೆಂಡ್ ಗೆ ಮತ್ತೊಮ್ಮೆ ಆಘಾತ ನೀಡಿತ್ತು. ಸುಲಭ ಗೆಲುವು ಎಂದು ಭಾವಿಸಿದ್ದ ಇಂಗ್ಲೆಂಡ್ ಏಳು ವಿಕೆಟ್ ಗಳಿಂದ ಪರಾಭವಗೊಂಡಿತ್ತು .ಪೌಲ್ ಸ್ಟಿರ್ಲಿಂಗ್ ಅವರು ಪಂದ್ಯ ಶ್ರೇಷ್ಠ ಪ್ರಶಸ್ತಿಗೆ ಭಾಜನರಾದ್ರು. ಮೂರು ಏಕದಿನ ಪಂದ್ಯಗಳ ಸರಣಿಯನ್ನು ಇಂಗ್ಲೆಂಡ್ 2-1ರಿಂದ ಗೆದ್ದುಕೊಂಡಿತ್ತು. ಕೊನೆಯ ಪಂದ್ಯವನ್ನು ಗೆಲ್ಲುವ ಮೂಲಕ ಐರ್ಲೆಂಡ್ ವೈಟ್ ವಾಶ್ ಮುಖಭಂಗದಿಂದ ತಪ್ಪಿಸಿಕೊಂಡಿತ್ತು.
