ಈ ಘಟನೆ ಸಂಭವಿಸಿದ್ದು ಅಮೇರಿಕಾ ಸಂಸ್ಥಾನದ ಕೆಂಟುಕಿ ಪ್ರಾಂತ್ಯದ ಕೆಲ್ಲಿ ಅಥವಾ ಹಾಪ್ಕಿನ್ ವಿಲ್ಲಾದ ಒಂದು ಮನೆಯಲ್ಲಿ. ಅದು 1955 ನೇ ಇಸವಿಯ ಮಧ್ಯ ಬೇಸಗೆಯ ಒಂದು ದಿನ. ಆ ದಿನದ ಬೆಳಗಿನ ಜಾವದ ಐದಾರು ಗಂಟೆಯ ಸಮಯವಿರಬೇಕು. ಹತ್ತಿರದ ಷೆರೀಫ್ ಅಥವಾ ಪೋಲಿಸ್ ಕೇಂದ್ರಕ್ಕೆ ಒಂದೇ ಕುಟುಂಬದ ಏಳೆಂಟು ಜನ ಒಂದು ಕಾರಿನಲ್ಲಿ ಬಂದಿಳಿದರು. ಕೆಳಗಿಳಿದು ದೂರು ಕೊಡಲು ಓಡೋಡಿ ಬಂದ ಅವರ ಮುಖ ಬೆವರಿನಿಂದ ತೋಯ್ದಿದ್ದು ಅವರೆಲ್ಲರೂ ಏನೋ ಭಯಂಕರವಾದುದನ್ನ ಕಂಡು ಭಯದಿಂದ ಕಂಪಿಸುತ್ತಿದ್ದರು.
ಅವರನ್ನ ಕೂರಿಸಿ ಕುಡಿಯಲು ನೀರು ಕೊಟ್ಟು ಸಮಾಧಾನ ಮಾಡಿ ನಡೆದದ್ದೇನೆಂದು ವಿವರಿಸಲು ಕೇಳಿಕೊಳ್ಳಲಾಯ್ತು. ಅದೇ ದಿನದ ರಾತ್ರಿ ಊಟದ ಬಳಿಕ ನಡೆದ ಆ ಬಹು ವಿಚಿತ್ರ ಹಾಗೂ ನಂಬಲಸಾಧ್ಯವಾದ ತಮ್ಮ ಆ ಅನುಭವವನ್ನ ಅವರು ಈ ಮುಂದಿನಂತೆ ಹಂಚಿಕೊಂಡರು. 
ಆವತ್ತು ಬಿಲ್ ಟೇಲರ್ ಎಂಬ ಇನ್ನೊಬ್ಬ ಈ ಕುಟುಂಬದ ಸ್ನೇಹಿತ ಅಲ್ಲಿ ನೀರು ತುಂಬಿಸಿಕೊಳ್ಳಲು ಬಂದಾಗ ಸಟನ್ಸ್ ಮನೆಯವರ ಮನೆಯ ಪಕ್ಕದಲ್ಲೇ ಒಂದು ವಿಚಿತ್ರ ಆಕಾಶಯಂತ್ರವೊಂದು ನಿಧಾನವಾಗಿ ಪ್ರಭೆ ಸೂಸುತ್ತಾ ಕೆಳಗಿಳಿಯುತ್ತಿರುವುದನ್ನ ಗಮನಿಸ್ತಾನೆ. ಅದನ್ನ ಹೇಳಲು ಮನೆಯವರ ಬಳಿ ಸಾರುತ್ತಿದ್ದಂತೆ, ಆ ಆಕಾಶಯಂತ್ರದಿಂದ ಇಳಿದ ಕೆಲ ವಿಚಿತ್ರ ದಿರಿಸಿನ ಚಿಕ್ಕ ಸೈಜಿನ ಕುಬ್ಜ ಅಪರಿಚಿತ ಜೀವಿಗಳು ಸಟನ್ ಮನೆಯ ಬಳಿಗೇ ನಡೆದು ಬರುತ್ತಿದ್ದುದನ್ನ ಕಂಡು ಮನೆಯವರೆಲ್ಲ ಕಂಗಾಲಾದರು.
ಒಳ ಬಂದ ಅವುಗಳು ಅನಾಮತ್ತು ಮನೆಯ ಒಳಗೆಲ್ಲಾ ಇಷ್ಟ ಬಂದಂತೆ ಓಡಾಡುತ್ತಾ ಕೈಗೆ ಸಿಕ್ಕ ವಸ್ತು ಮುಂತಾದವುಗಳನ್ನ ಮುಟ್ಟುತ್ತಾ ಓಡಾಡಲಾರಂಭಿಸಿದವು. ಆ ವಿಚಿತ್ರ ಜೀವಿಗಳ ಭಯಾನಕ ರೂಪ ಹಾಗೂ ಆಕಾರಕ್ಕೆ ಹೆದರಿದ ಮನೆಯವರು ಮನೆಯಲ್ಲಿದ್ದ ತೋಟಾದ ಕೋವಿಗಳನ್ನ ಹಿಡಿದು ಅವುಗಳತ್ತ ಗುಂಡು ಹಾರಿಸಿ ನಿಯಂತ್ರಿಸಲು ಯತ್ನಿಸಿದರು.
ಗುಂಡೇಟು ಬಿದ್ದರೂ ಸಹ ಅದು ಈ ಜೀವಿಗಳಿಗೆ ಯಾವ ಹಾನಿಯನ್ನೂ ಮಾಡಲಿಲ್ಲ. ಪ್ರತಿ ಬಾರಿ ಗುಂಡೇಟು ಬಿದ್ದಾಗಲೂ ಸಹ ನೀರು ತುಂಬಿದ ಡ್ರಮ್ ಗೊ ಅಥವಾ ನೀರಿನ ಬಲೂನ್ ಗೊ ಏಟು ತಾಗಿದಂತೆ ಸದ್ದು ಹೊರಡುತ್ತಿತ್ತು. ಮನೆಯವರು ಎಷ್ಟೇ ಪ್ರತಿಭಟಿಸಿದರೂ ಆ ಜೀವಿಗಳ ಉಪಟಳ ನಿಲ್ಲಲಿಲ್ಲ. ಆದರೆ ಅವು ಮನೆಯವರ ವರ್ತನೆಗೆ ಯಾವ ಕೋಪವನ್ನಾಗಲೀ, ದಾಳಿಯನ್ನಾಗಲೀ ಮಾಡಲಿಲ್ಲ.
ಮನಸು ಮಾಡಿದ್ದರೆ ಹುಲಿಯುಗಿರಿನಂಥ ನಖಗಳಲ್ಲಿ ಮನೆಯವರ ದೇಹವನ್ನ ಛಿದ್ರ ಛಿದ್ರ ಮಾಡಬಹುದಿತ್ತು. ಆದರೆ ಆ ಜೀವಿಗಳು ಈ ಹೊಸ ದೃಶ್ಯಾವಳಿಗಳನ್ನ ನೋಡಿ ಎಕ್ಸೈಟ್ ಆದಂತೆ ಕಂಡವು ಹಾಗೂ ಕುತೂಹಲಗೊಂಡಂತಿದ್ದವು. ಅವುಗಳು ಹೆಚ್ಚೇನೂ ಭಾರವಿದ್ದಂತೆ ತೋರಲಿಲ್ಲ. ನಡೆಯುವಾಗ ದ್ವಿಪಾದಿಗಳಂತೆ ನಡೆದರೂ. ಆಗೀಗ ಉದ್ದನೆಯ ಕೈಗಳನ್ನೂ ಸಹ ಬಳಸುತ್ತಿದ್ದವು. ಓಡಾಡುವಾಗ ಅಂತರಿಕ್ಷಯಾನಿಗಳ ಹಾಗೆ ತೇಲಿ ತೇಲಿ ಕೆಳಗಿಳಿಯುತ್ತಿದ್ದವು.
ಈ ಜೀವಿಗಳು ಮನೆಯವರ ಭ್ರಮೆ ಮಾತ್ರವಾಗಿರಲಿಲ್ಲ ಎಂಬುದಕ್ಕೆ ಒಮ್ಮೆ ಮನೆಯ ಒಬ್ಬ ಸದಸ್ಯನನ್ನು ಸ್ಪರ್ಶಿಸಿ ಆತನ ತಲೆಯನ್ನ ನೇವರಿಸಿದವು. ಆ ಸ್ಪರ್ಶಜ್ಞಾನದ ಭೌತಿಕ ಅನುಭವಕ್ಕೊಳಗಾದ ಆತ ಆ ಜೀವಿಯೆಡೆಗು ಗುಂಡು ಹಾರಿಸಿದ. ಆಗ ಅದು ಕೆಳಗೆ ಬಿದ್ದು ಉರುಳುರುಳಿ ಕಣ್ಮರೆಯಾಯ್ತು. ಅಂತೂ ಕೆಲವಾರು ಗಂಟೆಗಳ ಈ ಘರ್ಣೆಯ ಬಳಿಕ ಜೀವಿಗಳಿಂದ ಪಾರಾಗಿ ಕಾರ್ ತೆಗೆದು ಸ್ಟೇಷನ್ನಿನತ್ತ ಧಾವಿಸಿ ಬಂದರು.
ಅವರ ಕತೆ ಕೇಳಿ ಅವಾಕ್ಕಾದ ಪೋಲಿಸರು ಘಟನೆಯ ಸ್ಥಳಕ್ಕೆ ಬಂದು ನೋಡಿದಾಗ ಅಲ್ಲಿ ಯಾರೂ ಇರಲಿಲ್ಲ. ಆದರೂ ಮನೆಯೆಲ್ಲ ಚೆಲ್ಲಾಪಿಲ್ಲಿಯಾಗಿತ್ತು. ಆಗ ಮನೆಯವರು ಎಲ್ಲೆಲ್ಲಿ ಏನೇನು ಗಲಭೆ ನಡೆಯಿತು ಎಂಬುದನ್ನ ತೋರಿಸುತ್ತಾ ಪೋಲಿಸರಿಗೆ ಸವಿಸ್ತಾರವಾಗಿ ವಿಶ್ಲೇಷಿಸಿದರು. ಗಲಭೆ ನಡೆದ ಕುರುಹುಗಳು ಸ್ಪಷ್ಟವಾಗಿದ್ದರೂ ಸಹ ಅದಕ್ಕೆ ಕಾರಣೀಭೂತವಾದ ಆ ನಿಗೂಢ ಜೀವಿಗಳು ಎಲ್ಲಿಯೂ ಕಾಣಲಿಲ್ಲ. ಆ ಯಂತ್ರವೂ ಸಹ ಕಣ್ಮರೆಯಾಗಿತ್ತು.
ಸುತ್ತೆಲ್ಲಾದರೂ ಸರ್ಕಸ್ ನಡೆಯಿತೇ ಎಂದು ಕೆದಕಿದಾಗಲೂ ಸಹ ಯಾವ ಸರ್ಕಸ್ ಹತ್ತಿರದಲ್ಲಿ ನಡೆದಿರಲಿಲ್ಲ. ಈ ಘಟನೆಯನ್ನ ಯುಫಾಲಿಜಿ ಕೇಂದ್ರಕ್ಕೆ ಕೊಟ್ಟು ಮಬೆಯವರೆಲ್ಲರನ್ನೂ ಸಹ ಸಂದರ್ಶಿಸಿ ದಾಖಲಿಸಲಾಗಿದೆ. ಇದು ಐದನೇ ದರ್ಜೆಯ ಮುಖಾಮುಖಿಗೊಂದು (Close encounters of the Fifth kind) ಸ್ಪಷ್ಟ ಹಾಗೂ ಪ್ರಮುಖ ಸಾಕ್ಷಿ ಎಂದು ಪ್ರಾಜೆಕ್ಟ್ ಬ್ಲೂ ಬುಕ್ ಹಾಗೂ ಅಮೇರಿಕದ ಏಲಿಯನ್ ರಿವ್ಯೂನಲ್ಲಿ ಈ ಕೇಸನ್ನ ದಾಖಲಿಸಲಾಗಿದೆ.
ಸಂಗ್ರಹ ಲೇಖನ:-
-ಇಂದೂದರ್ ಒಡೆಯರ್ ಚಿತ್ರದುರ್ಗ
(ಡುಗ್ಗು)
