ಕೋವಿಡ್ -19 ಸಾಂಕ್ರಾಮಿಕ ವಿರುದ್ಧ ಹೋರಾಡಲು ಭಾರತಕ್ಕೆ ಜಪಾನ್ ನಿಂದ ಸಾಲದ ನೆರವು
ಹೊಸದಿಲ್ಲಿ, ಸೆಪ್ಟೆಂಬರ್02: ಕೋವಿಡ್ -19 ಸಾಂಕ್ರಾಮಿಕ ರೋಗದ ವಿರುದ್ಧ ಹೋರಾಡಲು ಜಪಾನ್ ಭಾರತಕ್ಕೆ ತುರ್ತು ಸಾಲವನ್ನು ವಿಸ್ತರಿಸಲಿದೆ. ಆರೋಗ್ಯ ಮತ್ತು ವೈದ್ಯಕೀಯ ನೀತಿಯ ಅನುಷ್ಠಾನವನ್ನು ಒಳಗೊಂಡಿರುವ ಕೋವಿಡ್ -19 ಸಾಂಕ್ರಾಮಿಕದ ಹಿನ್ನೆಲೆಯಲ್ಲಿ ಭಾರತಕ್ಕೆ 50 ಬಿಲಿಯನ್ ಯೆನ್ಗಳ ತುರ್ತು ಸಾಲದ ಬೆಂಬಲವನ್ನು ನೀಡುವುದಾಗಿ ಜಪಾನ್ ಸೋಮವಾರ ತಿಳಿಸಿದೆ. ಕೋವಿಡ್-19 ಸಾಂಕ್ರಾಮಿಕ ಎದುರಿಸಲು ಭಾರತಕ್ಕೆ ಯೆನ್ ಸಾಲವನ್ನು ಒದಗಿಸುವ ಬಗ್ಗೆ ಹಣಕಾಸು ಸಚಿವಾಲಯದ ಆರ್ಥಿಕ ವ್ಯವಹಾರಗಳ ಹೆಚ್ಚುವರಿ ಕಾರ್ಯದರ್ಶಿ ಸಿ.ಎಸ್.ಮೊಹಾಪಾತ್ರ ಮತ್ತು ಜಪಾನಿನ ರಾಯಭಾರಿ ಸುಜುಕಿ ಸಟೋಶಿ ಸೋಮವಾರ ಟಿಪ್ಪಣಿಗಳನ್ನು ವಿನಿಮಯ ಮಾಡಿಕೊಂಡರು.
ಜಪಾನಿನ ರಾಯಭಾರ ಕಚೇರಿಯ ಅಧಿಕೃತ ಬಿಡುಗಡೆಯ ಪ್ರಕಾರ, ಕೊರೋನವೈರಸ್ ವಿರುದ್ಧದ ಭಾರತದ ಹೋರಾಟಕ್ಕೆ ಅಗತ್ಯವಾದ ಹಣವನ್ನು ಒದಗಿಸುತ್ತದೆ. ಈ ಹಣಕಾಸಿನ ನೆರವು ಭಾರತ ಸರ್ಕಾರಕ್ಕೆ ಆರೋಗ್ಯ ಮತ್ತು ವೈದ್ಯಕೀಯ ನೀತಿಯ ಅನುಷ್ಠಾನಕ್ಕೆ ಸಹಾಯ ಮಾಡುತ್ತದೆ. ಅಷ್ಟೇ ಅಲ್ಲ ಐಸಿಯುಗಳು, ಸೋಂಕು ತಡೆಗಟ್ಟುವಿಕೆ ಮತ್ತು ನಿರ್ವಹಣಾ ಸೌಲಭ್ಯಗಳನ್ನು ಹೊಂದಿರುವ ಆಸ್ಪತ್ರೆಗಳ ಅಭಿವೃದ್ಧಿಗೆ ಕಾರಣವಾಗುತ್ತದೆ.
ಈ ಕ್ರಮಗಳು ದೇಶದಲ್ಲಿ ಸೋಂಕಿನ ಹರಡುವಿಕೆಯನ್ನು ನಿಯಂತ್ರಿಸುವುದರ ಜೊತೆಗೆ ದೇಶದ ಆರ್ಥಿಕತೆಯ ಚೇತರಿಕೆ ಮತ್ತು ಸ್ಥಿರತೆಗೆ ಸಹಕಾರಿಯಾಗುತ್ತವೆ, ಜೊತೆಗೆ ಸುಸ್ಥಿರ ಅಭಿವೃದ್ಧಿಗೆ ಸಹಕಾರಿಯಾಗುತ್ತವೆ ಎಂದು ನಿರೀಕ್ಷಿಸಲಾಗಿದೆ.
ಸಾಲವು ನಾಲ್ಕು ವರ್ಷಗಳ ಗ್ರೇಸ್ ಅವಧಿ ಸೇರಿದಂತೆ 15 ವರ್ಷಗಳ ವಿಮೋಚನೆ ಅವಧಿಯೊಂದಿಗೆ ವಾರ್ಷಿಕ 0.01 ಶೇಕಡಾ ಬಡ್ಡಿದರವನ್ನು ಹೊಂದಿರುತ್ತದೆ.
ಇದಲ್ಲದೆ, ಜಪಾನ್ನ ಅಧಿಕೃತ ಅಭಿವೃದ್ಧಿ ನೆರವು (ಒಡಿಎ) ಯೋಜನೆಯ ಮೂಲಕ ಆರ್ಥಿಕ ಮತ್ತು ಸಾಮಾಜಿಕ ಅಭಿವೃದ್ಧಿ ಕಾರ್ಯಕ್ರಮದ ಮೂಲಕ ಉಭಯ ದೇಶಗಳು ಭಾರತಕ್ಕೆ 1 ಬಿಲಿಯನ್ ಯೆನ್ ಮೌಲ್ಯದ ಅನುದಾನದ ಬಗ್ಗೆ ಟಿಪ್ಪಣಿಗಳನ್ನು ವಿನಿಮಯ ಮಾಡಿಕೊಂಡವು.
ಈ ಅನುದಾನದ ನೆರವು ಭಾರತದಲ್ಲಿ ಕೋವಿಡ್-19 ಸೇರಿದಂತೆ ಸಾಂಕ್ರಾಮಿಕ ರೋಗಗಳ ವಿರುದ್ಧದ ಹೋರಾಟವನ್ನು ಬಲಪಡಿಸಲು ಕಾರಣವಾಗುತ್ತದೆ ಹಾಗೂ ಜಪಾನ್ ಮತ್ತು ಭಾರತದ ನಡುವಿನ ಸಹಕಾರವನ್ನು ಇನ್ನಷ್ಟು ಬಲಪಡಿಸುವ ನಿಟ್ಟಿನಲ್ಲಿ ಕೊಡುಗೆ ನೀಡುತ್ತದೆ ಎಂದು ನಿರೀಕ್ಷಿಸಲಾಗಿದೆ.
