ಸೀರೆ.. ಆಭರಣ ಮತ್ತು ಕ್ರಿಕೆಟ್ ಬ್ಯಾಟ್.. ಬಾಂಗ್ಲಾದೇಶದ ಕ್ರಿಕೆಟ್ ರಾಣಿಯ ಮದುವೆ ಕಥೆ..!
ಸಂಜಿದಾ ಇಸ್ಲಾಂ.. ಮಹಿಳಾ ಕ್ರಿಕೆಟ್ ನಲ್ಲಿ ಈ ಹೆಸರು ಚಿರಪರಿಚಿತ.
ಹೌದು, ಸಂಜಿದಾ ಇಸ್ಲಾಂ.. ಬಾಂಗ್ಲಾ ದೇಶದ ಕ್ರಿಕೆಟ್ ಆಟಗಾರ್ತಿ.
ಕಳೆದ ಎಂಟು ವರ್ಷಗಳಿಂದ ಅಂತಾರಾಷ್ಟ್ರೀಯ ಕ್ರಿಕೆಟ್ ನಲ್ಲಿ ಬಾಂಗ್ಲಾ ದೇಶ ತಂಡವನ್ನು ಪ್ರತಿನಿಧಿಸುತ್ತಿದ್ದಾರೆ.
ತನ್ನ ಇಲ್ಲಿಯವರೆಗಿನ ಕ್ರಿಕೆಟ್ ಬದುಕಿನಲ್ಲಿ ಹೆಚ್ಚು ಪಂದ್ಯಗಳನ್ನು ಆಡಿಲ್ಲ. 16 ಏಕದಿನ ಮತ್ತು 54 ಟಿ-ಟ್ವೆಂಟಿ ಪಂದ್ಯಗಳನ್ನು ಆಡಿದ್ದಾರೆ.
ಕ್ರಿಕೆಟ್ ಆಟದಲ್ಲಿ ಸಂಜಿದಾ ಅವರು ಅಷ್ಟೇನೂ ಸುದ್ದಿಯಾಗಿರಲಿಲ್ಲ. ಏಕದಿನ ಕ್ರಿಕೆಟ್ ನಲ್ಲಿ 174 ರನ್ ಮತ್ತು ಟಿ-ಟ್ವೆಂಟಿಯಲ್ಲಿ 520 ರನ್ ಗಳಿಸಿದ್ದಾರೆ.
ಇದೀಗ ಸಂಜಿದಾ ಅವರು ಸುದ್ದಿಯಾಗಿದ್ದಾರೆ. ಸಾಮಾಜಿಕ ಜಾಲ ತಾಣದಲ್ಲೂ ಫೇಮಸ್ ಆಗಿಬಿಟ್ಟಿದ್ದಾರೆ.
ಅಂದ ಹಾಗೇ ಸಂಜಿದಾ ಇಸ್ಲಾಂ ಅವರು ಈ ಮಟ್ಟಿಗೆ ಫೇಮಸ್ ಆಗಲು ಕಾರಣ ಅವರ ಮದುವೆ ಫೋಟೋ ಶೂಟ್.
ಸಂಜಿದಾ ಇಸ್ಲಾಂ ಅವರು ಬಾಂಗ್ಲಾ ದೇಶದ ಪ್ರಥಮ ದರ್ಜೆ ಕ್ರಿಕೆಟಿಗ ಮಿಮ್ ಮೊಸಾದ್ದೀಕ್ ಅವರನ್ನು ಮದುವೆಯಾಗಿದ್ದಾರೆ.
24ರ ಹರೆಯದ ಸಂಜಿದಾ ಅವರು ತನ್ನ ಮದುವೆ ಫೋಟೋ ಶೂಟ್ ನಲ್ಲಿ ಸಾಂಪ್ರದಾಯಿಕ ಸೀರೆ ಮತ್ತು ಆಭರಣಗಳನ್ನು ಧರಿಸಿಕೊಂಡಿದ್ದರು.
ಹಾಗಂತ ಇದ್ರಲ್ಲಿ ಅಚ್ಚರಿ ಪಡುವಂತಹುದ್ದು ಏನು ಇಲ್ಲ. ಇದು ಎಲ್ಲರಿಗೂ ಗೊತ್ತಿರುವ ವಿಚಾರವೇ.
ಆದ್ರೆ ಸೀರೆ ಮತ್ತು ಮೈತುಂಬಾ ಆಭರಣ ಧರಿಸಿರುವ ಸಂಜಿದಾ ಅವರು ಕ್ರಿಕೆಟ್ ಬ್ಯಾಟ್ ಹಿಡಿದು ಫೋಟೋ ಶೂಟ್ ಮಾಡಿಕೊಂಡಿದ್ದಾರೆ.
ಈ ಫೋಟೋಗಳನ್ನು ಸಂಜಿದಾ ಅವರು ಸಾಮಾಜಿಕ ಜಾಲ ತಾಣದಲ್ಲಿ ಹಂಚಿಕೊಂಡಿದ್ದಾರೆ.
ಈ ಫೋಟೋಗಳನ್ನು ಅಂತಾರಾಷ್ಟ್ರೀಯ ಕ್ರಿಕೆಟ್ ಸಮಿತಿಯೂ ಶೇರ್ ಮಾಡಿಕೊಂಡು ಸಂಜಿದಾ ಮತ್ತು ಮಿಮ್ ಮೊಸಾದ್ದೀಕ್ ಅವರಿಗೆ ಶುಭ ಹಾರೈಸಿದೆ.
ಒಟ್ಟಿನಲ್ಲಿ ಮದುವೆ ಫೋಟೋ ಶೂಟ್ ನಲ್ಲಿ ತೆಗೆದ ಫೋಟೋಗಳು ಸಂಜಿದಾ ಅವರನ್ನು ಕ್ರಿಕೆಟ್ ಆಟಗಾರ್ತಿಗಿಂತ ಹೆಚ್ಚು ಜನಪ್ರಿಯತೆಯನ್ನು ಗಳಿಸುವಂತೆ ಮಾಡಿವೆ.
