“ಐಪಿಎಲ್ ಹಣದಿಂದ ತಂದೆಗೆ ಚಿಕಿತ್ಸೆ” ಕೊಡಿಸುತ್ತಿರುವ ಸಕಾರಿಯಾ
ಗಾಂಧಿನಗರ : ಇಂಡಿಯನ್ ಪ್ರಿಮಿಯರ್ ಲೀಗ್ ಈಗ ಕೇವಲ ಒಂದು ಕ್ರಿಕೆಟ್ ಟೂರ್ನಿಯಾಗಿ ಉಳಿದಿಲ್ಲ. ಅದೆಷ್ಟೋ ಮಂದಿಯ ಜೀವನದಲ್ಲಿ ಹೊಸ ಆಸೆ, ಭರವಸೆಯನ್ನ ತುಂಬಿದೆ. ಈ ಐಪಿಎಲ್ ನಿಂದ ಸಾಕಷ್ಟು ಯುವಪ್ರತಿಭೆಗಳು ಬೆಳಕಿಗೆ ಬಂದಿವೆ. ಐಪಿಎಲ್ ಸಾಕಷ್ಟು ಬಡ ಯುವ ಕ್ರಿಕೆಟಿಗರ ಜೀವನ ಬದಲಿಸಿದೆ. ಇದರಿಂದ ಬಂದ ಹಣದಿಂದ ಸಾಕಷ್ಟು ಮಂದಿಯ ಜೀವನ ಸುಧಾರಿಸಿದೆ.
ಇದೀಗ ರಾಜಸ್ಥಾನ್ ರಾಯಲ್ಸ್ ತಂಡದ ಯುವ ವೇಗಿ ಚೇತನ್ ಸಕಾರಿಯಾ ಕೂಡ ಐಪಿಎಲ್ ನಿಂದ ಬಂದ ಹಣದಿಂದ ತಂದೆಗೆ ಕೋವಿಡ್ ಚಿಕಿತ್ಸೆ ಕೊಡಿಸುತ್ತಿದ್ದಾರೆ. 23 ವರ್ಷ ವಯಸ್ಸಿನ ಎಡಗೈ ವೇಗಿ ಚೇತನ್ ಸಕಾರಿಯಾ ಅವರನ್ನು 1.2 ಕೋಟಿ ರೂಪಾಯಿ ನೀಡಿ ರಾಜಸ್ಥಾನ ತಂಡ ಐಪಿಎಲ್ ನಲ್ಲಿ ಖರೀದಿ ಮಾಡಿತ್ತು. ಅದರಂತೆ 14ನೇ ಆವೃತ್ತಿಯ ಐಪಿಎಲ್ ನ ಕೆಲಪಂದ್ಯಗಳಲ್ಲಿ ರಾಜಸ್ಥಾನ ತಂಡದ ಪರ ಸಕಾರಿಯಾ ಕಾಣಿಸಿಕೊಂಡಿದ್ದರು.
ಅಂದಹಾಗೆ ಸಕಾರಿಯಾ ಸೌರಷ್ಟ್ರ ತಂಡದ ಪರ ಆಡುತ್ತಿದ್ದ ಪ್ರತಿಭೆ. ಸಾಕಷ್ಟು ಅಡೆತಡೆಗಳ ಮಧ್ಯೆ ಕ್ರಿಕೆಟ್ ಮೈಗೂಡಿಸಿಕೊಂಡಿದ್ದ ಸಕಾರಿಯಾ ಐಪಿಎಲ್ ಗೂ ಕೆಲದಿನಗಳ ಹಿಂದೆ ತನ್ನ ಸಹೋದರನನ್ನ ಕಳೆದುಕೊಂಡಿದ್ದ. ಇದರ ನೋವಿನಲ್ಲೇ ಐಪಿಎಲ್ ಆಡದ ಸಕಾರಿಯಾ ಸಿಕ್ಕಿದ ಅವಕಾಶಗಳಲ್ಲಿ ಗಮನಾರ್ಹ ಪ್ರದರ್ಶನ ನೀಡಿದ್ದರು..
ಆದ್ರೆ ಐಪಿಎಲ್ ಅರ್ಧದಲ್ಲಿ ಸ್ಥಗಿತ ಕಾರಣ ಮನೆಗೆ ಹಿಂದಿರುಗುತ್ತಿದ್ದಂತೆ ತಂದೆಗೆ ಕೊರೊನಾ ಸೋಂಕು ಕಾಣಿಸಿಕೊಂಡಿದೆ. ಈ ಸಂದರ್ಭ ತನಗೆ ಐಪಿಎಲ್ ನಲ್ಲಿ ರಾಜಸ್ಥಾನ ತಂಡ ನೀಡಿದ ಹಣದಿಂದಾಗಿ ಇದೀಗ ಗುಜರಾತ್ ನ ಖಾಸಗಿ ಆಸ್ಪತ್ರೆಯೊಂದರಲ್ಲಿ ಸಕಾರಿಯಾ ತನ್ನ ತಂದೆಗೆ ಚಿಕಿತ್ಸೆ ಕೊಡಿಸುತ್ತಿದ್ದಾರೆ.
ಈಕುರಿತು ಸ್ಥಳೀಯ ಸುದ್ದಿ ಮಾಧ್ಯಮದೊಂದಿಗೆ ಮಾತನಾಡಿರುವ ಸಕಾರಿಯಾ, ನಾನು ತುಂಬಾ ಅದೃಷ್ಟಶಾಲಿ, ಯಾಕೆಂದರೆ ಐಪಿಎಲ್ ನಲ್ಲಿ ಆಡಿದ್ದಕ್ಕಾಗಿ ರಾಜಸ್ಥಾನ ಫ್ರಾಂಚೈಸಿ ನನಗೆ ಹಣ ಕೊಟ್ಟಿದೆ. ಅ ಹಣವನ್ನು ಇದೀಗ ನಾನು ನನ್ನ ಕುಟುಂಬದ ಕಷ್ಟ ಕಾಲದ ನೆರವಿಗಾಗಿ ಬಳಸುತ್ತಿದ್ದೇನೆ ಎಂದಿದ್ದಾರೆ.
ಮುಂದುವರೆದು ನಮ್ಮದು ಬಡ ಕುಟುಂಬ. ನನ್ನ ಅಮ್ಮನಿಗೆ ಕೋಟಿಗೆ ಎಷ್ಟು ಸೊನ್ನೆ ಎಂಬುದೆ ಗೊತ್ತಿಲ್ಲ, ಆದರೆ ಇದೀಗ ನಾನು ಕೋಟಿ ರೂಪಾಯಿ ಸಂಪಾದನೆ ಮಾಡಿದ್ದೇನೆ. ಇದೆಲ್ಲ ಸಿಕ್ಕಿದ್ದು ಐಪಿಎಲ್ ನಿಂದಾಗಿ ಎಂದು ಹೇಳಿಕೊಂಡಿದ್ದಾರೆ.
