ಯೂರೋ ಕಪ್ – ಫ್ರಾನ್ಸ್, ಕ್ರೊವೇಶಿಯಾಗೆ ಆಘಾತ, ಕ್ವಾರ್ಟರ್ ಫೈನಲ್ ಪ್ರವೇಶಿಸಿದ ಸ್ಪೇನ್, ಸ್ವೀಜರ್ ಲೆಂಡ್
2021ರ ಯೂರೋ ಕಪ್ ಫುಟ್ ಬಾಲ್ ಟೂರ್ನಿಯಲ್ಲಿ ವಿಶ್ವ ಚಾಂಪಿಯನ್ ಫಿಫಾ ವಿಶ್ವ ಚಾಂಪಿಯನ್ ಫ್ರಾನ್ಸ್ ತಂಡ ಆಘಾತ ಅನುಭವಿಸಿದೆ.
ಪ್ರೀ ಕ್ವಾರ್ಟರ್ ಫೈನಲ್ ಪಂದ್ಯದಲ್ಲಿ ಫ್ರಾನ್ಸ್ ತಂಡ ಪೆನಾಲ್ಟಿ ಶೂಟ್ ಔಟ್ ನಲ್ಲಿ 4-5ರಿಂದ ಸ್ವೀಜರ್ ಲೆಂಡ್ ತಂಡದ ವಿರುದ್ಧ ಸೋಲು ಅನುಭವಿಸಿದೆ.
ರೋಚಕವಾಗಿ ಸಾಗಿದ ಪಂದ್ಯದಲ್ಲಿ ನಿಗದಿತ 90 ನಿಮಿಷಗಳ ಅಟದಲ್ಲಿ 3-3ರಿಂದ ಸಮಬಲದ ಹೋರಾಟವನ್ನು ಪ್ರದರ್ಶಿಸಿದ್ದವು.
ಫ್ರಾನ್ಸ್ ತಂಡದ ಪರ ಕರೀಮ್ ಬೆಂಝೆಮಾ ಅವರು 57 ಮತ್ತು 59ನೇ ನಿಮಿಷದಲ್ಲಿ ಗೋಲು ದಾಖಲಿಸಿದ್ರು. ಪೌಲ್ ಪೋಗ್ಬಾ ಅವರು 75ನೇ ನಿಮಿಷದಲ್ಲಿ ಗೋಲು ಬಾರಿಸಿದ್ರು.
ಇನ್ನು ಸ್ವೀಜರ್ ಲೆಂಡ್ ತಂಡದ ಪರ ಹ್ಯಾರಿಸ್ ಸೆಫೆರೋವಿಕ್ 15 ಮತ್ತು 81ನೇ ನಿಮಿಷದಲ್ಲಿ ಗೋಲು ದಾಖಲಿಸಿದ್ರು. ಹಾಗೇ 90ನೇ ನಿಮಿಷದಲ್ಲಿ ಸ್ವೀಜರ್ ಲೆಂಡ್ ತಂಡದ ಮರಿಯೋ ಗಾವ್ರೊನೊವಿಕ್ ಅವರು ಗೋಲು ದಾಖಲಿಸುವ ಮೂಲಕ ಅಂತರವನ್ನು 3-3ರಿಂದ ಸಮಗೊಳಿಸಿದ್ರು.
ಬಳಿಕ ಹೆಚ್ಚುವರಿ ಅವಧಿಯ ಆಟದಲ್ಲೂ ಉಭಯ ತಂಡಗಳು ಗೋಲು ದಾಖಲಿಸಲಿಲ್ಲ. ಅಂತಿಮವಾಗಿ ಪೆನಾಲ್ಟಿ ಶೂಟ್ ಔಟ್ ನಲ್ಲಿ ಸ್ವೀಜರ್ ಲೆಂಡ್ ತಂಡ ಗೆಲುವಿನ ನಗೆ ಬೀರಲು ಯಶಸ್ವಿಯಾಯ್ತು. ಸ್ವೀಜರ್ ಲೆಂಡ್ ನ ಗೋಲು ಕೀಪರ್ ಯಾನ್ ಸೊಮೆರ್ ಅವರು ಫ್ರಾನ್ಸ್ ನ ಸ್ಟ್ರೈಕರ್ ಕೈಲಾನ್ ಎಮ್ಬಾಪೆ ಅವರ ಶೂಟೌಟ್ ಕಿಕ್ ಅನ್ನು ತಡೆಯುವ ಮೂಲಕ ಸ್ವೀಜರ್ ಲೆಂಡ್ ಗೆ ರೋಚಕ ಗೆಲುವನ್ನು ತಂದುಕೊಟ್ಟರು.
ಇನ್ನೊಂದು ಪ್ರೀ ಕ್ವಾರ್ಟರ್ ಫೈನಲ್ ನಲ್ಲಿ ಸ್ಟೇನ್ ತಂಡ 5-3 ಗೋಲುಗಳಿಂದ ಕ್ರೊವೇಶಿಯಾ ತಂಡವನ್ನು ಪರಾಭವಗೊಳಿಸಿತ್ತು. ಕ್ರೋವೇಶಿಯಾ ತಂಡ ಕೂಡ ನಿರಾಸೆ ಅನುಭವಿಸಿದೆ. ಫಿಫಾ ವಿಶ್ವಕಪ್ ನಲ್ಲಿ ರನ್ನರ್ ಅಪ್ ಆಗಿದ್ದ ಕ್ರೊವೇಶಿಯಾ ತಂಡ ಯೂರೋ ಕಪ್ ಟೂರ್ನಿಯಿಂದ ಹೊರಬಿದ್ದಿದೆ.
ಈ ಪಂದ್ಯ ಕೂಡ ರೋಚಕವಾಗಿಯೇ ಅಂತ್ಯಗೊಂಡಿತ್ತು. ನಿಗದಿತ 90 ನಿಮಿಷಗಳ ಆಟದಲ್ಲಿ ಉಭಯ ತಂಡಗಳು 3-3 ಗೋಲುಗಳಿಂದ ಸಮಬಲ ಸಾಧಿಸಿದ್ದವು. ಕ್ರೊವೇಶಿಯಾ ತಂಡದ ಪರ 20ನೇ ನಿಮಿಷದಲ್ಲಿ ಪೆಡ್ರೆ, 85ನೇ ನಿಮಿಷದಲ್ಲಿ ಮಿಸ್ಲಾವ್ ಒರ್ಸಿಕ್ ಹಾಗೂ 90ನೇ ನಿಮಿಷದಲ್ಲಿ ಮರಿಯೊ ಪಾಸೆಲಿಕ್ ಅವರು ಗೋಲು ದಾಖಲಿಸಿದ್ರು.
ಇನ್ನೊಂದೆಡೆ ಸ್ಪೇನ್ ತಂಡದ ಪರ ಪಾಬ್ಲೊ ಸರಾಬಿಯಾ 38ನೇ ನಿಮಿಷದಲ್ಲಿ, ಸಿಸರ್ ಆಝ್ಪಿಲ್ಕ್ಯಟಾ 57ನೇ ನಿಮಿಷ ಹಾಗೂ ಫೆರಾನ್ ಟೊರೆಸ್ 76ನೇ ನಿಮಿಷದಲ್ಲಿ ಗೋಲು ದಾಖಲಿಸಿದ್ದರು.
ಬಳಿಕ ಹೆಚ್ಚುವರಿ ಅವಧಿಯಲ್ಲಿ ಆಲ್ವೆರೋ ಮೊರೆಟಾ ಮತ್ತು ಮೈಕೆಲ್ ಒಯಾಝಾಬೈ ಅವರು ಕ್ರಮವಾಗಿ 100 ಮತ್ತು 103ನೇ ನಿಮಿಷದಲ್ಲಿ ಗೋಲು ದಾಖಲಿಸುವ ಮೂಲಕ ಸ್ಪೇನ್ ತಂಡದ ಗೆಲುವಿನಲ್ಲಿ ಪ್ರಮುಖ ಪಾತ್ರ ವಹಿಸಿದ್ದರು.
ಕ್ವಾರ್ಟರ್ ಫೈನಲ್ ನಲ್ಲಿ ಸ್ಪೇನ್ ಮತ್ತು ಸ್ವಿಜರ್ ಲೆಂಡ್ ತಂಡಗಳು ಮುಖಾಮುಖಿಯಾಗಲಿವೆ.
ಇಂದಿನ ಪಂದ್ಯದಲ್ಲಿ ಇಂಗ್ಲೆಂಡ್ ಮತ್ತು ಜರ್ಮನಿ ತಂಡಗಳು ಹೋರಾಟ ನಡೆಸಿದ್ರೆ, ಮತ್ತೊಂದು ಪ್ರೀ ಕ್ವಾರ್ಟರ್ ಫೈನಲ್ ಪಂದ್ಯದಲ್ಲಿ ಉಕ್ರೇನ್ ಮತ್ತು ಸ್ವೀಡನ್ ತಂಡಗಳು ಮುಖಾಮುಖಿಯಾಗಲಿವೆ.
