ರಕ್ಷಕನೋ ಹೌದು…. ರಕ್ಕಸನೋ ಹೌದು… ಆಯ್ತು 13 ವರ್ಷ.. ಸಚಿನ್ ದಾಖಲೆ ಅಳಿಸಿ ಹಾಕೋದು ಯಾವಾಗ ವಿರಾಟ್…?
ರಕ್ಷಕನೋ ಹೌದು…. ರಕ್ಕಸನೋ ಹೌದು… ಈತ ವಿಶ್ವ ಕ್ರಿಕೆಟ್ ನ ಹುಲಿಯಾ….!
ನೀನೊಬ್ಬ ಮಾಸ್ಟರ್ ಪೀಸ್…! ಮೈದಾನದಲ್ಲಿ ನೀಡಾಡುವ ಆಟದ ಪರಿಯೇ ಅದ್ಭುತÀ..!
ಎದುರಾಳಿಗಳಿಗೆ ನೀನೊಬ್ಬ ಘನಘೋರ ಅಸುರ… ಟೀಮ್ ಇಂಡಿಯಾದ ಗರ್ಭಗುಡಿಗೆ ನೀನೇ ದೇವ್ರು..!
ವಿಶ್ವ ಕ್ರಿಕೆಟ್ ಬಂದು ಆಯ್ತು 13 ವರ್ಷ.. ಸಚಿನ್ ದಾಖಲೆ ಅಳಿಸಿ ಹಾಕೋದು ಯಾವಾಗ ವಿರಾಟ್ ?
ವಿರಾಟ್ ಕೊಹ್ಲಿ..
ಅಬ್ಬಾ…. ನಿನ್ನ ಬ್ಯಾಟಿಂಗ್ ವೈಖರಿಯನ್ನು ಯಾವ ರೀತಿ ಬಣ್ಣಿಸಬೇಕು ಅಂತನೇ ತಿಳಿಯುತ್ತಿಲ್ಲ. ಯಾಕಂದ್ರೆ ನೀನು ಮೈದಾನದಲ್ಲಿ ಆಡುತ್ತಿದ್ದಿಯೋ… ಅಥವಾ ಯುದ್ಧ ಮಾಡುತ್ತಿದ್ದಿಯೋ ಎಂಬುದೇ ಗೊತ್ತಾಗುತ್ತಿಲ್ಲ. ಮೈದಾನದಲ್ಲಿ ನೀನಾಡುವ ಪರಿಯನ್ನು ನೋಡಿದಾಗ ನೀ ರಕ್ಷಕನೋ… ರಕ್ಕಸನೋ ಅನ್ನೋ ಅನುಮಾನ ಕೂಡ ಮೂಡದೇ ಇರುವುದಿಲ್ಲ.
ಹೌದು, ಪುರಾಣ ಕಥೆಗಳಲ್ಲಿ ಏಕಾಂಗಿಯಾಗಿ ಯುದ್ಧ ಮಾಡುವ ಮಹಾ ಶೂರರ ಕಥೆಗಳನ್ನು ಕೇಳಿದ್ರೂ ಕಣ್ಣಾರೆ ನೋಡಿಲ್ಲ. ಆದ್ರೆ 22 ಯಾರ್ಡ್ ನ ಕ್ರಿಕೆಟ್ ಮೈದಾನದಲ್ಲಿ ನಿನ್ನಾಟವನ್ನು ನೋಡುತ್ತಿದ್ದಾಗ ನೀನೊಬ್ಬ ಮಹಾ ಶೂರನಂತೆ ಕಾಣುವುದರಲ್ಲಿ ಯಾವುದೇ ಸಂದೇಹವಿಲ್ಲ.
ಹೌದು, ಟೀಮ್ ಇಂಡಿಯಾದ ದಳಪತಿಯಾಗಿ ತಂಡವನ್ನು ರಕ್ಷಣೆ ಮಾಡುವುದು ನಿನ್ನ ಜವಾಬ್ದಾರಿ ಎಂಬುದನ್ನು ನೀ ಮರೆಯುವುದಿಲ್ಲ. ತಂಡದ ಗೆಲುವಿಗಾಗಿ ನೀ ನಡೆಸುವ ಹೋರಾಟಕ್ಕೆ ಭೇಷ್ ಅನ್ನದಿರಲು ಮನಸ್ಸು ಒಪ್ಪುವುದಿಲ್ಲ. ಎದುರಾಳಿ ತಂಡಗಳಿಗೆ ನೀನು ಘನಘೋರ ಅಸುರನಂತೆ ಕಾಡುವುದು ಸುಳ್ಳಲ್ಲ. ಉಗ್ರಪ್ರತಾಪಿಯಂತೆ ಬ್ಯಾಟ್ ಬೀಸುವ ನಿನ್ನನ್ನು ಎದುರಾಳಿಗಳು ಮಹಾ ಕ್ರೂರಿ ಅಂತ ಬಣ್ಣಿಸಿದ್ರೂ ಅಚ್ಚರಿ ಏನಿಲ್ಲ. ಆದ್ರೆ ಟೀಮ್ ಇಂಡಿಯಾದ ಕ್ರಿಕೆಟ್ ಅಭಿಮಾನಿಗಳು ಚೇಸಿಂಗ್ ಮಾಸ್ಟರ್ ಅಂತ ಉಘೇ.. ಉಘೇ ಅನ್ನುವುದರಲ್ಲಿ ತಪ್ಪೇನೂ ಇಲ್ಲ.
ಯಾಕಂದ್ರೆ ನೀ ಆಡುವ ರೀತಿಯೇ ಹಾಗಿದೆ. ಚೆಂಡು ಬ್ಯಾಟ್ ನ ಸಮರದಲ್ಲಿ ಕೋಪ, ರೋಷಾಗ್ನಿ ಜ್ವಾಲೆ ನಿನ್ನ ಮುಖದಲ್ಲಿ ಪ್ರಜ್ವಲಿಸುತ್ತದೆ. ಮಾತಿಗೆ ಮಾತು.. ಏಟಿಗೆ ಏಟು.. ಅಲ್ಲೇ ಡ್ರಾ.. ಆಲ್ಲೇ ಬಹುಮಾನ ಎಂಬಂತೆ ಕೆಣಕಿದವರಿಗೆ ನೀ ಕೊಟ್ಟ ತಿರುಗೇಟನ್ನು ಜೀವಮಾನದಲ್ಲೇ ಅವರು ಮರೆಯಲಿಕ್ಕಿಲ್ಲ. ನೀ ಗಳಿಸಿದ್ದ ಒಂದೊಂದು ರನ್ ಗಳಿಗೂ ಅಭಿಮಾನಿಗಳು ಹುಚ್ಚೆದ್ದು ಕುಣಿಯುತ್ತಾರೆ. ಇನ್ನು ಬೌಂಡರಿ ಸಿಕ್ಸರ್ ಗಳ ಅಬ್ಬರಕ್ಕೆ ಅಭಿಮಾನಿಗಳ ಕೂಗು ಝೇಂಕಾರದಂತೆ ಮಾರ್ದನಿಸುತ್ತದೆ.
ಟೀಮ್ ಸೋಲಲಿ ಅಥವಾ ಗೆಲ್ಲಲಿ.. ಅಲ್ಲಿ ಹೆಚ್ಚು ಸದ್ದು, ಸುದ್ದಿ ಮಾಡೋದು. ನೀನೇ. ಯಾಕಂದ್ರೆ ನಿನ್ನ ಆಟದ ಖದರ್, ನಿನ್ನ ಗರ್ವ, ನಿನ್ನ ಅಹಂಕಾರ.. ನಿನ್ನ ನಾಯಕತ್ವ.. ಗೆಲ್ಲಲೇಬೇಕು ಅನ್ನೋ ನಿನ್ನ ಕಿಚ್ಚು, ನಿನ್ನ ಹೋರಾಟವನ್ನು ನೋಡಿದಾಗ ನವರಸಗಳ ನರ್ತನದಂತೆ ಭಾಸವಾಗುತ್ತದೆ.
ಅದೇನೇ ಇರಲಿ, ನೀನು ಅಂತಾರಾಷ್ಟ್ರೀಯ ಕ್ರಿಕೆಟ್ ಗೆ ಪದಾರ್ಪಣೆ ಮಾಡಿ ಇಂದಿಗೆ ಭರ್ತಿ 13 ವರ್ಷ. ಆಗಸ್ಟ್ 18, 2008ರಲ್ಲಿ ಶ್ರೀಲಂಕಾ ವಿರುದ್ಧ ಚೊಚ್ಚಲ ಏಕದಿನ ಪಂದ್ಯವನ್ನು ಆಡುವ ಮೂಲಕ ಅಂತರಾಷ್ಟ್ರೀಯ ಕ್ರಿಕೆಟ್ ಗೆ ಎಂಟ್ರಿಕೊಟ್ಟರು. ಲಂಕಾದ ದಂಬುಲಾ ಅಂಗಣದಿಂದ ಶುರುವಾದ ವಿರಾಟ್ ಕೊಹ್ಲಿಯವರ ಜರ್ನಿ ಯಶಸ್ವಿಯಾಗಿ ಸಾಗುತ್ತಿದೆ. ಟೀಮ್ ಇಂಡಿಯಾಗೆ ಒಬ್ಬ ಆಟಗಾರನಾಗಿ ಎಂಟ್ರಿಕೊಟ್ಟು, ತಂಡಕ್ಕೆ ಆಧಾರಸ್ತಂಭವಾಗಿ, ನಂತರ ನಾಯಕನಾಗಿ ಮುನ್ನಡೆಸುತ್ತಿರುವ ವಿರಾಟ್ ಕೊಹ್ಲಿ ಹಲವು ದಾಖಲೆಗಳ ಒಡೆಯ ಕೂಡ ಹೌದು.
ವಿರಾಟ್ ಕೊಹ್ಲಿ ಇಲ್ಲಿಯವರೆಗೆ 94 ಟೆಸ್ಟ್ ಪಂದ್ಯಗಳನ್ನು ಆಡಿದ್ದಾರೆ. ಏಳು ದ್ವಿತಕ ಸೇರಿ 27 ಶತಕಗಳು ಸೇರಿದಂತೆ ಒಟ್ಟು 7809 ರನ್ ಗಳಿಸಿದ್ದಾರೆ. ಹಾಗೇ 254 ಏಕದಿನ ಪಂದ್ಯಗಳಲ್ಲಿ 43 ಶತಕಗಳ ಸೇರಿದಂತೆ ಒಟ್ಟು 12169 ರನ್ ಗಳಿಸಿದ್ದಾರೆ. 89 ಟಿ-ಟ್ವೆಂಟಿ ಪಂದ್ಯಗಳಲ್ಲಿ 3159 ರನ್ ಗಳಿಸಿದ್ದು, ಐದು ಶತಕಗಳನ್ನು ದಾಖಲಿಸಿದ್ದಾರೆ.
ಆದ್ರೆ ವಿರಾಟ್ ಕೊಹ್ಲಿ ಅವರ ಬ್ಯಾಟ್ ನಿಂದ ಕಳೆದ ಎರಡು ಮೂರು ವರ್ಷಗಳಿಂದ ನಿರೀಕ್ಷಿತವಾಗಿ ರನ್ ಗಳು ಹರಿದು ಬಂದಿಲ್ಲ. ಅಷ್ಟೇ ಅಲ್ಲ, ಶತಕಗಳ ಬರವನ್ನು ಎದುರಿಸುತ್ತಿದ್ದಾರೆ. ಅದೇನೇ ಇರಲಿ, ವಿರಾಟ್ ಕೊಹ್ಲಿ ಫಾರ್ಮ್ ಗೆ ಬಂದ್ರೆ ಎದುರಾಳಿ ತಂಡಗಳಿಗೆ ಭಯ, ಆತಂಕ ಎಲ್ಲವೂ ಶುರುವಾಗುತ್ತದೆ. ಹಾಗೇ ಸಚಿನ್ ತೆಂಡುಲ್ಕರ್ ಅವರ ಏಕದಿನ ಕ್ರಿಕೆಟ್ ನ ದಾಖಲೆಗಳು ಅಳಿಸಿ ಹೋಗುವುದರಲ್ಲಿ ಯಾವುದೇ ಸಂಶಯವಿಲ್ಲ. ಆದ್ರೆ ಯಾವಾಗ ಅಂತ ಹೇಳಲು ಸಾಧ್ಯವಿಲ್ಲ…?
