ತಿಂಗಳಿಗೆ 250 ರೂಪಾಯಿ ಸಂಪಾದನೆ ಮಾಡುತ್ತಿದ್ದ ಪೇಪರ್ ಹಂಚುವ ಹುಡುಗ ಇಂದು ಫ್ಯಾಷನ್ ಕ್ಷೇತ್ರದಲ್ಲಿ ಸಾಧಕ, ನಮ್ಮ ಕರುನಾಡಿನ ಹುಡುಗ:
ಅದು 2007, ಸಿದ್ ತನ್ನ ತಂದೆಯ ಅಕಾಲಿಕ ಮರಣದಿಂದಾಗಿ ಸಂಸಾರದ ನಿರ್ವಹಣೆಗೆ ತನ್ನ ಏರಿಯಾದಲ್ಲಿ ಪೇಪರ್ ಹಂಚಿ, ಶಾಲೆಗೆ ಹೋಗಲು ಪ್ರಾರಂಭಿಸುತ್ತಾನೆ. ಆಗ ಬರುತ್ತಿದ ಅಲ್ಪ 250 ರೂಗಳ ಮಾಸಿಕ ವರಮಾನ ಯಾವುದಕ್ಕೂ ಸಾಲುವುದಿಲ್ಲ ಎನ್ನುವ ಪರಿಸ್ಥಿತಿ. ಅದೇ ಸಮಯದಲ್ಲಿ ತಾಯಿ ಕೈಗಾರಿಕಾ ಕಾರ್ಖಾನೆಯಲ್ಲಿ ಕ್ಲರ್ಕ್ ಆಗಿ ಕೆಲಸಕ್ಕೆ ಸೇರುತ್ತಾರೆ. ಮುಂದೆ ಹೈಸ್ಕೂಲ್ ಮುಗಿಸಿ ಹೊಟ್ಟೆ ಪಾಡಿಗೊಸ್ಕರ ಆಫೀಸ್ ಬಾಯ್ ಯಾಗಿ ಒಂದು ಸಣ್ಣ ಚಾರ್ಟರ್ಡ್ ಅಕೌಂಟೆಂಟ್ ಆಫೀಸಿಗೆ ಸೇರುತ್ತಾನೆ ಸಿದ್. ವಿಪರ್ಯಾಸ ಏನೆಂದರೆ ತಾನು ಆಫೀಸಿಗೆ ಹೋಗುವ ಬಸ್ಸಿನಲ್ಲಿ ದಿನನಿತ್ಯ ಆತನ ಇತರ ಶಾಲಾ ಗೆಳೆಯರು ತಮ್ಮ ಉನ್ನತ ವಿದ್ಯಾಭ್ಯಾಸಕ್ಕೆ ಹೋಗುತ್ತಿರುತ್ತಾರೆ. ಅದೆಷ್ಟೋ ಬಾರಿ ತನ್ನ ಗೆಳೆಯರಿಂದ ಆತ ಕೇವಲವಾಗಿ ಅನಿಸಿಕೊಂಡದ್ದು ಇದೆ. ಮುಂದೆ ಆತ ಹೊಟ್ಟೆ ಪಾಡಿಗಾಗಿ ಅನೇಕ ಕೆಲಸಗಳನ್ನು ಬದಲಾಯಿಸುತ್ತಾ ಸಂಕಷ್ಟಗಳ ನಡುವೆಯೇ ಬದುಕುತ್ತಾನೆ. ಆಫೀಸ್ ಬಾಯ್ ಆಗಿದ್ದ ಆ ಹುಡುಗನಲ್ಲಿ ಒಂದು ಇಡೀ ಅಂಗಡಿಯನ್ನು ನಿಭಾಯಿಸಬಹುದೆನ್ನುವ ಆತ್ಮ ಬಲ ವೃದ್ಧಿಯಾಗುತ್ತದೆ.
ಮುಂದೆ ಜೀವನದ ಪಯಣದಲ್ಲಿ “ಮಂತ್ರಿ ಮಾಲ್” ನಲ್ಲಿರುವ “ನ್ಯೂಯು” ಅನ್ನುವ ಸ್ಟೋರ್ ಉಸ್ತುವಾರಿ ಈತನಿಗೆ ಸಿಗುತ್ತದೆ. ಬರುತ್ತಿದ 15000 ಮಾಸಿಕ ಸಂಬಳ, ದಿನ ನಿತ್ಯದ ಟ್ರೈನ್ ಓಡಾಟ. ಇದೇ ಸಮಯದಲ್ಲಿ ಮಾಲ್ನ ಮಾರ್ಕೆಟಿಂಗ್ ಮತ್ತು ಕಾರ್ಯಾಚರಣೆಯ ತಂಡದೊಂದಿಗೆ ಸ್ನೇಹ ಬೆಳೆಯುತ್ತದೆ ಮತ್ತು ಅಲ್ಲಿ ಕಾರ್ಯಗಳನ್ನು ನಿರ್ವಹಿಸುತ್ತಿದ್ದ ಉಲ್ಲಾಸ್ ಗೆ ಸಿದ್ ಹತ್ತಿರವಾಗುತ್ತಾನೆ. ಆದರೆ ಉಲ್ಲಾಸ್ ಕೆಲಸ ಬಿಟ್ಟ ಕಾರಣ ಆತನ ಬದಲಿಯಾಗಿ ಸಿದ್ ನ ಹೆಸರು ಕೇಳಿ ಬರುತ್ತದೆ. ನಂತರ ಸಿದ್ ಈವೆಂಟ್ ಮ್ಯಾನೇಜ್ಮೆಂಟ್ ವಲಯದಲ್ಲಿ ಮಧ್ಯವರ್ತಿಗಳೊಂದಿಗೆ ಕೆಲಸ ಮಾಡಲು ಪ್ರಾರಂಭಿಸುತ್ತಾನೆ.
ಸ್ಕ್ವೇರ್ ಒನ್ ಎಕ್ಸ್ಪೀರಿಯೆನ್ಷಿಯಲ್ ಮಾರ್ಕೆಟಿಂಗ್ ಸಂಸ್ಥೆ, ಫ್ಯಾಷನ್ ಹಿನ್ನೆಲೆಯನ್ನು ಹೊಂದಿದ್ದು, ಬೆಂಗಳೂರಿನಲ್ಲಿ ಕೆಲವು ಫ್ಯಾಶನ್ ಬ್ರಾಂಡ್ಗಳನ್ನು ಮಾರುಕಟ್ಟೆಗೆ ತರಲು ಮತ್ತು ನಿರ್ವಹಿಸಲು ಸಹಾಯ ಮಾಡುತ್ತದೆ. ಇಲ್ಲಿ ಕೆಲಸ ಮಾಡಿದ್ದರಿಂದ ಸಿದ್ ನ ಫ್ಯಾಶನ್ ಪೋರ್ಟ್ಫೋಲಿಯೊ ಮತ್ತು ಸಂಬಂಧಪಟ್ಟ ಮಧ್ಯವರ್ತಿಗಳ ಜೊತೆಗಿನ ಸಂಬಂಧಗಳನ್ನು ಬೆಳೆಸಲು ಆತನಿಗೆ ಸಹಾಯವಾಗುತ್ತದೆ. ಫ್ಯಾಷನ್ ಮತ್ತು ಕಾರ್ಯಕ್ರಮದ ಬಗ್ಗೆ, ಗ್ರಾಹಕರನ್ನು ನಿಭಾಯಿಸುವುದು, ನೆಟ್ವರ್ಕ್ ನಿರ್ಮಿಸುವುದು ಮತ್ತು ಕಂಪ್ಯೂಟರ್ ಸಾಫ್ಟ್ವೇರ್ ಬಳಸುವಂತಹ ತಾಂತ್ರಿಕ ಕೌಶಲ್ಯಗಳ ಬಗ್ಗೆ ಜ್ಞಾನವನ್ನು ಸಂಪಾದಿಸುವ ಸಿದ್ ಗೆ ತಾನು ಖಂಡಿತವಾಗಿಯೂ ಬಹಳ ದೂರ ಬಂದಿದ್ದೇನೆ ಎಂದು ಅನಿಸುತ್ತದೆ.
ಜುಲೈ 2017ರಲ್ಲಿ, ಸಿದ್ “ವೋಗ್ ಮ್ಯಾಗಜಿನ್” ಗಾಗಿ ಫ್ರೀ ಲ್ಯಾನ್ಸರ್ ಆಗಿ ಕೆಲಸ ಮಾಡಲಾರಂಭಿಸುತ್ತಾನೆ, ಮ್ಯಾಗಜಿನ್ ನ ಕವರ್ ಪಿಕ್ಚರ್ ಜವಾಬ್ದಾರಿ ಇವನಿಗೆ ನೀಡಲಾಗುತ್ತದೆ. ಆದರೆ ಆ ಕವರ್ ಪಿಕ್ಚರ್ ವೈರಲ್ ಆದ ಕಾರಣ ಅನೇಕ ಇತರ ನಿಯತಕಾಲಿಕೆಗಳು ಮತ್ತು ಮಧ್ಯವರ್ತಿಗಳೊಂದಿಗೆ ಫ್ರೀ ಲ್ಯಾನ್ಸರ್ ಆಗಿ ಕೆಲಸ ಮಾಡಲು ಅವಕಾಶ ಸಿಗುತ್ತದೆ. ಅವರು ಸಿದ್ ಗೆ ಇನ್ನೂ ಹೆಚ್ಚಿನ ಯೋಜನೆಗಳನ್ನು ನೀಡಲು ಉತ್ಸುಕರಾಗಿರುತ್ತಾರೆ. ಇದೆಲ್ಲವನ್ನೂ ಗಮನದಲ್ಲಿಟ್ಟುಕೊಂಡು, ನನ್ನ ಸ್ವಂತ ವ್ಯವಹಾರವನ್ನು ಹೊಂದಬೇಕು ಎಂದು ಇಚ್ಛಿಸಿದ ಸಿದ್, ಸ್ಕ್ವೇರ್ ಒನ್ನಲ್ಲಿ ಕೆಲಸವನ್ನು ತ್ಯಜಿಸಿ 2017 ರಲ್ಲಿ ಸಿದ್ ಪ್ರೊಡಕ್ಷನ್ಸ್ ಅನ್ನು ನೋಂದಾಯಿಸುತ್ತಾನೆ.
ಮೊದಮೊದಲು ಯಾವುದೇ ನಿರ್ದಿಷ್ಟ ಕ್ಲೈಂಟ್ ಇಲ್ಲದ ಕಾರಣ ಸಾಮಾಜಿಕ ಜಾಲತಾಣಗಳ ಮೂಲಕ ಗಮನ ಸೆಳೆಯಲು ನಿರ್ಧರಿಸಿದ ಸಿದ್ ಗೆ ಅಚಾನಕ್ ಆಗಿ ಮಿಂತ್ರಾ ಕಣ್ಣಿಗೆ ಬೀಳುತ್ತದೆ. ಅವರು ಸಿದ್ ನ ಸಂಪರ್ಕಿಸಿ 15 ಲಕ್ಷ ರೂಪಾಯಿ ಮೌಲ್ಯದ ಐದು ದಿನಗಳ ಪ್ರಚಾರದ ಚಿತ್ರೀಕರಣ ಮಾಡಲು ಹೇಳುತ್ತಾರೆ. ಆದರೆ ಸಿದ್ ನಲ್ಲಿ ಅಷ್ಟು ದುಡ್ಡು ಇಲ್ಲದ ಕಾರಣ ತನ್ನ ಸಂಬಂಧಿಕರು ಮತ್ತು ಸ್ನೇಹಿತರಲ್ಲಿ ಸಾಲ ಮಾಡಿ ಕೊನೆಗೆ ಕೊಟ್ಟ ಕೆಲಸವನ್ನು ನಿರ್ವಹಿಸುತ್ತಾನೆ. ಹೆಚ್ಚಿನ ಲಾಭ ಸಿಗದಿದ್ದರೂ ಮುಂದೆ ಈತನ ಕೆಲಸಕ್ಕೆ ಇನ್ನಷ್ಟು ಪ್ರಾಜೆಕ್ಟ್ ವರ್ಕ್ ಸಿಗುತ್ತದೆ. ನಂತರದ ದಿನಗಳಲ್ಲಿ ಫ್ಯೂಚರ್ ಗ್ರೂಪ್, ಇಂಡಿಗೋ ನೇಶನ್, ಲೈಫ್ ಸ್ಟೈಲ್, ಮ್ಯಾಕ್ಸ್ ಮುಂತಾದ ಗ್ರಾಹಕರಿಗೆ ಚಿತ್ರೀಕರಣ, ಸ್ಟೋರ್ ಪ್ರಾರಂಭಕ್ಕೆ ವಿನ್ಯಾಸ ತಯಾರಿಕೆಗೆ ಗ್ರಾಹಕರು ಬೇಡಿಕೆ ಇಡುತ್ತಾರೆ.
ಪೇಪರ್ ಮಾರುತ್ತ ಜೀವನ ಕಟ್ಟಿಕೊಂಡ ಒಬ್ಬ ಕರುನಾಡಿನ ಹಠವಾದಿ ಪೋರ ಇಂದು ಫ್ಯಾಷನ್ ಲೋಕದ ವಿನ್ಯಾಸಕ್ಕೆ ಲಗ್ಗೆ ಇಟ್ಟು ಹೊಸ ಛಾಪು ಮೂಡಿಸಿದ್ದು ನಿಜಕ್ಕೂ ಪ್ರೇರಣೆ ಮೂಡಿಸುವ ಕಥಾನಕ. ಹತ್ತು ಹಲವು ಕೆಲಸಗಳನ್ನು ಮಾಡಿ ಕೇವಲ ಛಲವೊಂದರ ಹಿಂದೆ ಬಿದ್ದು ಯಶಸ್ವಿಯಾದ ಸಿದ್ ನ ಸಾಧನೆಯನ್ನು ಮೆಚ್ಚಲೇ ಬೇಕು. ಉದರನಿಮಿತ್ತ ಹತ್ತು ಹಲವು ಆಫೀಸ್ ಸುತ್ತಿದ ಸಿದ್ ಇಂದು 50 – 80 ಜನರಿಗೆ ಚಿತ್ರೀಕರಣದ ಸಮಯದಲ್ಲಿ ಕೆಲಸ ನೀಡುತ್ತಿದ್ದಾರೆ. ಮುಂದೊಂದು ದಿನ ಸಂಜಯ್ ಲೀಲಾ ಬನ್ಸಾಲಿ ಜೊತೆ ಕೆಲಸ ಮಾಡಬೇಕೆನ್ನುವ ಹಂಬಲದ ಜೊತೆ ಫ್ಯಾಷನ್ ಜಗತ್ತಿನ ಹೊಸ ಆಯಮಕ್ಕೆ ತೆರೆದುಕೊಳ್ಳಲು ಮುಂಬೈ ದೆಹಲಿಯಲ್ಲಿ ಹೊಸ ಆಫೀಸ್ ಪ್ರಾರಂಭಿಸಬೇಕು ಎನ್ನುವ ಹೆಬ್ಬಯಕೆಯಿದೆ.
