ವ್ಯಾಟಿಕನ್ ಸಿಟಿ, ಇಟಲಿಯ ರೋಮ್‌ನಲ್ಲಿ ನೆಲೆಗೊಂಡಿರುವ ವಿಶ್ವದ ಅತಿದೊಡ್ಡ ಕ್ರಿಶ್ಚಿಯನ್ ಧರ್ಮದ ಕೇಂದ್ರವಾಗಿದ್ದು, ಕೇವಲ 118 ಎಕರೆ ಪ್ರದೇಶದ ಮೇಲೆ ಸ್ಥಾಪಿತವಾಗಿದೆ. ಫೆಬ್ರವರಿ 11, 1929 ರಂದು ಲಾಟರನ್ ಒಡಂಬಡಿಕೆಯಿಂದ ರಚನೆಗೊಂಡ ಈ ನಗರ-ರಾಜ್ಯವು ತನ್ನ ಆಂತರಿಕ ನಿರ್ವಹಣೆಯಲ್ಲೂ ವಿಶಿಷ್ಟತೆಯನ್ನು ಹೊಂದಿದೆ.
ವ್ಯಾಟಿಕನ್ ಸಿಟಿಯಲ್ಲಿ ಸುಮಾರು 800 ಜನ ವಾಸಿಸುತ್ತಾರೆ. ಇವರಲ್ಲಿ ಪಾದ್ರಿಗಳು, ಕಾರ್ಡಿನಲರು, ಮತ್ತು ಸ್ವಿಸ್ ಗಾರ್ಡುಗಳೊಂದಿಗೆ ಅಲ್ಪಸಂಖ್ಯೆಯ ಮಹಿಳೆಯರು ಕೂಡ ವಾಸವಾಗಿದ್ದಾರೆ. ಈ ಮಹಿಳೆಯರಲ್ಲಿ ಹೆಚ್ಚಿನವರು ನನ್‌ಗಳು ಅಥವಾ ಕಾರ್ಯನಿರ್ವಹಣಾ ಸಿಬ್ಬಂದಿಯಾಗಿದ್ದಾರೆ.
ಮಗು ಜನನದ ಅಭಾವಕ್ಕೆ ಕಾರಣಗಳು:
1. ವ್ಯಾಟಿಕನ್ ಸಿಟಿಯು ಸಂಪೂರ್ಣವಾಗಿ ಧಾರ್ಮಿಕ ಕೇಂದ್ರವಾಗಿದ್ದು, ಧರ್ಮಗುರುಗಳು ಮತ್ತು ಧಾರ್ಮಿಕ ಸೇವಕರ ವಾಸಸ್ಥಳವಾಗಿದೆ. ವ್ಯಾಟಿಕನ್ ಸಿಟಿಯು ಕ್ಯಾಥೊಲಿಕ್ ಚರ್ಚಿನ ಪ್ರಮುಖ ಕೇಂದ್ರವಾಗಿರುವುದರಿಂದ, ಇಲ್ಲಿ ವಾಸಿಸುತ್ತಿರುವ ಧರ್ಮಗುರುಗಳು ಮತ್ತು ನನ್‌ಗಳು ತಮ್ಮ ಜೀವನವನ್ನು ಧರ್ಮದ ಸೇವೆಗೆ ಅರ್ಪಿಸಿದ್ದಾರೆ. ಬ್ರಹ್ಮಚರ್ಯದ ಪ್ರತಿಜ್ಞೆ ಪ್ರಕಾರ, ಅವರಿಗೆ ವೈವಾಹಿಕ ಸಂಬಂಧಗಳಿಗೆ ಅಥವಾ ಗರ್ಭಧಾರಣೆಗೆ ಅವಕಾಶ ಇರುವುದಿಲ್ಲ.
2. ವ್ಯಾಟಿಕನ್ ಸಿಟಿಯ ಒಳಗೆ ಆಸ್ಪತ್ರೆ ಇಲ್ಲ. ಯಾರೇ ಅನಾರೋಗ್ಯಕ್ಕೆ ಒಳಗಾದರು ಅಥವಾ ಹೆರಿಗೆಗಾಗಿ ಆರೈಕೆ ಬೇಕಾದಾಗ, ಅವರನ್ನು ಸಮೀಪದ ರೋಮ್‌ನ ಆಸ್ಪತ್ರೆಗಳಿಗೆ ಕಳುಹಿಸಲಾಗುತ್ತದೆ. ಇದಕ್ಕೆ ಕಾರಣ ಈ ಸಿಟಿಯ ಅತೀ ಸಣ್ಣ ವಿಸ್ತೀರ್ಣದಿಂದ ಉಂಟಾದ ಅಸಮರ್ಪಕ ಮೂಲಸೌಕರ್ಯ.
3. ವ್ಯಾಟಿಕನ್ ಸಿಟಿಯ ಪೌರತ್ವವು ವಿಶಿಷ್ಟ ಪದ್ಧತಿಯಲ್ಲಿ ನಿರ್ಧರಿಸಲಾಗಿದೆ. ಒಬ್ಬ ವ್ಯಕ್ತಿಯು ವ್ಯಾಟಿಕನ್ ಪೌರತ್ವವನ್ನು ಆಕಸ್ಮಿಕವಾಗಿ ಪಡೆಯಲಾಗುವುದಿಲ್ಲ; ಅದು ವೈಯಕ್ತಿಕ ಧಾರ್ಮಿಕ ಸೇವೆ ಅಥವಾ ಆಧಿಕೃತ ಅಧಿಕಾರಗಳ ಮೂಲಕ ಮಾತ್ರ ಸಾಧ್ಯ. ಅಂದರೆ ಈ ಪೌರತ್ವವನ್ನು ಧರ್ಮಗುರುಗಳು, ಪೋಪ್‌ಗೆ ಸೇವೆ ಸಲ್ಲಿಸುವ ಸ್ವಿಸ್ ಗಾರ್ಡ್ ಸೈನಿಕರು, ಅಥವಾ ಚರ್ಚ್‌ನ ಪ್ರಮುಖ ಅಧಿಕಾರಿಗಳು ಪಡೆಯುತ್ತಾರೆ. ಅವರು ತಮ್ಮ ಹುದ್ದೆಯಿಂದ ನಿವೃತ್ತರಾದ ನಂತರ ಅಥವಾ ಸೇವಾ ಅವಧಿ ಮುಗಿದ ನಂತರ ಪೌರತ್ವವನ್ನು ಕಳೆದುಕೊಳ್ಳುತ್ತಾರೆ.
ವ್ಯಾಟಿಕನ್ ಸಿಟಿ ಕ್ರಿಶ್ಚಿಯನ್ ಧರ್ಮ, ವಿಶೇಷವಾಗಿ ಕ್ಯಾಥೋಲಿಕ್ ಚರ್ಚ್‌ನ ಹೃದಯಸ್ಥಾನವಾಗಿದೆ. ಇದು ಧಾರ್ಮಿಕ, ರಾಜಕೀಯ, ಮತ್ತು ಆರ್ಥಿಕ ಅಂಶಗಳ ಜಟಿಲ ಸಂಯೋಜನೆಯಾಗಿದ್ದು, ಪೋಪ್‌ನ ಆಧಿಕಾರ ಮತ್ತು ಪವಿತ್ರ ಸೇವೆಗಳ ಕೇಂದ್ರವಾಗಿದೆ. ವ್ಯಾಟಿಕನ್ ಸಿಟಿಯ ಪ್ರಮುಖ ಉದ್ದೇಶವು ಕ್ರಿಶ್ಚಿಯನ್ ಧರ್ಮದ ಪ್ರಚಾರ ಮತ್ತು ರಕ್ಷಣೆ. ಇದು ವಿಶ್ವದ ಕ್ರಿಶ್ಚಿಯನ್ ಸಮುದಾಯಗಳಿಗೆ ಮಾರ್ಗದರ್ಶಕರಾಗಿ ಮತ್ತು ಧಾರ್ಮಿಕ ಕೇಂದ್ರವಾಗಿ ಸೇವೆ ಸಲ್ಲಿಸುತ್ತದೆ.
ಪೋಪ್, ಕ್ಯಾಥೋಲಿಕ್ ಚರ್ಚ್‌ನ ಮುಖ್ಯಸ್ಥ, ವ್ಯಾಟಿಕನ್ ಸಿಟಿಯ ಪ್ರಧಾನ ನಾಗರಿಕ. ವ್ಯಾಟಿಕನ್ ಸ್ವತಂತ್ರ ನಗರ-ರಾಜ್ಯವಾಗಿದ್ದು, ತನ್ನದೇ ಆದ ಆಡಳಿತ, ನೀತಿ, ಮತ್ತು ಸಿದ್ಧಾಂತಗಳನ್ನು ಹೊಂದಿದೆ. ವೈಯಕ್ತಿಕ ಸ್ವಾತಂತ್ರ್ಯಕ್ಕಿಂತ ಪೋಪ್ ನ ಅಧಿಕಾರವು ಹೆಚ್ಚಾಗಿರುತ್ತದೆ.
ವ್ಯಾಟಿಕನ್ ಇತಿಹಾಸದಲ್ಲಿ ಒಮ್ಮೆ ಮಾತ್ರ ಹೆರಿಗೆಯ ದಾಖಲೆ:
ವ್ಯಾಟಿಕನ್ ಸಿಟಿಯಲ್ಲಿ ಮಗು ಜನಿಸಿದ ದಾಖಲೆಗಳು ಅಪರೂಪವಾಗಿದ್ದು, 1929ರಲ್ಲಿ ಈ ರಾಜ್ಯದ ರಚನೆಗೆ ಮೊದಲು ಕೆಲವು ಕಾವ್ಯಗಳು ಅಥವಾ ಕುತೂಹಲಕಾರಿ ಕಥೆಗಳಲ್ಲಿ ಮಾತ್ರ ನಾವು ಕಾಣಬಹುದು. ಆಧುನಿಕ ವ್ಯಾಟಿಕನ್ ಸಿಟಿಯಲ್ಲಿ ಒಂದು ಬಳ್ಳಿಯೂ ಅರಳದ ಈ ಬೆಳವಣಿಗೆ ಅತೀ ಸಾಮಾನ್ಯವೆಂದೇ ಪರಿಗಣಿಸಲಾಗಿದೆ. ಆದರೆ, ಇತಿಹಾಸದ ಪುಟಗಳಲ್ಲಿ ಒಂದು ವಿಚಿತ್ರ ಮತ್ತು ಅನುಮಾನಾಸ್ಪದ ಘಟನೆಯು ದಶಕಗಳ ಕಾಲ ಚರ್ಚೆಯ ಕೇಂದ್ರವಾಗಿತ್ತು.
ವ್ಯಾಟಿಕನ್‌ನ ಹೆರಿಗೆಯ ಕುರಿತು ಹೆಚ್ಚು ಪ್ರಸಿದ್ಧವಾದ ಕಥೆಯೆಂದರೆ “ಪೋಪ್ ಜೋನ್” ದಂತಕಥೆ. ಈ ಕಥೆಯ ಪ್ರಕಾರ, 9ನೇ ಶತಮಾನದ ಮಧ್ಯದಲ್ಲಿ ಮಹಿಳೆಯೊಬ್ಬಳು ತಾನು ಮಹಿಳೆಯೆಂಬ ಸತ್ಯವನ್ನು ಮುಚ್ಚಿಟ್ಟು, ಪೋಪ್ ಆಗಿ ಆಯ್ಕೆಯಾಗಿದ್ದಳು. ಕೆಲವು ವರ್ಷಗಳ ಕಾಲ, ಪೋಪ್ ಜೋನ್ ಎಂಬ ಹೆಸರಿನಲ್ಲಿ ಆಕೆಯ ಆಡಳಿತ ನಡೆಸಿದಳು.
ಜೋನ್, “ಪೋಪ್ ಜೋನ್” ಹೆಸರಿನಲ್ಲಿ ರಾಜಕೀಯ ಮತ್ತು ಧಾರ್ಮಿಕ ಕಾರ್ಯಗಳನ್ನು ನಿರ್ವಹಿಸುತ್ತಿದ್ದಾಗ,
ಆಕೆ ಗರ್ಭವನ್ನು ಧರಿಸಿದ್ದು, ಅದು ಯಾರಿಗೂ ಗೊತ್ತಾಗಿರಲಿಲ್ಲ. ಆದರೆ, ಒಂದು ದಿನ ಪಾಪಲ್ ಮೆರವಣಿಗೆಯ ಮಧ್ಯೆ, ಆಕೆಯು ಮಗುವಿಗೆ ಜನ್ಮ ನೀಡಿದ್ದು ಅಚ್ಚರಿ ಮೂಡಿಸಿತು. ಇದನ್ನು ಕಂಡ ಜನರು ಆಕೆಯನ್ನು ಕೂಡಲೇ ಪೋಪ್ ಸ್ಥಾನದಿಂದ ಕೆಳಗಿಳಿಸಿದರು.
ಸತ್ಯ ಅಥವಾ ದಂತಕಥೆ?
ಈ ಘಟನೆಯ ಕುರಿತು ಯಾವುದೇ ದೃಢವಾದ ದಾಖಲೆಗಳು ಇಲ್ಲದಿರುವ ಕಾರಣ, ಪೋಪ್ ಜೋನ್ ಕಥೆಯನ್ನು ಇತಿಹಾಸಕಾರರು ಇದೊಂದು ದಂತಕಥೆಯಷ್ಟೆ ಎಂದು ಹೇಳುತ್ತಾರೆ.
1929ರಲ್ಲಿ ವ್ಯಾಟಿಕನ್ ಸಿಟಿ ಲಾಟೆರನ್ ಒಪ್ಪಂದದ ಮೂಲಕ ಸ್ವತಂತ್ರ ನಗರ-ರಾಜ್ಯವಾಗಿ ರಚನೆಯಾಯಿತು. ಈ ಸಣ್ಣ ರಾಜ್ಯವು ಸೀಮಿತ ವಿಸ್ತೀರ್ಣದ ಜಾಗದಲ್ಲಿ ಧಾರ್ಮಿಕ ಕೇಂದ್ರವಾಗಿ ಮಾತ್ರ ಕಾರ್ಯನಿರ್ವಹಿಸಲು ಉದ್ದೇಶಿತವಾಯಿತು.
ಈ ಕಾರಣಗಳಿಂದಲೇ ವ್ಯಾಟಿಕನ್ ಸಿಟಿ ಇಂದು 95 ವರ್ಷಗಳಿಂದ ಮಗು ಜನಿಸದ ಸ್ಥಳವೆಂದು ಜಗತ್ತಿಗೆ ಪ್ರಸಿದ್ಧವಾಗಿದೆ.
