ಮುಜೀಜ್, ರಶೀದ್ ಮ್ಯಾಜಿಕ್, ಅಫ್ಘಾನ್ ಮುಂದೆ 130 ರನ್ಗಳ ಸೋಲುಂಡ ಸ್ಕಾಟ್ ಲೆಂಡ್
ಅಫ್ಘಾನಿಸ್ತಾನದ ಬ್ಯಾಟ್ಸ್ ಮನ್ಗಳು ಅಬ್ಬರಿಸಿ ಬೊಬ್ಬಿರಿದರು. 11 ಸಿಕ್ಸರ್ ಮತ್ತು 13 ಬೌಂಡರಿಗಳನ್ನು ಬಾರಿಸಿ ಸ್ಕಾಟ್ ಲೆಂಡ್ ಬೌಲರ್ಗಳ ಬೆಂಡೆತ್ತಿದ್ದರು. ನಂತರ ಮುಜೀಬ್ ಉರ್ ರೆಹಮಾನ್ ಮತ್ತು ರಶೀದ್ ಖಾನ್ ತಮ್ಮ ಸ್ಪಿನ್ ಮ್ಯಾಜಿಕ್ ಮೂಲಕ ಸ್ಕಾಟ್ ಲೆಂಡ್ ಬ್ಯಾಟ್ಸ್ ಮನ್ ಗಳಿಗೆ ಕಡಿವಾಣ ಹಾಕಿದರು. ಪರಿಣಾಮ ಅಫ್ಘಾನಿಸ್ತಾನ 130 ರನ್ಗಳ ಬೃಹತ್ ಜಯ ದಾಖಲಿಸಿತು.
ಶಾರ್ಜಾದಲ್ಲಿ ಟಾಸ್ ಗೆದ್ದು ಬ್ಯಾಟಿಂಗ್ ಆರಂಭಿಸಿದ್ದು ಅಫ್ಘಾನಿಸ್ತಾನ. ಮೊಹ್ಮದ್ ಶೆಹಜಾದ್ (22 ರನ್) ಮತ್ತು ಹಜರತ್ ಝಝಾಯಿ (44 ರನ್) ಪವರ್ ಪ್ಲೇ ನಲ್ಲಿ ಪವರ್ ಫುಲ್ ಆಟ ಆಡಿದರು. ರೆಹಮತ್ ಉಲ್ಲಾ ಗುರ್ಬಾಜ್ (46 ರನ್) ಮತ್ತು ನಜಿಬುಲ್ಲಾ ಜರ್ದಾನ್ ಅಬ್ಬರಿಸಿ ಬೊಬ್ಬಿರಿದರು (59 ರನ್). ಪರಿಣಾಮ ಅಫ್ಘಾನಿಸ್ತಾನ 20 ಓವರುಗಳಲ್ಲಿ 4 ವಿಕೆಟ್ ಕಳೆದುಕೊಂಡು 190 ರನ್ಗಳಿಸಿತು.
ಚೇಸಿಂಗ್ ಆರಂಭಿಸಿದ ಸ್ಕಾಟ್ ಲೆಂಡ್ ಆರಂಭದಲ್ಲೇ ಎಡವಿತು. ಹೆನ್ರಿ ಮುನ್ಶಿ(25 ರನ್), ಕೊಯಿಟ್ಜರ್ (10 ರನ್), ಕ್ರಿಸ್ ಗ್ರೀವ್ಸ್ (12 ರನ್) ಬಿಟ್ಟರೆ ಉಳಿದವರು ಎರಡಂಕಿ ಗಡಿ ದಾಟಲಿಲ್ಲ. 5 ಬ್ಯಾಟ್ಸ್ಮನ್ ಗಳು ಶೂನ್ಯ ಸುತ್ತಿದರು. ಪರಿಣಾಮ ಸ್ಕಾಟ್ ಲೆಂಡ್ 10.2 ಓವರುಗಳಲ್ಲಿ 60 ರನ್ಗಳಿಗೆ ಆಲೌಟ್ ಆಯಿತು. ಅಫ್ಘಾನಿಸ್ತಾನ 130 ರನ್ಗಳ ಭರ್ಜರಿ ಜಯ ದಾಖಲಿಸಿತು. ಅಫ್ಘಾನಿಸ್ತಾನದ ಪರವಾಗಿ ಮುಜೀಬ್ 20 ರನ್ ಗಳಿಗೆ 5 ವಿಕೆಟ್ ಹಾರಿಸಿದರು. ರಶೀದ್ 4 ವಿಕೆಟ್ ಪಡೆದು ಮಿಂಚಿದರು.
