ಇನ್ನು ಅಮಿತಾಬ್ ಬಚ್ಚನ್ ನಮಗೆಲ್ಲ ದಾರಿ ತೋರಿಸಲಿದ್ದಾರೆ !
ಮುಂಬೈ, ಜೂನ್ 12: ಬಾಲಿವುಡ್ ಬಿಗ್ ಬಿ ಅಮಿತಾಬ್ ಬಚ್ಚನ್ ಇಷ್ಟರಲ್ಲೇ ನಮಗೆಲ್ಲರಿಗೂ ದಾರಿಯನ್ನು ತಿಳಿಸಲಿದ್ದಾರೆ. ಗೂಗಲ್ ಸಂಸ್ಥೆ ಅಮಿತಾಬ್ ಬಚ್ಚನ್ ಅವರನ್ನು ಸಂಪರ್ಕಿಸಿದ್ದು, ಗೂಗಲ್ ಮ್ಯಾಪ್ ಗಳಿಗೆ ಧ್ವನಿ ನೀಡಲು ಕೇಳಿಕೊಂಡಿದೆ ಎಂದು ಹೇಳಲಾಗುತ್ತಿದೆ.
ಗೂಗಲ್ ಸಂಸ್ಥೆ ಅಮಿತಾಬ್ ಬಚ್ಚನ್ ಅವರ ಅಮೋಘ ಕಂಠ ಸ್ವರಕ್ಕೆ ಮಾರು ಹೋಗಿದ್ದು ತನ್ನ ಗೂಗಲ್ ನಕ್ಷೆಗಳಿಗೆ ಅವರ ಕಂಠ ಸಿರಿಯನ್ನು ಬಳಸಿಕೊಳ್ಳುವ ನಿಟ್ಟಿನಲ್ಲಿ ಅಮಿತಾಬ್ ಅವರನ್ನು ಸಂಪರ್ಕಿಸಿದ್ದು, ಧ್ವನಿ ನೀಡುವಂತೆ ಕೇಳಿಕೊಂಡಿದೆ. ಅದಕ್ಕಾಗಿ ದೊಡ್ಡ ಮೊತ್ತವನ್ನು ಸಹ ಅಮಿತಾಬ್ ಅವರಿಗೆ ನೀಡಲು ಗೂಗಲ್ ಮುಂದಾಗಿದೆ ಎಂದು ಹೇಳಲಾಗುತ್ತಿದೆ. ಆದರೆ ಅಮಿತಾಬ್ ಬಚ್ಚನ್ ಅವರು ಇದಕ್ಕೆ ಏನೆಂದು ಪ್ರತಿಕ್ರಿಯೆ ನೀಡಿದ್ದಾರೆ ಎಂಬ ಬಗ್ಗೆ ಯಾವುದೇ ಮಾಹಿತಿ ಲಭ್ಯವಾಗಿಲ್ಲ.
ಮಿಡ್-ಡೇ ಪತ್ರಿಕೆಯ ವರದಿಗಳ ಪ್ರಕಾರ ಗೂಗಲ್ ತನ್ನ ಗೂಗಲ್ ಮ್ಯಾಪ್ ಗೆ ಧ್ವನಿ ನೀಡಲು ಅಮಿತಾಬ್ ಬಚ್ಚನ್ ಅವರನ್ನು ಸಂಪರ್ಕಿಸಿದ್ದು, ಚರ್ಚೆ ನಡೆಸುತ್ತಿದೆ. ಒಂದು ವೇಳೆ ಅಮಿತಾಬ್ ಬಚ್ಚನ್ ಗೂಗಲ್ ಪ್ರಸ್ತಾಪವನ್ನು ಸ್ವೀಕರಿಸಿದರೆ ಅವರಿಗೆ ಮನೆಯಿಂದಲೇ ಧ್ವನಿ ರೆಕಾರ್ಡ್ ಮಾಡುವ ಸೌಲಭ್ಯವನ್ನು ಗೂಗಲ್ ಒದಗಿಸಲಿದೆ ಮತ್ತು ನಮಗೆಲ್ಲರಿಗೂ ಅಮಿತಾಬ್ ದಾರಿ ಹೇಳಲಿದ್ದಾರೆ. ಆದರೆ ಈ ಬಗ್ಗೆ ಗೂಗಲ್ ಆಗಲಿ ಅಮಿತಾಬ್ ಬಚ್ಚನ್ ಆಗಲಿ ಯಾವುದೇ ಹೇಳಿಕೆ ನೀಡಿಲ್ಲ.
ಇಂದು ಗೂಗಲ್ ಅನ್ನು ಆಕರ್ಷಿಸಿರುವ ಬಾಲಿವುಡ್ ಸೂಪರ್ ಸ್ಟಾರ್ ಅಮಿತಾಬ್ ಬಚ್ಚನ್ ಅವರ ಅಮೋಘ ಕಂಠವನ್ನು ಹಿಂದೊಮ್ಮೆ ಅಖಿಲ ಭಾರತ ರೇಡಿಯೊ ತಿರಸ್ಕರಿಸಿತ್ತು.
