Lಮಕರ ಜ್ಯೋತಿ ಸಂಭ್ರಮದ ನಡುವೆಯೇ ಕೇರಳದ ಶಬರಿಮಲೆ ಕ್ಷೇತ್ರದಲ್ಲಿ ಮತ್ತೊಂದು ಭಾರೀ ಹಗರಣ ಬೆಳಕಿಗೆ ಬಂದಿದೆ. ತಿರುವಾಂಕೂರು ದೇವಸ್ವಂ ಮಂಡಳಿಯಡಿ ಅಯ್ಯಪ್ಪನ ಅಭಿಷೇಕಕ್ಕಾಗಿ ಭಕ್ತರು ಖರೀದಿಸುವ ತುಪ್ಪದ ಪ್ಯಾಕೆಟ್ಗಳಿಂದ ಸಂಗ್ರಹವಾಗಿದ್ದ ಸುಮಾರು ₹35 ಲಕ್ಷ ಹಣ ಮಂಡಳಿಗೆ ತಲುಪಿಲ್ಲ ಎಂಬ ಗಂಭೀರ ಆರೋಪ ಕೇಳಿಬಂದಿದೆ.
ಈ ಹಣದ ವ್ಯವಹಾರದಲ್ಲಿ ಭಾರಿ ಅಕ್ರಮ ನಡೆದಿದೆ ಎನ್ನಲಾಗುತ್ತಿದ್ದು, ಕೇರಳ ಸರ್ಕಾರ ಪ್ರಕರಣವನ್ನು ಭ್ರಷ್ಟಾಚಾರ ನಿಗ್ರಹ ದಳ (ACB) ತನಿಖೆಗೆ ಒಪ್ಪಿಸಿದೆ. ಭಕ್ತರ ನಂಬಿಕೆ ಮತ್ತು ಧಾರ್ಮಿಕ ಭಾವನೆಗಳಿಗೆ ನೇರವಾಗಿ ಧಕ್ಕೆ ಉಂಟುಮಾಡುವ ಈ ಘಟನೆ ತೀವ್ರ ಆಕ್ರೋಶಕ್ಕೆ ಕಾರಣವಾಗಿದೆ.
ಈಗಾಗಲೇ ಶಬರಿಮಲೆಯಲ್ಲಿ 5 ಕೆಜಿ ಚಿನ್ನದ ಲೇಪನ ನಾಪತ್ತೆ ಪ್ರಕರಣ ರಾಜಕೀಯ ಕೋಲಾಹಲ ಉಂಟುಮಾಡಿರುವ ಬೆನ್ನಲ್ಲೇ, ಇದೀಗ ಬಹಿರಂಗವಾದ ಹೊಸ ಹಣಕಾಸು ಹಗರಣ ಸರ್ಕಾರವನ್ನು ಮತ್ತಷ್ಟು ಇಕ್ಕಟ್ಟಿಗೆ ಸಿಲುಕಿಸಿದೆ. ವಿರೋಧ ಪಕ್ಷಗಳು ದೇವಾಲಯ ಆಡಳಿತದ ಮೇಲೆ ಗಂಭೀರ ಆರೋಪಗಳನ್ನು ಹೊರಿಸುತ್ತಿದ್ದು, ಸಮಗ್ರ ತನಿಖೆಗೆ ಒತ್ತಾಯ ಮಾಡುತ್ತಿವೆ.
ಇಂದು ಸಂಜೆ ಲಕ್ಷಾಂತರ ಭಕ್ತರು ಮಕರ ಜ್ಯೋತಿಯ ದರ್ಶನಕ್ಕಾಗಿ ಶಬರಿಮಲೆಯಲ್ಲಿ ಸೇರುವ ನಿರೀಕ್ಷೆಯಿದ್ದು, ಇಂತಹ ಸಂದರ್ಭದಲ್ಲೇ ಹಗರಣಗಳ ಸರಣಿ ಬಹಿರಂಗವಾಗಿರುವುದು ಭಕ್ತರಲ್ಲಿ ಅಸಮಾಧಾನ ಹಾಗೂ ಆತಂಕ ಮೂಡಿಸಿದೆ. ತನಿಖೆಯ ಮೂಲಕ ಸತ್ಯ ಹೊರಬರಬೇಕೆಂದು ಭಕ್ತ ಸಮುದಾಯ ಆಗ್ರಹಿಸಿದೆ.
