ಕೇರಳದಲ್ಲಿ ಮತ್ತೊಂದು ಪೈಶಾಚಿಕ ಕೃತ್ಯ – ನಾಯಿಯ ಬಾಯಿ ಟೇಪ್ ನಿಂದ ಮುಚ್ಚಿ ವಿಕೃತಿ ಮೆರೆದ ದುಷ್ಟರು
ತ್ರಿಶೂರ್‌, ಜೂನ್ 11: ಕೆಲವು ದಿನಗಳ ಹಿಂದೆ ದುಷ್ಕರ್ಮಿಗಳು ಕೇರಳದಲ್ಲಿ ಗರ್ಭಿಣಿ ಆನೆಗೆ ಸ್ಫೋಟಕ ಇರಿಸಿದ್ದ ಅನಾನಸ್ ತಿನ್ನಿಸಿ ಅದರ ಸಾವಿಗೆ ಕಾರಣರಾಗಿದ್ದರು. ಇದೀಗ ಮತ್ತೊಂದು ಅಂತಹುದೇ ಪೈಶಾಚಿಕ ಕೃತ್ಯ ಕೇರಳ ರಾಜ್ಯದಲ್ಲಿ ಮತ್ತೊಮ್ಮೆ ಬೆಳಕಿಗೆ ಬಂದಿದೆ.
ಕೇರಳದ ತ್ರಿಶೂರ್‌ ಜಿಲ್ಲೆಯಲ್ಲಿ ಮೂರು ವರ್ಷದ ನಾಯಿಯ ಬಾಯಿಗೆ ಕಿಡಿಗೇಡಿಗಳು ಇನ್ಸುಲೇಷನ್ ಟೇಪ್ ಅನ್ನು ಅಂಟಿಸಿದ್ದು, ನೀರು, ಆಹಾರವಿಲ್ಲದೇ ಹಲವು ದಿನ ನಾಯಿ ಒದ್ದಾಡಿದೆ. ನಂತರ ಅದನ್ನು ಪ್ರಾಣಿಗಳ ಕ್ಷೇಮಾಭಿವೃದ್ಧಿ ಸೇವೆಗಳ ಸಂಘಟನಾ ಸಂಸ್ಥೆಯ ಸದಸ್ಯರೊಬ್ಬರು ಗಮನಿಸಿದ್ದು, ಟೇಪ್ ಅನ್ನು ತೆಗೆದು ನಾಯಿಯನ್ನು ಪಶುಆಸ್ಪತ್ರೆಗೆ ದಾಖಲಿಸಿದ್ದಾರೆ. ಇನ್ಸುಲೇಷನ್ ಟೇಪ್ ಅನ್ನು ಹಲವು ಪದರಗಳಲ್ಲಿ ನಾಯಿಯ ಬಾಯಿಗೆ ಸುತ್ತಿದ್ದು, ಹಲವು ದಿನಗಳಿಂದ ಏನನ್ನೂ ತಿನ್ನಲು ಕುಡಿಯಲು ಸಾಧ್ಯವಾಗದ ಕಾರಣ ನಾಯಿಯ ಮೂಳೆಗಳು ಕಾಣಿಸಲಾರಂಭಿಸಿದ್ದವು ಎಂದು ಹೇಳಲಾಗಿದೆ.
ಸುತ್ತಿದ್ದ ಇನ್ಸುಲೇಷನ್ ಟೇಪ್ ಅನ್ನು ನಾಯಿಯ ಬಾಯಿಯಿಂದ ತೆಗೆಯುವಾಗ ಅದರ ಮೂತಿಯ ಚರ್ಮ ಕೂಡ ಕಿತ್ತು ಬಂದಿದೆ ಎಂದು ಹೇಳಲಾಗಿದೆ. ಟೇಪ್ ಅನ್ನು ತೆಗೆದು ನಾಯಿಗೆ ಕುಡಿಯಲು ನೀರು ಕೊಟ್ಟಿದ್ದು, ಅದು ಸುಮಾರು ಎರಡು ಲೀಟರ್ನಷ್ಟು ನೀರು ಕುಡಿದಿದೆ. ಬಳಿಕ ಒಂದಷ್ಟು ಆಹಾರ ಕೊಟ್ಟು ಚಿಕಿತ್ಸೆಗಾಗಿ ಪಶುಚಿಕಿತ್ಸಾಲಯಕ್ಕೆ ದಾಖಲಿಸಲಾಗಿದ್ದು, ನಾಯಿ ಈಗ ಚೇತರಿಸಿಕೊಳ್ಳುತ್ತಿದೆ. ನಾಯಿಯ ಕುತ್ತಿಗೆಯ ಸುತ್ತ ಬೆಲ್ಟ್ ಅನ್ನು ಕಟ್ಟಿರುವ ಕಾರಣ ಇದು ಸಾಕು ನಾಯಿ ಇರಬಹುದು ಎಂದು ಹೇಳಲಾಗಿದ್ದು, ಸ್ಥಳೀಯರೊಬ್ಬರು ಆ ನಾಯಿಯನ್ನು ಸಾಕಲು ಮುಂದೆ ಬಂದಿದ್ದಾರೆ.
