ಸೌತಾಂಪ್ಟನ್ ಟೆಸ್ಟ್ -ಪಾಕ್ ವಿರುದ್ಧದ 2ನೇ ಟೆಸ್ಟ್ ನ ಮೊದಲ ದಿನ ಹಿಡಿತ ಸಾಧಿಸಿದ್ದ ಆಂಗ್ಲರು
ಇಂಗ್ಲೆಂಡ್ ಮತ್ತು ಪಾಕಿಸ್ತಾನ ನಡುವಿನ ಎರಡನೇ ಟೆಸ್ಟ್ ಪಂದ್ಯಕ್ಕೆ ಮಳೆರಾಯ ಅಡಚಣೆಯನ್ನುಂಟು ಮಾಡಿದ್ದಾನೆ. ಟಾಸ್ ಗೆದ್ದು ಮೊದಲು ಬ್ಯಾಟಿಂಗ್ ಮಾಡಿದ್ದ ಪಾಕ್ಗೆ ಇಂಗ್ಲೆಂಡ್ ವೇಗಿಗಳು ಕಂಟಕವಾಗಿ ಕಾಡಿದ್ದರು. ಪರಿಣಾಮ ಮಳೆಯಿಂದಾಗಿ ಮೊದಲ ದಿನದ ಆಟ ನಿಂತಾಗ ಪಾಕಿಸ್ತಾನ 5 ವಿಕೆಟ್ ಕಳೆದುಕೊಂಡು 126 ರನ್ ದಾಖಲಿಸಿದೆ.
ಹಾಗೇ ನೋಡಿದ್ರೆ ಪಾಕ್ನ ಲೆಕ್ಕಚಾರದ ಆಟಕ್ಕೆ ಇಂಗ್ಲೆಂಡ್ ವೇಗಿಗಳು ಅಡ್ಡಿಪಡಿಸಿದ್ರು. ಆರಂಭದಲ್ಲೇ ಶಾನ್ ಮಸೂದ್ ಒಂದು ರನ್ ಗಳಿಸಿ ಪೆವಿಲಿಯನ್ಗೆ ಹಿಂತಿರುಗಿದ್ರು. ನಂತ್ರ ಅಬಿದ್ ಆಲಿ ಮತ್ತು ನಾಯಕ ಅಝರ್ ಆಲಿ ಎರಡನೇ ವಿಕೆಟ್ಗೆ 72 ರನ್ ಪೇರಿಸಿ ತಂಡಕ್ಕೆ ಕೊಂಚ ಮಟ್ಟಿಗೆ ನೆರವು ನೀಡಿದ್ರು. ಈ ಹಂತದಲ್ಲಿ ನಾಯಕ ಅಝರ್ ಆಲಿ 20 ರನ್ಗೆ ಹೋರಾಟ ಮುಗಿಸಿದ್ರೆ, ಅಬಿದ್ ಆಲಿ ಆಕರ್ಷಕ 60 ರನ್ ಗಳಿಸಿ ಸ್ಯಾಮ್ ಕುರನ್ಗೆ ವಿಕೆಟ್ ಒಪ್ಪಿಸಿದ್ರು.
ಬಳಿಕ ಬಾಬರ್ ಅಝಮ್ ತಾಳ್ಮೆಯ ಆಟವನ್ನಾಡಿದ್ರೆ, ಪಾಕ್ನ ಮಧ್ಯಮ ಕ್ರಮಾಂಕದ ಬ್ಯಾಟ್ಸ್ ಮೆನ್ಗಳಾದ ಅಸಾದ್ ಶಫೀಕ್ 5 ರನ್ ಮತ್ತು 11 ವರ್ಷಗಳ ಬಳಿಕ ಟೆಸ್ಟ್ ಪಂದ್ಯವನ್ನಾಡುತ್ತಿರುವ ಫವಾದ್ ಅಲಾಮ್ ಶೂನ್ಯ ಸುತ್ತಿ ನಿರಾಸೆ ಅನುಭವಿಸಿದ್ರು. ದಿನದ ಅಂತ್ಯದ ವೇಳೆ ಬಾಬರ್ ಅಝಮ್ ಅಜೇಯ 20 ರನ್ ಮತ್ತು ಮಹಮ್ಮದ್ ರಿಝ್ವಾನ್ 4 ರನ್ ಗಳೊಂದಿಗೆ ಎರಡನೇ ದಿನಕ್ಕೆ ಬ್ಯಾಟಿಂಗ್ ಕಾಯ್ದುಕೊಂಡಿದ್ದಾರೆ.
ಇಂಗ್ಲೆಂಡ್ ಪರ ಜೇಮ್ಸ್ ಆಂಡರ್ಸನ್ ಎರಡು ವಿಕೆಟ್ ಪಡೆದ್ರೆ, ಸ್ಟುವರ್ಟ್ ಬ್ರಾಡ್ ಮತ್ತು ಸ್ಯಾಮ್ ಕುರನ್, ಕ್ರಿಸ್ ವೋಕ್ಸ್ ಅವರು ತಲಾ ಒಂದು ವಿಕೆಟ್ ಉರುಳಿಸಿದ್ದಾರೆ.
