ಕೊರೋನಾ ವೈರಸ್ – ಕೆಮ್ಮಿದಾಗ/ಸೀನಿದಾಗ ಹೊರಬರುವ ಕಣಗಳೆಷ್ಟು? ಒಬ್ಬರಿಂದೊಬ್ಬರಿಗೆ ಹರಡಲು ಸಮಯವೆಷ್ಟು ಬೇಕು – ಇಲ್ಲಿದೆ ಮಾಹಿತಿ
ಕೊರೊನಾವೈರಸ್ ಸಾಂಕ್ರಾಮಿಕ ಒಬ್ಬರಿಂದ ಇನ್ನೊಬ್ಬರಿಗೆ ಅತ್ಯಂತ ವೇಗವಾಗಿ ಹರಡುತ್ತದೆ ಎನ್ನುವುದು ತಜ್ಞರ ಅಭಿಪ್ರಾಯ. ಹೊಸ ಅಧ್ಯಯನದ ಪ್ರಕಾರ, ಗಾಳಿಯಿಂದ ಕೂಡ ಕೊರೊನಾ ವೈರಸ್ ಪಸರಿಸಬಹುದು ಎಂದು ವರದಿಯಾಗಿದೆ. ಹಾಗಾಗಿ ಕೊರೊನಾ ವೈರಸ್ ಶೀಘ್ರವಾಗಿ ವಿಶ್ವವ್ಯಾಪಿಯಾಗಿದೆ ಎಂದು ಹೇಳಲಾಗಿದೆ.
ದಿ ಪ್ರೊಸೀಡಿಂಗ್ಸ್ ಆಫ್ ದಿ ನ್ಯಾಷನಲ್ ಅಕಾಡೆಮಿ ಆಫ್ ಸೈನ್ಸಸ್ನಲ್ಲಿ ಪ್ರಕಟವಾದ ಸಂಶೋಧನೆಯು ಸೌಮ್ಯ ಅಥವಾ ಯಾವುದೇ ರೋಗಲಕ್ಷಣಗಳಿಲ್ಲದ ಕೊರೋನಾ ಪೀಡಿತರಿಂದ ಇತರರಿಗೆ ಹೇಗೆ ಸೋಂಕು ತಗುಲುತ್ತದೆ ಎಂಬುದನ್ನು ವಿವರಿಸಿದೆ. ಸೋಂಕನ್ನು ಉಂಟುಮಾಡಲು ಒಬ್ಬ ವ್ಯಕ್ತಿಯಿಂದ ಇನ್ನೊಬ್ಬರಿಗೆ ಎಷ್ಟು ವೈರಸ್ ಹರಡಬೇಕು ಎಂಬುದು ಸಂಶೋಧಕರಿಗೆ ಇನ್ನೂ ತಿಳಿದಿಲ್ಲ. ಆದರೆ ಅದರ ಆವಿಷ್ಕಾರಗಳು ಕೊರೋನವೈರಸ್ ಹರಡುವುದನ್ನು ಕಡಿಮೆ ಮಾಡಲು ಮುಖವಾಡಗಳನ್ನು ಧರಿಸುವುದು ಮತ್ತು ಅಂತಹ ಪರಿಸರದಲ್ಲಿ ಇತರ ಮುನ್ನೆಚ್ಚರಿಕೆಗಳನ್ನು ತೆಗೆದುಕೊಳ್ಳುವುದು ಅವಶ್ಯಕ ಎಂದು ತಿಳಿಸಿದೆ. ಒಬ್ಬ ಕೊರೊನಾ ಸೋಂಕಿತನಿಂದ ಇನ್ನೊಬ್ಬರಿಗೆ ವೈರಸ್ ಹರಡಲು 5 ರಿಂದ 50 ನಿಮಿಷಗಳು ಸಾಕು ಎಂದು ಅಮೆರಿಕದ ಮೆಸ್ಯಾಚುಸೆಟ್ಸ್ ಅಧ್ಯಾಪಕರು ವರದಿ ನೀಡಿದ್ದಾರೆ.
ಒಂದು ಕೆಮ್ಮು ಆಳವಾದ ಉಸಿರಿನೊಂದಿಗೆ ಪ್ರಾರಂಭವಾಗುತ್ತದೆ ಮತ್ತು ಈ ಸಮಯದಲ್ಲಿ ಶ್ವಾಸಕೋಶವು ಸಂಕುಚಿತ ಗಾಳಿಯನ್ನು ಹೆಚ್ಚಿನ ಒತ್ತಡದಿಂದ ಹೊರಹಾಕುತ್ತದೆ. ಒಬ್ಬ ವ್ಯಕ್ತಿಯು ಒಂದು ಕೆಮ್ಮಿನಲ್ಲಿ ಸರಾಸರಿ ಒಂದೂವರೆ ಲೀಟರ್ ಗಾಳಿಯನ್ನು ಹೊರಹಾಕುತ್ತಾನೆ. ನಾವು ಕೆಮ್ಮಿದಾಗ ಅಥವಾ ಸೀನುವಾಗ, ವೈರಸ್ಗಳಿಂದ ಕಲುಷಿತವಾದ ಲಾಲಾರಸವನ್ನು ಸಹ ನಾವು ಸಿಡಿಸುತ್ತೇವೆ. ಕೆಮ್ಮು ಮತ್ತು ಸೀನುವಿಕೆಯ ಕಾರ್ಯವಿಧಾನವನ್ನು ಅಧ್ಯಯನ ಮಾಡುವ ವಿಜ್ಞಾನಿಗಳು ಒಂದು ಕೆಮ್ಮಿನಲ್ಲಿ ಸುಮಾರು 3,000 ಹನಿಗಳ ಲಾಲಾರಸ ಹೊರಬರುವುದನ್ನು ಕಂಡುಹಿಡಿದಿದ್ದಾರೆ. ಲಾಲಾರಸದ ಕೆಲವು ಹನಿಗಳು 80 ಕಿ.ಮೀ ವೇಗದಲ್ಲಿ ಚಲಿಸುತ್ತವೆ ಎಂದು ಹೇಳಿದ್ದಾರೆ. ಅಂದರೆ ಒಬ್ಬ ಕೊರೊನಾ ಸೋಂಕಿತ ಕೆಮ್ಮಿದಾಗ ಆತನ ಬಾಯಿಯಿಂದ 3 ಸಾವಿರ ವೈರಸ್ನ ಕಣಗಳು ಹೊರಗೆ ಬರುತ್ತದೆ. ಮತ್ತು ಆತ ಹತ್ತು ಬಾರಿ ಕೆಮ್ಮಿದಾಗ 30 ಸಾವಿರ ವೈರಸ್ ಕಣಗಳ ಹೊರಗೆ ಬರುತ್ತದೆ ಎಂದು ಎಚ್ಚರಿಸಿದ್ದಾರೆ. ಕೆಮ್ಮಿನ ಕಣಗಳು ಗಾಳಿಯಲ್ಲಿ ಗಂಟೆ 50 ಮೈಲಿ ವೇಗದಲ್ಲಿ ಚಲಿಸುತ್ತವೆ ಮತ್ತು ಸೀನಿದಾಗ 200 ಮೈಲಿ ವೇಗದಲ್ಲಿ ಚಲಿಸುತ್ತದೆ ಎಂದು ಹೇಳಿದ್ದಾರೆ. ಒಂದು ವೇಳೆ ವೈರಸ್ ಕಣಗಳು ತಾಗಿರುವ ಕೈಯಿಂದ ಗೊತ್ತಿಲ್ಲದೇ ಕಣ್ಣನ್ನು ಉಜ್ಜಿಕೊಂಡರೆ ನೂರಾರು ವೈರಸ್ ಕಣಗಳು ದೇಹ ಸೇರುತ್ತವೆ ಎಂದು ತಜ್ಞರು ಅಭಿಪ್ರಾಯ ಪಟ್ಟಿದ್ದಾರೆ.
ರೋಗ ನಿರೋಧಕ ಶಕ್ತಿ ಕಡಿಮೆ ಇರುವ ವ್ಯಕ್ತಿಗಳಿಗೆ ಕೊರೋನಾ ಸೋಂಕು ಬೇಗ ತಗುಲಿದರೆ, ಆರೋಗ್ಯವಂತ ಮಾನವನ ದೇಹ ಸೇರಲು 50 ನಿಮಿಷ ಬೇಕಾಗಬಹುದು ಎಂದು ತಜ್ಞರು ಅಭಿಪ್ರಾಯ ಪಟ್ಟಿದ್ದಾರೆ.
ಆದುದರಿಂದ ಕೊರೋನಾ ಸೋಂಕಿನಿಂದ ದೂರವಿರಲು ಸಾಮಾಜಿಕ ಅಂತರ ಕಾಯ್ದುಕೊಳ್ಳುವುದು, ಮಾಸ್ಕ್ ಧರಿಸುವುದು, ಆಗಾಗ್ಗೆ ಕೈಯನ್ನು ತೊಳೆದು ಕೊಳ್ಳುವುದು ಸೇರಿದಂತೆ ಕೊರೊನಾ ಸೋಂಕು ತಡೆಗಟ್ಟುವ ಮಾರ್ಗಸೂಚಿಗಳನ್ನು ಪಾಲಿಸುವುದು ಅತ್ಯವಶ್ಯಕ.
