Dandruff : ತಲೆಹೊಟ್ಟು ನಿವಾರಣೆಗೆ ಸುಲಭವಾದ ಮನೆಮದ್ದುಗಳು…

ಅತಿಹೆಚ್ಚು ಕಿರಿಕಿರಿ ತರುವ ಕೂದಲು ಸಮಸ್ಯೆಗಳಲ್ಲಿ ತಲೆಹೊಟ್ಟು ಸಹ ಒಂದು . ಇದು ಒಂದು ರೀತಿ ಚರ್ಮದ ಕಾಯಿಲೆ. ನೆತ್ತಿಯ ಮೇಲೆ ಹೊಸ ಕೋಶಗಳಿಗಿಂತ ಹೆಚ್ಚು ಸತ್ತ ಜೀವಕೋಶಗಳು ಇದ್ದರೆ, ಅವು ನೆತ್ತಿಯ ಮೇಲೆ ಉಬ್ಬುಗಳಾಗಿ ಕಾಣಿಸಿಕೊಳ್ಳುತ್ತವೆ. ಕೆಲವೊಮ್ಮೆ ಶಿಲೀಂಧ್ರಗಳ ಸೋಂಕು ಅದರೊಂದಿಗೆ ಇರುತ್ತದೆ. ಕೂದಲನ್ನು ನಿಯಮಿತವಾಗಿ ಸ್ವಚ್ಛಗೊಳಿಸದಿದ್ದರೆ, ಸೋಂಕು ಮತ್ತು ತಲೆಹೊಟ್ಟು ಕಾರಣ ಸಂಪೂರ್ಣ ಕೂದಲು ಉದುರುವ ಅಪಾಯವಿದೆ.

ತಲೆಹೊಟ್ಟು ಎರಡು ವಿಧ. ಸಣ್ಣ ಬಿಳಿ ಸಿಪ್ಪೆಯ ರೂಪದಲ್ಲಿ ಬೀಳುತ್ತವೆ. ಇದನ್ನು ಡ್ರೈ ಡ್ಯಾಂಡ್ರಫ್ ಎಂದು ಕರೆಯಲಾಗುತ್ತದೆ. ಶೀತ ವಾತಾವರಣದಲ್ಲಿ ಕಾಣಿಸಿಕೊಳ್ಳುತ್ತದೆ. ಇನ್ನೊಂದು ಎಣ್ಣೆಯುಕ್ತ ಡ್ಯಾಂಡ್ರಫ್. ಇದು ತಿಳಿ ಹಸಿರು ಬಣ್ಣವನ್ನು ಹೊಂದಿರುತ್ತದೆ ಮತ್ತು ಕೆಲವೊಮ್ಮೆ ಕೆಟ್ಟ ವಾಸನೆಯನ್ನ ಹೊಂದಿರುತ್ತದೆ. ಈ ಸಮಸ್ಯೆಯು ವಯಸ್ಸಿನ ಹೊರತಾಗಿಯೂ ಎಲ್ಲಾ ವಯಸ್ಸಿನ ಜನರಲ್ಲಿ ಕಂಡುಬರುತ್ತದೆ.

ಕೆಲವು ಮುನ್ನೆಚ್ಚರಿಕೆಗಳನ್ನು ತೆಗೆದುಕೊಳ್ಳುವುದರಿಂದ ಮತ್ತು ಕೆಲವು ಮನೆಮದ್ದುಗಳನ್ನು ಬಳಸುವುದರಿಂದ ತಲೆಹೊಟ್ಟು ಸಮಸ್ಯೆಯನ್ನು ಕಡಿಮೆ ಮಾಡಬಹುದು.

1. ತಲೆಹೊಟ್ಟು ಜಾಸ್ತಿ ಇದ್ದಾಗ ಮೆಂತ್ಯವನ್ನ ನೆನೆಸಿ ಪೇಸ್ಟ್ ಮಾಡಿ ತಲೆಗೆ ಹಚ್ಚಬೇಕು. ಅರ್ಧ ಗಂಟೆಯ ನಂತರ ಸ್ನಾನ ಮಾಡಿದರೆ ಉತ್ತಮ ಫಲಿತಾಂಶ ಸಿಗುತ್ತದೆ.

2. ಸ್ನಾನ ಮಾಡುವ ಅರ್ಧ ಗಂಟೆ ಮೊದಲು ಮೊಸರು ಮತ್ತು ನಿಂಬೆ ರಸವನ್ನು ಬೆರೆಸಿ ತಲೆಗೆ ಹಚ್ಚಿ. ವಾರಕ್ಕೊಮ್ಮೆ ಹೀಗೆ ಮಾಡಿದರೆ ತಲೆಹೊಟ್ಟು ಕಡಿಮೆಯಾಗುತ್ತದೆ.

3. ಆಮ್ಲಾ ಕೂದಲಿಗೆ ಕಬ್ಬಿಣವನ್ನು ಒದಗಿಸಿ ಆರೋಗ್ಯಕರವಾಗಿರಿಸುತ್ತದೆ. ನಿಂಬೆ ರಸದಲ್ಲಿ ಆಮ್ಲಾ ಜ್ಯೂಸ್ ಮತ್ತು ಆಮ್ಲಾ ಪುಡಿಯನ್ನು ಒಟ್ಟಿಗೆ ತಲೆಗೆ ಮಸಾಜ್ ಮಾಡಬೇಕು. ನಂತರ ಒಂದು ಗಂಟೆ ಬಿಟ್ಟು ಸ್ನಾನ ಮಾಡಿ.

4. ಟೊಮೆಟೊ ತಿರುಳನ್ನು ಪ್ಲಾಸ್ಟಿಕ್ ಬಟ್ಟಲಿನಲ್ಲಿ ಹಾಕಿ. ಇದಕ್ಕೆ ಸ್ವಲ್ಪ ನಿಂಬೆ ರಸವನ್ನು ಸೇರಿಸಿ. ಈ ಮಿಶ್ರಣವನ್ನು ತಲೆಯ ಬುಡಕ್ಕೆ ಹಚ್ಚಿಕೊಳ್ಳಿ. ನಲವತ್ತು ನಿಮಿಷಗಳ ನಂತರ ಸ್ನಾನ ಮಾಡಿ. ವಾರದಲ್ಲಿ ಎರಡು ಬಾರಿ ಹೀಗೆ ಮಾಡುವುದರಿಂದ ತಲೆಹೊಟ್ಟು ಸಮಸ್ಯೆಯಿಂದ ಮುಕ್ತಿ ಪಡೆಯಬಹುದು.

5. ವಾರದಲ್ಲಿ ಎರಡು ಬಾರಿ ಬೆಚ್ಚಗಿನ ತೆಂಗಿನ ಎಣ್ಣೆಯನ್ನು ನಿಂಬೆ ರಸದೊಂದಿಗೆ ಬೆರೆಸಿ ಅರ್ಧ ಘಂಟೆಯವರೆಗೆ ಬೆರಳುಗಳಿಂದ ನಿಧಾನವಾಗಿ ಮಸ್ಸಾಜ್ ಮಾಡಿ ಬಿಸಿ ನೀರಿನಲ್ಲಿ ಅದ್ದಿದ ಟವೆಲ್ ಅನ್ನು ಸುತ್ತಿ ಅರ್ಧ ಘಂಟೆಯವರೆಗೆ ಇರಿಸಿ. ಅದರ ನಂತರ, ಸ್ನಾನ ಮಾಡುವುದರಿಂದ ಕೂದಲಿಗೆ ಉತ್ತಮ ಪೋಷಣೆ ಸಿಗುತ್ತದೆ.

6. ವಿಟಮಿನ್ ಎ ಸಮೃದ್ಧವಾಗಿರುವ ಹಸಿರು ತರಕಾರಿಗಳು, ಫೈಬರ್ ಮತ್ತು ಹಣ್ಣುಗಳನ್ನು ಸೇವಿಸಿ. ತರಕಾರಿಗಳು ಮತ್ತು ಮೀನುಗಳನ್ನು ಸಮತೋಲಿತ ಆಹಾರದಲ್ಲಿ ತೆಗೆದುಕೊಳ್ಳಬೇಕು. ಕರಿದ ಆಹಾರವನ್ನು ಸೇವಿಸದಿರುವುದು ಉತ್ತಮ. ಪ್ರೋಟೀನ್ ಭರಿತ ಆಹಾರಗಳನ್ನು ಸೇವಿಸುವುದರಿಂದ ತಲೆಹೊಟ್ಟು ತಡೆಯಬಹುದು.